مشهور الدبيان
الايجابيات
- باختصار، أمتع نظام قتال جربته في هذا الجيل. رتم سريع للقتال، حركات كثيرة جداً تتعلمها، امكانية التحويل السلس والسريع بين أسلحة كثيرة تضيف تنويع كثير للعب، اعداء بانواع واشكال وتصرفات مختلفة “يجبرونك” تنوّع في الحركات والاسلحة بدرجة كبيرة، يعني انسى تعلّق على حركه وحده عشان تفوز! شيء ممتع جداً ويبرّد القلب ويخليك تدمن عليه. أفضل لعبة Devil May Cry من هالناحية.
- اختيار موفّق لتشكيلة الاسلحة اللي موجودة في اللعبة، تحسها تكمّل بعض. من الالعاب النادره اللي استخدمت فيها كل الاسلحة المتوفرة طوال اللعبة وما اعتمدت على سلاحين او ثلاثه بس.
- تصميم مجنون للمراحل يعطيك تجربة مميّزة في اللعب، ويضيف لهالشي روعة الجرافيكس في اللعبة.
- تمثيل واداء صوتي متقن في الشخصيات الثلاث الرئيسية (دانتي، فيرجل، كات).
- بعد ما عشت تجربة اللعبة كامله من البداية للنهاية، حسّيت ان تغيير دانتي كان موفّق الى حد ما، ويعطي السلسلة روح جديدة كانت تحتاجها. لا يعني اني صرت احبه، لكن ما عاد اكرهه زي أول.
السلبيات
- زاوية الكاميرا في اللعبة مضروبه. اوقات كثير اضطريت اقاتل ناس ما اشوفهم اصلا لانهم خارج مجال الرؤية، ويزيد الموضوع سوء انك ما تقدر تصوّب (او تسوي Lock-On) على العدو عشان تثبّت الكاميرا عليه. هذا الشيء الوحيد اللي كان يمنع ان نظام القتال يصير كامل.
- القصة تحسها من النوع اللي الاب يقراها لولده قبل ما ينام. سطحية وتقليدية جداً. ما حسيتهم استغلوا الشخصيات والبيئة بالشكل المناسب للأسف.
- تصفّح قائمة التطويرات بطيء جداً، لان كل ما تحط المؤشّر على تطوير معيّن بتحتاج تنتظر كم جزء من الثانية يحمّل لك فيديو توضيحي له. المشكله انك بتقضي وقت كبير تتصفّح هالقائمة وبيصير شي مزعج مع الوقت.
- اللعبة عبارة عن: اركض > ناقز > ادخل مكان > تتقفل عليك مداخل ومخارج المكان ويطلع لك كم وحش > تقتل هالكم وحش > تنفتح مداخل ومخارج المكان > اركض > ناقز .. الخ. تكرار يجيب الملل مرات، وبعدين ليش لازم تقفل المكان على اللاعب اذا طلعوا الوحوش؟ ترا بطلوها هالحركات.
- كمية الاسلحة والحركات اللي تجيك في بداية اللعبة، والطريقة الغريبه للتحكم فيهم بيخلونك تلخبط كثير في الحركات في البداية، وبتحتاج وقت الى ما تتعود عليها. حتى لو تعودت عليها ممكن مع الحماس وسرعة اللعب تتلخبط وتسوي حركه غير اللي كنت تبي تسويها.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
هذي بدون منازع أفضل لعبة Devil May Cry لعبتها حتى الآن. شخصياً اول مره في تاريخ السلسلة أستمتع بالقتال بهالشكل، ومن وجهة نظري تفوّقت حتى على God of War من هالناحية. اذا تحب العاب المغامرات اللي تعتمد على القتال بشكل رئيسي، فهذي لعبة ما تتفوّت. شخصياً ما كان انطباعي ايجابي عن اللعبة أول ما شفتها، وحتى الديمو ما اعجبني، لكن الوضع اختلف تماماً بعد ما اخذت التجربة كامله من الصفر.
ألعاب مشابهة
- God of War
- Darksiders
فيديو اللعبة
عصام الشهوان
Saudi Gamer
سندس الخباز