مع بداية كل جيل، تعلن الشركات عن “ألعاب رهيبة” وتطّلع لك عروض مظهرها خرافي، لكن اذا نزلت اللعبة غالباً تتفاجأ بأنها ماهي قد المستوى، أو حتى تكون لعبة سيئة.
هذي المشكلة تعتبر مشكلة أزليّة مع بداية كل جهاز، تقريباً ما فيه جهاز انطلق بشكل صحيح. ما يحتاج ترجع كثير ورا، ناخذ الجيل الجديد كمثال لهذي المشكلة.
نزل البلاي ستيشن 4 قبل كم يوم، ونزلت معه ألعاب أسماءها قوية مثل كيلزون (KillZone: Shadow Fall) وناك (Knack). سألت بعض أصحابي اللي حصل لهم يلعبونها، كثير منهم قالوا انها جيّدة لكنها ماهي قد المستوى. أضف الى ذلك تقييمات اللعبتين ما كانت قد التوقعات أبداً.
برضو نفس المشكلة حاصلة مع اكس بوكس ون (Xbox One) مع ديد رايزينق 3 (Dead Rising) وكيلر إنستينكت (Killer Instinct)، والظاهر ان فيه ألعاب ثانية بتلحقهم!
كل هذا الكلام، المفروض انه ما يأثر كثير على قرارك لشراء أي لعبة. قرار شرائك يعتمد عليك أنت. حبيت أذكر هذي المعلومة المهمّة قبل لا نتعمق في هذا الموضوع.
اليوم في مقابلة مع الأخ اللطيف توني كاي (Tony Key) رئيس مبيعات وتسويق أوبيسوفت (Ubisoft)، تكلم عن هذا الموضوع بشكل مثير للاهتمام.
تكلم توني في البداية عن أشياء بيديهية، مثل صعوبة التطوير على الأجهزة الجديدة. يقول توني: ” في الفترة الحالية، كل الناشرين يسوون عملية نقل للموارد حقتهم من الجيل القديم الى الجيل الجديد. عندك لعبة مثل أساسنز كريد 4، ما نقدر نسوي لها نسخة كاملة للجيل القادم بحيث تختلف اختلاف كلّي عن نسخ الجيل الحالي. ما يمدينا نسوّق للنسختين في وقت واحد، بالاضافة الى ان أغلب المبيعات راح تكون على أجهزة الجيل الحالي”.
برضو يقول توني: “عشان كذا، كل المطورين يحاولون حالياً انهم يطوّرون ألعابهم بحيث تشتغل على كل الأجهزة بشكل جيّد. ولكن مع انتقالنا الى الجيل الجديد بيكون صعب علينا اننا نسوي هذا الشي، لان الأجهزة الجديدة بتعطي مساحة كبيرة جداً للابداع”.
هذا شرح بسيط ومفهوم من توني بخصوص هذا الموضوع اللي حيّر اللاعبين. برضو توني كان متفائل في المقابلة وقال ان اللاعبين لازم يعطون فرصة لمطوّري الألعاب ويصبرون عليهم، وان “المتعة” بترجع من جديد لعالم ألعاب الفيديو!
كل هذا الكلام ماهو معناته اننا المفروض نتشاءم من كل الألعاب الجاية، لان فيه ألعاب تطلع من لا شيء وتصير معشوقة الجماهير. تذكرون لعبة وورهوك (Warhawk)؟ لعبة ما كان عليها تسويق مثل باقي الألعاب، والحق انها ما كانت مبهرة تقنياً. لكن ركزت على عامل واحد: المتعة! وهذا شي ما صرنا نشوفه كثير في هذا الجيل. توقعوا ان فيه لعبة أو لعبتين تطلع من لا شيء وتصير معشوقة الجماهير.
عموماً، بداية الجيل هذا يبدو انها بتكون أقل سوء من الجيل اللي قبل، خصوصاً لبلاي ستيشن. متحمس أشوف ألعاب مشهورة تطيح وتطلع بدالها ألعاب جديدة، مثل ما يصير في كل جيل.
علمنا عن تجربتك مع ألعاب الاطلاق في جيل البلاي ستيشن 3 واكس بوكس 360 في التعليقات!
مصدر مقابلة توني كاي من موقع Destructoid.
