أخيرًا، تقدر تلعب ألعاب الكترونية على الآيباد زي الناس

على بداية شهر مارس من هذا العام، بتنزل قطعة تقدر تركّبها على جهازك الآيباد بحيث تضيف لها أزرار تحكم حقيقية وتصير تلعب ألعاب الكترونية زي الناس.

القطعة هذي تم الاعلان عنها قبل سنة، ولكنها كانت في المراحل التطويرية الأولى. الآن الجهاز اكتمل، وحسب كلام الشركة المصنّعة انهم “يضعون اللمسات الأخيرة” قبل الاطلاق.

الجهاز هذا، واللي اسمه Gamevice، بيكون فيه نوعين، واحد بيدعم تقنية 4G وبطارية حجمها 1600 mAh واللي ما أعلنوا عن سعره للآن، والثاني بتكون حجم بطاريته 800 ولا يدعم فور جي، وبيكون سعره 99.99 دولار (375 ريال).

أما بالنسبة للأجهزة اللي بيدعمها، فهي أجهزة iPad Air ، iPad Air 2 ، واصدارات آيباد ميني الثلاث كلها. القطعة حالياً مخصّصة لهذي الأجهزة من آبل، وعلى الرغم من ان الشركة قبل سنة قالت ان القطعة هذي بتكون على أجهزة آندرويد وويندوز، الا انها غيرت رأيها ونزلت القطعة على أجهزة آبل فقط.

أزرار التحكم، مثل ماهو واضح في الصورة، قرروا انهم يخلونها نفس وحدات التحكم اللي نعرفها. تقدر تقول انهم خلّوا الفلسفة والخرابيط على جنب وقالوا خلنا في المضمون 🙂

وش رأيك في القطعة؟