وش سالفة اللعبة
هي اعادة اصدار محسّن من لعبة الآكشن اللي نزلت عام 2013. اللعبة بشكل أساسي هي اعادة لسلسلة Devil may Cry المشهورة، بحيث جا مطوّر جديد للسلسلة (Ninja Theory) واستلم زمام أمور اللعبة ويبدأها من جديد.
معلومات اللعبة
الايجابيات
- فرق واضح وملحوظ في الرسوم والسلاسة، 60 اطار في الثانية فعلاً تفرق في ألعاب الآكشن، والاصدار الجديد هذا يثبت الفرق.
- ميزة Turbo Mode بالذات غيّرت لي تجربة اللعبة للأفضل، وهو عبارة عن طور يسرّع اللعبة بنسبة 20%.
- نظام قتال رائع، بحيث يقدر اللاعب اللي ماهو محترف في هالنوع من الألعاب انه يلعبها، وفي نفس الوقت فيه عمق للمحترفين.
- طريقة تعليم (toturial) مثاليّة، بحيث يعطيك التعليمات بشكل مرتّب ومدروس ومبسّط، عكس ألعاب اليومين هذي اللي يحط لك صورة وتحتها ثلاث أو أربع فقرات كلها كلام يطفّش ويجيب النوم.
- تطوير القدرات ممتاز، بحيث تقدر تطوّر القدرات اللي عندك وتقويها، أو انك تفتح تطويرات جديدة كليّاً وتبدأ تطبقها في لعبك. الأهم من هذا كلّه ان التطويرات لها فايدة فعليّة في اللعبة، ماهي مجرد “أشياء جديدة تفكّها”.
- طريقة اللعب بشكل عام ممتعة وبعيدة عن التطفيش، بحيث فيها قتال كثير لكن يفصله بعض الألغاز البسيطة اللي تهدّيك شوي وتخلّيك تغيّر جو.
- بشكل عام، أسلوب رسم اللعبة رائع ومتميّز عن باقي الألعاب، وفي النسخة الجديدة صارت أفضل.
السلبيات
- على ان النسخة المحسّنة تجمع كل الاضافات والمحتويات اللي نزلت للنسخة الأصلية، الا انها كلها كانت عبارة عن زيادة مالها قيمة فعليّة. اضافة قصة وحدة ولا كانت جيّدة، بينما الباقي لباس وأسلحة وأشياء مالها قيمة مؤثرة.
- لا زلت مشكلة الكاميرا في القتال موجودة، بحيث تضطر انك تغيّر اتجاه الكاميرا وأنت تقاتل. في ألعاب الآكشن، العادة يرفعون لك الكاميرا فوق عشان يكشفون لك كامل ساحة القتال وتعرف مواقع الوحوش، لكن هذا الشي ماهو موجود في هاللعبة.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
في الاصدار الأصلي للعبة، كثير من اللاعبين اشتكى من بطء اللعبة (30 اطار في الثانية)، وهذي تُعتبر مشكلة في ألعاب الآكشن. الآن مع الاصدار الجديد للعبة، صارت تشتغل 60 اطار في الثانية وصارت أسرع من قبل، ومع تشغيل طور تيربو اللي يسرّع لك اللعبة بنسبة 20%، اختلفت تجربتي للعبة بشكل شبه كامل. مظهر اللعبة في النسخة الجديدة أفضل طبعاً، وبكذا صارت التجربة الأمثل لوحدة من أروع ألعاب القتال.
ألعاب مشابهة
- Bayonetta.
- God of War.
فيديو اللعبة
