كلنا نعرف ان الاكس بوكس ون يعاني من قلة المبيعات لدرجة ان ميكروسوفت تحاول تغطي على قلة المبيعات ولا هي راضية تعطي ارقام فعلية، ودايماً نسمع في تصريحاتهم (بعنا حوالي وتقريباً) على عكس سوني اللي جالسة تصرح بشكل قوي عن مبيعاتها الضخمة ودايماً نسمع منهم (بعنا بمايزيد عن) هذا يدل على ان الاكس بوكس جالس يبيع اقل بكثير من الشي اللي كانت ميكروسوفت متوقعته له.
لكن وش السبب وليش الاكس بوكس ون بالذات يعاني في البيع مع ان الجيلين السابقة منه باعت وبشكل ممتاز وتفوقت بعض الاحيان على البلايستيشن؟ وبرضه الاكس بوكس له جمهور كبير جداً وله ولاء للجهاز، ليش جزء كبير منهم تخلوا عنه وراحوا للبلايستيشن؟
السبب هو تقديم الجهاز للجمهور بشكل مايليق فيه، مايليق في الجهاز طبعاً. وزي ماحنا عارفين ان الهدف من الاعلان هو تحقيق اتجاهات ايجابية للجهاز عند العملاء اللي هم الاعبين في المرتبة الاولى. لكن هل ميكروسوفت حققت الاتجاهات الايجابية للجهاز عند العملاء واذا ماحققته ليش الاخفاق؟
عشان نعرف جواب السؤال راح اقيم اعلان ميكروسوفت عن الاكس بوكس من بدايته باستخدام اسلوب داغمار DAGMAR اسلوب داغمار هذا يقيس فاعلية الاعلان والهدف من الاتصال بالجمهور، بحيث يمر الاعلان بخمس مراحل هرمية ينتقل فيها المستهلك من مرحلة للمرحلة اللي بعدها بشرط انه ماينتقل الا بعد نجاح اللي قبلها حتى يوصل للمرحلة اللي يتم فيها تكوين انطباع ايجابي عن الجهاز.
اولاً وقبل ما أقيم الاعلان بوضح نقطة واللي هي ان مهمة الشركة اللي تقدم اي منتج انها تتعرف على فئات المستهلكين لمنتجها.
مرحلة عدم الإدراك
هي المرحلة الاولى واللي يكون فيها الجمهور ماعنده اي معلومات عن الجهاز ويحتاج انه يتعرف عليها مبدئياً في هذي المرحلة الجمهور يحتاج يعرف اسم او شكل الجهاز او كلها مع بعض.
مرحلة الإدراك
هي المرحلة الثانية ويكون الجمهور عندهم معلومات عن اسم وشكل الجهاز بدون معرفة تفاصيل
مرحلة التصور والفهم
في هذي المرحلة يوصل الجهاز لمستوى فهم وادراك الجمهور وهنا صار الخطأ، الجهاز تقدم في هذي المرحلة على انه جهاز سهل ومريح وسلس في التعامل مع قنوات التلفزيون الافلام وبرامج الاتصال، لكن في الجهة المقابلة واللي هي الاساس والاهم تقدم على انه جهاز صعب التعامل معه من ناحية الالعاب يحتاج اتصال انترنت مايشغل العاب مستعملة والتضييق على المطورين المستقلين، هنا كان واضح انهم يحاولون يستقطبون جمهور جديد للجهاز في الوقت اللي كانوا متوقعين ان جمهور الاكس بوكس بولائهم للجهاز وعناوينه الحصرية القوية راح ينصاعون ويتقبلون قرارتهم، ولو خسروا جزء بسيط منهم راح يعوضونه بالجمهور الجديد اللي راح يكسبونه بسبب خصائصه الجديدة وللأسف اغفلوا ان جمهور الجهاز 100% لاعبين وكل اللي يتابعون اعلانات الجهاز لاعبين.
مرحلة تكوين الاتجاهات
هنا المفروض يكون الجهاز حقق اتجااهات ايجابية لو نجحت الخطوة اللي قبلها، لكن بما إن الرسالة الموجهة للجمهور كانت خطأ فالاتجاهات كانت سلبية تماماً.
مرحلة اتخاذ القرار
الاعلان وصل بأغلبية الجمهور لإتخاذ قرار انهم ماراح يشترون الجهازوالبديل جاهز ومتميز في ظهوره واللي هو (بلايستيشن 4). هذا كان الاعلان الاولي للجهاز، وبعد فترة لاحظت ميكروسوفت ردود الافعال السلبية عن الجهاز وتراجعت عن كثير من قراراتها السلبية اللي ماتخدم الاعبين، لكن كانت في وقت متأخر وبعد اتخاذ الاعبين قرار عدم الشراء والتوجه للبديل.
لكن هل التراجع عن القرارت وتخفيض السعر راح يخدم هذا الجيل من الاكس بوكس ومبيعاته مستقبلاً والا هل راح يفشل هذا الجيل من الاكس بوكس مهما حاولت ميكروسوفت؟
من وجهة نظر شخصية ان الجهاز راح يبيع بشكل مرضي نوعاً ما لميكروسوفت بعد الخطاْ اللي سووه في الاعلان الاولي للجهاز، راح احاول احلل وابني توقعات لمسيرة مبيعات هذا الجيل من جهاز الاكس بوكس. راح اقول ان الاكس بوكس جيل جديد وركز على جمع الترفيه كامل في جهاز واحد تلفزيون، افلام، العاب. يعني جهاز جديد بتوجه جديد راح اتعامل معه على انه جهاز جديد من نوعه. (تحليل) راح تكون مبيعات الاكس بوكس ون توقعية تقريبية كالتالي.
المجموعة اللي اشترت من بداية اصدار الجهاز وماكانت تفكر في نجاح اوفشل الجهاز هدفهم استكشاف وتجربة الجهاز الجديد ونسبتهم حوالي 3% تقريباً. وهذي الفئة من الناس موجودين مع اي منتج يشترون لهدف تجربة اي شي جديد. المجموعة اللي بعدهم راح تكون المبيعات بنسبة اكبر وهم متبنين انعاش مبيعات الجهاز ونسبتهم تقريباً 13%. وبعدهم في بداية نص عمر الجهاز راح تكون بداية النسبة الكبرى لمبيعات الجهاز بنسبة تقريبية 35% وبعدها بنفس النسبة تقريبا ً 35% راح تكون المجموعة اللي بتنهي اكبر نسبة لمبيعات الجهاز. المجموعة الاخيرة في نهاية عمر الجهاز راح تكون هي نهاية المبيعات بنسبة 14% تقريباً.
هذي النسب قابلة للزيادة لو ميكروسوفت حاولت انها تشبع رغبات اللاعبين كل ما زادت الحصريات والعناوين القوية للجهاز كل مازادت مبيعاته والطلب عليه والعكس كل ماقل اهتمامهم باللاعب كل ما قلت مبيعات الجهاز لأن ماراح يشتري الاكس بوكس الا لاعب.
هذا كان تحليل شخصي باسخدام بعض النظريات، اللي يقرا المقال وعنده رغبة يشتري الاكس بوكس ون اتمنى يصنف نفسه من اي مجموعة ويكتب في التعليقات وراح اراجع تعليقاتكم كاملة.
