شركة سوني (Sony) اعلنت ان جهاز المورفيوس (Morpheus) الخاص بالواقع الافتراضي راح ينزل في النصف الاول من عام 2016.
في مقابلة مع شوهي يوشيدا (Shuhei Yoshida) رئيس ستديوهات سوني حول العالم تكلم فيها عن تفاصيل كثيرة عن المورفيوس.
قال يوشيدا: “سعر البيع ماكان همنا الاول في التطوير، المرة الاولى اللي يجربوا فيها اللاعبين اجهزة الواقع الافتراضي هي اخطر تجربة لهم. الناس يبدأوا يتعودوا على الاجهزة بعد فترة لكن المرة الاولى غالبا راح تسبب امراض بسبب حركة اللعبة، لذلك احنا نبغا نسوي جهاز مناسب ومريح للمستخدم”
كمل يوشيدا: “حاليا احنا نشعر اننا سوينا الجهاز و اجتزنا العتبة الاولى اللي وضعناها لانفسنا، الخطوة التالية هي تحديد ارخص سعر بيع يمكن تقديمه للمستهلك، هذي ثاني مشكلة بعد التطوير راح نبحث عن حل لها. ارباح اول ايام بيع الجهاز راح تكون لتغطية تكلفة الجهاز لكن راح نحاول اننا نحدد سعر مناسب من اول يوم للجهاز في السوق” يقصد ان غالبا الاجهزة اول ماتنزل سعرها يكون عالي لتغطية قيمة التكلفة وبعد فترة ينزل سعر الجهاز لكن هم راح يحددوا سعر مناسب من البداية بدون مايكون عالي جدا.
سعر المورفيوس الى الان مااتحدد، لكن يوشيدا وضح ان اللاعبين الافضل انهم يفكروا بالجودة اكثر من السعر. وضح ايضا ان الجهاز راح يقدم تجربة جديدة ومريحة للاعبين. المشكلة اللي بتواجه سوني حاليا انهم صعب يوضحوا للناس كمية الجهد والفلوس اللي دفعوها لتطوير المورفيوس سواء في المحلات او في الاعلانات التلفزيونية.
قال يوشيدا: “التحدي رقم واحد بالنسبة لنا هو انك تجعل اللاعبين يجربوا جهاز المورفيوس. اذا ماجربته ماراح تفهم الى اي مدى الجهاز ممتاز او رائع. ثاني افضل شيء في الجهاز هو مشاهدة الناس وهم يلعبوه”
كمل يوشيدا: “لما تشوف ردات فعل اللاعبين وهم يجربوا الجهاز، راح تفكر ان في شيء مثير للاهتمام بيصير داخل الجهاز وودك تجربه. بالتالي راح تحصل على اكبر عدد ممكن من الناس لتجربة الجهاز وبعد مايجربوه راح يتكلموا عنه لاصدقائهم. اعتقد هذي طريقة من احد الطرق لنشر الجهاز و اجبار اللاعبين لتجربته”
كلام جميل من يوشيدا وننتظر الناس اللي يجربوه ونشوف انطباعاتهم. على الورق الجهاز خورافي لكن مانحكم الى ان نجرب بانفسنا. اذا تبغا تعرف عن مواصفات المورفيوس اللي اعلنوا عنها بالتفصيل كتبنا خبر عنها.
اش رايكم بكلام يوشيدا؟
