محمد الشريف
سلسلة التصويب العريقة والمعروفة، ناوية ترجع لنا في عام 2014 بعد الجزء الأخير اللي جا بعد انقطاع في عالم الالعاب. حضرنا اليوم لقاء صحفي مع مطورينها، وبرضو كانوا كريمين جداً معنا وخلونا نجرب لعبتهم لمدة ساعة كاملة، أطول فترة لعب لديمو في أي معرض بالنسبة لي.
أول شي لاحظته وجذبني في اللعبة، ان أحداثها تقع في عالم خيالي يفوز فيه هتلر والنازيين بالحرب العالمية الثانية. أول ما قال لنا المطور هالكلمة جا في بالي سؤال: كيف بيكون شكل العالم لو فازت ألمانيا في الحرب العالمية الثانية من جد؟
قصة Wolfenstein تتكلم عن هذا الحدث الافتراضي، وأقدر أقول ان القصة من أكثر الأشياء اللي اهتميت لها في الديمو، ولو ان الديمو غالباً ما يعرض لك شي كبير من القصة. باقي القصة اللي شفتها ما راح أخربها على أحد، ولكن القصة شكلها فعلاً عميقة اذا استمرت على هذا الحال.
طريقة اللعب، واللي هو أهم عنصر، مافيها شي متميّز جداً عن غيره. لعبة تصويب مافيها فلسفة ولا فيها ابداع، أي لاعب تصويب راح يعرف يلعبها على طول. احتمال ان هذي من أهداف المطوّر، انه يخلي اللاعب على طول يفهم طريقة اللعب. جيدة الطريقة اذا تبغى تسلك طريق الأمان في طريقة اللعب، لكن مشكلتها انها خالية من الابداع، وهذا شي مهم بالنسبة لي على الأقل.
برضو فيه عندك خيار التخفي أثناء لعبك، وهذي ميزة جيّدة بدينا نشوفها في أكثر ألعاب التصويب. شي جميل ان اللعبة تعطيني الخيار اما اني أهاجمهم بأسلوب كول أوف دوتي (Call of Duty) أو استخدم التخفي والتسلل بحيث أتخلص من الأعداء وأكمل مهمتي بدون ما أسوي زحمة وازعاج وآكشن.
التسلل برضو ما لاحظت فيه شي متميز، تمشي بشكل حذر وخفيف وتتخلص من الأعداء بطعنهم بالسكين الين ما توصل للهدف. اذا كنت مثلي فاحتمال تميل لطريقة اللعب في اللعبة طالما ان فيها تخفي، أما اذا ما تحب التخفي والتسلل وتبي تلعبها بأسلوب آكشني فما أتوقع انها تختلف كثير عن أي لعبة تصويب موجودة.
أتمنى من Wolfenstein تنجح بسبب اللي شفته من قصتها، فكرة ان النازيين فازوا بالحرب العالمية الثانية واستبدوا في العالم فكرة رائعة تستحق الاهتمام. طريقة اللعب مثلها مثل أي لعبة تصويب موجودة هاليومين، ما قدرت ألاحظ شي كبير يميّزها عن غيرها من ناحية طريقة اللعب.
ألعاب التصويب كثيرة هاليومين، ولا؟ وش تتوقع العناصر اللي تحتاجها ألعاب التصويب الجاية عشان تنجح؟ شاركنا برأيك في التعليقات!
بارعة
أيمن اليغشي
