نزل قبل يومين فيديو عرض جديد للعبة سوما (SOMA)، لعبة الرعب اللي من تطوير فريكشينال جيمز (Frictional Games). كان الخبر هذا من أهم الأخبار اللي مرّت علي في هذاك اليوم، لكن الاهتمام العام للعبة كان ضئيل جداً. بأحاول اليوم أقنع البعض عن أسباب حماسي للعبة اللي شكلها بتكون خرافية.
ايش SOMA أصلاً؟
هي لعبة رعب خيال علمي، من تطوير فريكشينال جيمز اللي سوولنا لعبة الرعب الخرافية آمنيشيا: ذا دارك ديسينت (Amnesia: The Dark Descent). لعبة أمنيشيا تحتاج موضوع كامل عشان أوفي مدحها فيها، وهي بالفعل أعتبرها أفضل لعبة رعب في السنوات الأخيرة، وممكن أتهوّر وأقول انها أفضل لعبة رعب في جيل بلاي ستيشن 3 واكس بوكس 360.
ليش المفروض اننا نتحمّس على هاللعبة الغريبة؟
فيه أسباب كثيرة حمّستني على اللعبة، وراح أذكر أهمها فقط.
ياخي اللي سووها هم نفسهم حقين آمنيشيا
هذا أول وأكبر سبب بالنسبة لي، آمنيشيا مثل ما ذكرت من أفضل ألعاب الرعب اللي لعبتها في السنوات الأخيرة، والمشروع هذا بدأ الشغل عليه من عام 2010 ولا زالوا يشتغلون فيه. احتمال تنزل اللعبة في بداية 2015، وهذا كلام يبشر بالخير ويدل على ان اللعبة ماخذه راحتها في التطوير.
عروض ممتازة ومثيرة للاهتمام
من قبل الاعلان عن اللعبة والمطوّر يسوي عروض تشويقية ممتازة، حاولت أحلل الفيديوات اللي نزلوها قبل لا يعلنون الاعلان الرسمي عن اللعبة. وهذا آخر عرض نزل للعبة يستعرض البيئات الموجودة فيها.
ما عاد فيه ألعاب رعب زي الناس
ألعاب الرعب في الجيل اللي راح كانت دون المستوى، أيام الرعب الياباني انتهت، أيام سايلنت هيل وفيتل فريم ورزدنت ايفل وفوربيدين سايرن وغيرها من أساطير الرعب. الرعب الأمريكي ما يستهويني أبداً، ما قد اعتبرت لعبة ديد سبيس (Dead Space) لعبة رعب كثر ما هي لعبة مغامرات تمشي الحال.
سوما عندها الفرصة انها تعيد أمجاد الرعب المفقود، واللي لعب آمنيشيا غالب الظن يعرف بيتفق معي في كلامي.
بتنزل على بلاي ستيشن 4
آمنيشيا ما نزلت الا على البي سي، وهذا واحد من أسباب عدم انتشارتها وان كثير من اللاعبين فقط “سمعوا فيها”. سوما بتنزل على البي سي وبلاي ستيشن 4، وهذا معناته لاعبين أكثر بيلعبونها.
تحمست؟ كويس. ما تحمست؟ آفااا!
هذي من الألعاب الي من جد متحمس لها، وأتمنى لها نجاح أكبر من نجاح آمنيشيا اللي أعتقد انها ما أخذت حقها لأسباب كثيرة. سوما عندها الفرصة انها تنجح للأسباب اللي ذكرتها، خصوصاً انها بتنزل على بلاي ستيشن 4 وبتكون في متناول الكل تقريباً.
وش عناصر الرعب اللي تشوفها ضرورية في ألعاب الرعب؟ شاركنا رأيك في التعليقات، وأقدر أقول ان كثير من أجوبتكم بتكون موجودة في سوما!
