في مقابلة مع موقع Polygon، تكلم رئيس استديوهات سوني العالمية عن وضع الفيتا الحالي. في البداية تكلم عن الـPSP وكيف ان جودته كانت مساويه للـPS2، لكن مع صدور الـPS3، صار الاهتمام بالـPSP اقل بسبب ارتفاع جودة الرسوم، وقارن هذا الشيء بالفيتا حاليا “لما اطلقنا الفيتا مع لعبة انتشارتد، وكان رائع جداً وقتها، جهاز بجودة الـPS3 بين يديك. لكن مع مرور الوقت تشوف جودة الـPS4، وكيف ان توقعات الناس لجودة الرسوم ارتفعت”. يقصد انه حان الوقت ان نسحب على الـPS Vita.
وقال برضة ان الأهتمام بجودة الرسوم على الفيتا صار اقل “من حسن حظنا ان حالياً، حدثت ثورة المطورين المستقلين، وهم يقدمون محتويات ممتازة للفيتا. الناس يبون يقضون 10 الى 15 دقيقة في اللّعب (يقصد في الاجهزة المحمولة). شيء ملائم للفيتا، والعاب المطورين المستقلين ممتازة جدا لهذا الشيء”
وتكلم عن توجههم الجديد وقال انهم راح يستمرون بصناعة الالعاب القابلة للّعب على كل الاجهزة (Cross-Platform)، وان سوني تركز حالياً على خدمات اخرى، مثل الـRemote Play وخدمة PlayStation Now. اما بالنسبة لألعاب الطرف الأول، قال انها راح تكون اقل من السابق.
بصراحة يمكن اول مرة يخيب ظني بيوشيدا. هو كأنه يتبرأ بشكل رسمي من الفيتا، لأن زي ما شفنا سوني ما أعلنت عن أي العاب للجهاز في E3. والمشكلة لما قال ان العاب الطرف الاول بتكون اقل، حسسني ان سوني قاعدة تنزل العاب كثيرة على الفيتا، وهم ساحبين عليه من الاساس. الآن الفيتا بيدين المطورين المستقلين و للأسف شركات الطرف الثالث. تمنيت ان الاهتمام من سوني يكون اكبر، لأنهم يقدرون يطورون العاب ممتازة جداً اذا كانت مخصصة من الاصل للفيتا مو لعبة منقولة من الاجهزة الثانية، مثل Tearaway وغيرها.
وش رايك بكلام يوشيدا؟ ووش رايك بمستقبل الفيتا؟
