نزّلت مايكروسوفت (Microsoft) فيديو جديد عن طريقة التحكم بالاكس بوكس ون (Xbox One) من خلال التقنية المعروفة كينيكت.
على ان الفيديو بشكل أساسي يشرح خصائص الكينيكت، الا اني كنت أنتظر فيديو مثل هذا، فيديو نقدر نشوف فيه نظام الاكس بوكس بشكل واضح. كل الفيديوات اللي نزلت قبل للجهازين، سواءً اكس بوكس ون او بلاي ستيشن فور، كانت مجرد لقطات سريعة وماهي واضحة.
اليوم نبغى نحلّل الفيديو اللي نزل، ونتناقش على بعض المزايا اللي لاحظناها فيه.
اللي ما شاف الفيديو، بامكانه يتفرج عليه هنا:
احتمال كبير ان أول شي لاحظته -وقد أعلنوا عنه من زمان- وهو ان النظام شبيه جداً بنظام Windows 8 من ناحية القوائم والتصاميم وغيرها. الشكل جميل جداً، وهذا شي متعودين عليه من الاكس بوكس. نظام البلاي ستيشن 4 فيه تشابه كبير بينه وبين بلاي ستيشن 3 من ناحية الشكل والأيقونات والقوائم، ولكن تم تحسينه بشكل كبير. برضو من سوء حظنا ان نظام البلاي ستيشن 4 الى الآن ما تم عرضه بشكل دقيق، ولكن تم عرضه على شكل دعاية تجارية.
القائمة الرئيسية شبيهة برضو بقائمة الاكس بوكس 360 من ناحية ان الأشياء الرئيسية موجودة قدامك، مثل الديسك اللي داخل الجهاز (سواءً لعبة أو فيلم). تقدر برضو تشوف Upload Studio وهو التطبيق الخاص برفع ملفات اللعب حقتك، مثل اذا سويت حركة بطله وانت تلعب وتبي تسجلها وترفعها وتورّي الناس انك بطل مغوار لا يشق له غبار.
الميزة اللي احتمال تفرق بالنسبة للكثير، هي وجود سكايب (Skype) ودمجه بشكل كامل مع النظام. لو تلاحظ في 1:12 ان الرد على مكالمة سكايب كانت سلسة جداً كأنك تنتقل من تطبيق الى تطبيق ثاني على جهاز ويندوز.
لو صار سكايب هو التطبيق الرسمي للمكالمات الجماعية في اكس بوكس، واستبدلوه محل Party Chat المعروفة على اكس بوكس 360، بتكون ميزة كبيرة للاكس بوكس. كثير من اللاعبين بيرتاح من سالفة اضافة الناس كلها من جديد، بما ان سكايب هو برنامج المكالمات الأشهر في العالم، تماماً عكس بلاي ستيشن 4!
سوني ما راح تجلس تتفرج طبعاً، وشفناها في دعايات البلاي ستيشن 4 تسوّق لتطبيق بلاي ستيشن واللي يدعم المحادثات الكتابية وميزات رهيبة غيرها. لكن التحدي في كونه تطبيق جديد ضد تطبيق يكاد يكون موجود في كل جوال، وتابليت، وكمبيوتر هذي اليومين!
فيه برضو ميزات ثانية كثيرة في الصفحة الثانية من النظام، لكن للأسف أكثرها -أو احتمال كلها- ما راح تكون متوفّرة عندنا في السعودية. شكراً مايكروسوفت، لكن ترا العالم فيه دول ثانية كثير، مو بس أمريكا!
أخيراً، باقي نشر فيديوات لعبك، بامكانك تشوف في 0:44 سهولة رفع الفيديوات ونشرها. ما يحتاج حتى تطلع من اللعبة اللي تلعبها. كل اللي تحتاج تسويه انك تعطي أمر لكينيكت برفع المقطع، وبعدها تعطي أمر ثاني بنشر الفيديو، وانتهينا!
شخصياً، الأوامر الصوتية شكلها حلو ورهيب وغالباً بتعطي تجربة أسهل، لكن حسب تجربتي معها، بعض الأحيان تشطح في تحليل الكلام اللي تقوله وتعطيك شي مختلف تماماً، خصوصاً اذا كان حولك ناس يتكلمون. هذا بالنسبة لي بيكون مزعج جداً ويخلّيني أستخدم الطريقة المعتادة -من خلال استخدام القوائم- حتى لو كانت أطول شوي من الأوامر الصوتية، اللي احتمال ما تحلل صوتك بشكل صحيح.
تكلمنا عن موضوع يشبه هذا قبل فترة، ولكن السؤال، وبعد الفيديو الجديد من مايكروسوفت، يطرح نفسه من جديد: أي نظام تتوقّع بيناسبك أكثر، البلاي ستيشن فور أو الاكس بوكس ون؟ شاركنا برأيك في الأسباب في التعليقات!
