وش أول لعبة المفروض تشتريها للبلايستيشن 4؟

نزل جهاز بلايستيشن 4 عندنا رسمياً أمس، وكثير ناس كانوا يسألون بعض “وش أول لعبة تنصحني اشتريها؟”، خاصة اللي اشتروا الجهاز لحاله بدون ألعاب.

هذا الموضوع ببساطة بيساعدك تختار أول لعبة تشتريها حسب نوع الألعاب اللي تستهويك.

تبي لعبة رهيبة وتوسّع الصدر؟

احد المفاجآت الجميلة اللي لقيناها مع بلايستيشن 4 هي لعبة ريزوقن (Resogun)، وهي حالياً أفضل لعبة على الجهاز سواءً من ناحية المتعة أو التفاصيل المبهرة الموجودة في اللعبة. ومع انها لعبة بسيطة، الا انها تخليك تدمن عليها وتقضي وقت طويل فيها.

وأحلى شي انها مجانية مع اشتراك بلايستيشن بلس. هذا عرض للعبة:

تبي لعبة حربية؟

اذا كنت من النوع اللي يحب الألعاب الحربية، فما عندك حالياً الا بتل فيلد 4 (Battlefield 4) و كول أوف دوتي (Call of Duty: Ghosts). بالنسبة لكول أوف دوتي فبشكل عام ما تختلف عن نسخة بلايستيشن 3 الا في الجرافيكس (ماهو شي يسوى)، اما بتل فيلد فالاونلاين فيها يدعم 64 لاعب، وهذي تعتبر ميزة كبيرة لان نسخة البلايستيشن 3 ما تدعم الا 24 لاعب فقط! يعني تجربة اللعب بتختلف عليك كلياً، وهالشي لحاله يخلي بتل فيلد الخيار الأفضل لك اذا تحب الألعاب الحربية (واذا يستهويك اسلوب بتل فيلد طبعاً).

طبعاً ممكن تتسائل “و كيلزون (Killzone Shadow Fall) وين راحت؟”. من تجربتنا لها اللعبة عادية جداً صراحة، حتى تقييماتها في الانترنت عموماً اقل من كول أوف دوتي و بتل فيلد، فما ننصح تكون أول اختيار لك.

تبي لعبة كرة قدم؟

بما ان PES 14 ما راح تنزل على البلايستيشن 4، فخيارك الوحيد هو فيفا 14. هل التطويرات في فيفا 14 تستحق انك تشتري الجهاز عشانها أو تكون أول لعبة تشتريها مع الجهاز؟

فيفا 14 على البلايستيشن 4 تحتوي على تطويرات كثيرة في اللعب تزيده دقّه وواقعية، بالاضافة الى دعم دقّة 1080p وجمهور أكثر واقعية، لكن بصراحة حتى مع التطويرات هذي أحس حرام تدفع 1800 ريال عشان تشتري جهاز تلعب فيه فيفا بس (للاستراحة مثلاً). وما أشوف من المناسب انك تضيّع فلوسك فيها كأول لعبة للجهاز، صبّر نفسك بـ فيفا 14 على البلايستيشن 3 واستمتع بألعاب أفضل على البلايستيشن 4 في الوقت الحالي.

تبي لعبة مغامرات؟

الخيار الأفضل حالياً هو لعبة أساسنز كريد (Assassin’s Creed 4: Black Flag)، مع انها ما تفرق كثير عن نسخة البلايستيشن 3 الا اذا تدقّق مره على الجرافكيس مثل ما تشوف في هالمقارنة:

واذا كنت لاعبها على البلايستيشن 3، فما عندك اي سبب تشتريها الحين.

تبي لعبة للعائلة أو الأطفال؟

يمكن تبي لعبة تشتريها لولدك أو أخوك الصغير يلعبونها أو تلعبها معهم. من اللي شفته الى الآن ان اكثر لعبة استمتعو فيها الاطفال على البلايستيشن 4 علي لعبة بلاي روم (Playroom) وهي لعبة تجي مجاناً مع الجهاز، بس تتطلّب الكاميرا حقت بلايستيشن اللي لازم تشتريها منفصله. هذا فيديو للعبة:

كخيار ثاني عندك لعبة ناك (Knack). كلعبة مستواها أقل من عادي، لكن الأطفال ما راح يدقّقون واجد. اصلاً من يوم ما تشوفهم يحبون بارني و تيليتابيز تعرف ان ذوقهم خايس فلا تشيل هم من هالناحية.

تبي ألعاب ببلاش؟

مين فينا ما يحب البلاش؟ حالياً الجهاز يجي معه لعبة بلاي روم مجاناً، وتقدر تحمّل لعبتين مجانيتين ببلاش وهم وورفريم (Warframe) و بلاك لايت ريتروبيوشن (Blacklist: Retrobution) وهي العاب مقبوله وتوسّع الصدر.

وفي حال اشتركت في خدمة بلايستيشن بلس، فبتاخذ فوقها ريزوقن الرهيبة ولعبة كونتراست (Contrast) وهي لعبة مغامرات والغاز توسّع الصدر برضه.

ما لقيت اللعبة اللي تبيها؟

اذا بعد كل هالخيارات ما لقيت شي يستهويك، فننصحك وبشدّة تنتظر شوي الى ما تنزل ألعاب أكثر على الجهاز، وتصير فيه حصريات تستاهل انك تشتري الجهاز عشانها.

وش أول لعبه شريتها (أو ناوي تشتريها) مع البلايستيشن 4؟ شاركنا برأيك في التعليقات!