مقالات

ليش متحمّس لنسخة بلاي ستيشن 4 للعبة Diablo 3

Diablo-3-Cover

عندي مشكلة كبيرة جداً، وهي إني مدمن لعبة ديابلو 3 (Diablo 3). أنا أعشق العاب الأر بي جي (RPG) والأكشن (Action). ديابلو هي لعبة تجمع هذين النوعين من الألعاب.

الهدف من اللعبة (طبعاً بعد ما تخلص من القصة) هو إنك تجمع غنايم (Loot) أو ملابس (Gear)، بحيث إنك تعطي لاعبك أحسن سلاح، وأحسن درع، وأحسن قطعة كتف…الخ. كل ما تلبس شيء اقوى، كل ما تقدر تزود صعوبة اللعبة عشان تدور على قطع اقوى من اللي قبلها. كل هذي الأشياء يمديك تسويها مع ثلاثة من اخوياك. و كل ما تلعب مع اخوياك، كل ما زادت فرصة نزول ملابس اقوى من الوحوش، يعني أنواع الفلة.

اللعبة هذي بتنزل على الـPS4 في الشتاء. مع اني انا حالياً العبها على الـPC، الا اني جداً متحمس على اصدار الـPS4 لهذي الاسباب:

  • امكانية اللعب في جهاز واحد. انت و ثلاثة من اخوياك تجلسون تلعبون في نفس المكان. جلسة جماعية تذكرني بأيام ماريو كارت (Mario Kart) وقولدن آي (Goldeneye).
  • أنا شخصياً متعود على اللعب بيد سوني او اكس بوكس اكثر من استخدام الفارة.
  • امكانية ارسال اسلحة او ملابس ما تحتاجها لأخوياك.
  • طور الـApprentice (حصري للـPS4): طور جديد في اللعبة بإمكانك من خلاله استدعاء اخوياك حتى لو كان مستواهم ضعيف. اللعبة تقويهم مؤقتاً بحيث انهم يقدرون يلعبون بنفس مستواك. في الاصدار القديم، اذا كان مستوى خويّك ضعيف، ما يقدر يحارب الوحوش اللي في لعبتك لأنه ضعيف جداً بالنسبة لهم، فيضطر انه يبعد عنهم ويخليك تحاربهم وياخذ XP معاك الين ما يوصل لمستوى قريب من مستواك. هذا الطور بيفك ازمة!
  • نظام الـNemesis (حصري للـPS4): مع هذا النظام، في وحوش معيّنة اذا قتلك واحد منهم، يقوى ويصير يداهم خويّك في لعبته ويعلمه انه قتلك. اذا قتل خويّك، ينتقل لشخص ثاني ويبقى على هذا الحال الين ما احد يقتله او يختفي. اذا انقتل هذا الوحش، اللعبة تكافئ اللي قتله بأسلحة او ملابس وترسل هدية لكل اللي واجهوه قبله.

نصيحتي لكل جيمر ان يعطي اللعبة هذي فرصة خصوصاً انها بتنزل على الـPS4 وبمزايا حصرية رهيبة. هل انتم متحمسين لها؟ والا شبعتوا من نسخة الـPC؟ عطونا آرائكم!

الوسوم
اظهر المزيد

رواح المعيقل

يعيش في الرياض. يلعب من أيام السوبر نينتندو و نينتندو 64. يحب جميع أنواع الألعاب بشكل عام, هوايته إن يجرب أفكار جديدة في الألعاب. و من احلى الألعاب اللي عنده هي (RPG) و (Action Adventure) و (Shooter)
إغلاق