زي ما نعرف إن أي شركة صناعية هدفها الربح المادي ولا غير الربح المادي وبأقل التكاليف بما فيها شركات الألعاب. من هذي الشركات شركة اكتفجن (Activision) الناشر للعبة كول اوف ديوتي (Call of Duty) والشيء اللي صاير مع كول اوف ديوتي حالياً هو مبيعات ضخمة سنوية مقابل تطوير بسيط مايلاحظه ولا يحس فيه الا اللي يعرف ومتعمق في اللعبة.
الواضح من الكلام انها معادلة مهيب متوازنة! وتراها معادلة متوازنة وشي طبيعي والموضوع زي ماقلنا مادي. فيه ناس يقولون ان الشركة افلست من ناحية التطوير و ما عاد تقدر تعطي افكار جديدة في اللعبة، وهذا مهوب صحيح لأن الافكار الجديدة تحتاج دراسات ومصادر اكثر ووقت اطول ومصاريف اكثر، بينما عندي لعبة تدخل علي ملايين مضمونة كل سنة وبدون تطوير كبير وبدون خساير. لكن السؤال المهم هنا هل اللعبة راح تبقى زي كذا او ان فيه احتمال تتطور مستقبلاً أو انها راح تنتهي؟ وهل اذا انخفضت مبيعاتها راح تبدا في التطوّر الكبير والملحوظ زي ماقلنا قبل إن المسألة كلها فلوس، و شركة اكتفجن ماشية على نظرية معروفة وبسيطة اسمها مصفوفات بوسطن(BCG Matrix).
الفكرة بإختصار وعشان محد يمل، مثل ماهو موضح في الرسم التوضيحي في الاسفل مربع كبير وسطة اربعة مربعات، اثنين فوق واللي على اليمين علامة استفهام واللي على اليسار نجمة واثنين تحت واللي على اليسار بقرة واللي على اليمين كلب. عن طريق هذا المربع راح نعرف وش وصّل كول اوف ديوتي لهذي القوة وش مصير كول اوف ديوتي مستقبلاً؟
كول اوف ديوتي في بدايتها كانت في المربع الاول اللي هو علامة استفهام، مشروع جديد وينصرف عليه اعلانات وتطوير وممكن ينجح وممكن لا، زي اللي صاير مع تايتن فول (Titanfall) حالياً واللي تابع البودكاست يمكن سمع جميل يقول تايتن فول ماراح تنجح وباقي الاعضاء مخالفينه في انها راح تنجح وهذا شيء طبيعي لانه مشروع جديد وعليه علامات استفهام. اكتفجن كانت تدفع حق الأعلانات وحق التسويق الشيء الكبير، كله عشان تدف اللعبة للمربع الثاني اللي هو النجمة، وبالفعل نجحت وصارت اللعبة اسم معروف ينصرف عليها شي كثير وتدخل مكاسب كثير.
في مربع النجمة اللعبة قاعده تكوّن محبين وبعض المحبين يصير عنده ولاء للعبة، معنى الكلام انه في مربع النجمة المنتج يكوّن جمهور مُحب، هذا الجمهور هو اللي ينقل اللعبة من مربع النجمة الى مربع البقرة الحلوب، وحالياً كول اوف ديوتي في هذا المربع، وهي البقرة الحلوب لشركة اكتفجن، مصاريف قليلة وعوائد ضخمة، من هنا نبدأ نشوف مستقبل كول اوف ديوتي. في مربع البقرة الحلوب يبدا الشغل على الاسم والشهرة، مصاريف قليلة وارباح ضخمة مع مرور الوقت وقلة التطوير تفقد اللعبة حب الجمهور ويتخلون عنها ما عدا اللي عندهم ولاء لها، اذا احست الشركة بتدهور في المبيعات راح تتحرك وتدف اللعبة الى المربع التالي اللي هو مربع الكلب، في مربع الكلب راح تصدر اللعبة للناس اللي عندهم ولاء للعبة فقط بكمية بسيطة، معناتها مصاريف قليلة وارباح قليلة ولا راح تنلغى اللعبة الا في حالة وحدة، اللي هي إذا كان اسم اللعبة يضر سمعة الشركة ومنتجات الشركة ويضر مبيعات المنتجات الثانية.
ممكن يجي سائل ويقول ليش بعد مربع الكلب مايسوون لها اعادة صياغة ويرجعونها من جديد للمربع الاول زي ماصار مع تومب رايدر (Tomb rider) ؟ والجواب هو ان اللعبة واسمها خصوصاً كوّن كره وعدم ثقة عند الجمهور فما راح تغامر الشركة في اسم معدوم الثقة فيه الا في حالة واحدة، انه يستلمها مطور جديد له خبرة وجمهور عشان يرجع الثقة، لكن نجاحها مو مضمون، او يشتريها ناشر جديد وهذي الحالة نادراً ماتصير الا في حالة وحده اذا افلست الشركة.
ممكن احد يقول ليش اكتفجن ماتسوي زي يوبي سوفت (Ubisoft) تستنزف بقرتها الحلوب اساسينز كريد، وفي نفس الوقت تغذي منتجها الجديد واللي جاي بقوة واتش دوقز (Watch dogs) اللي برضه داخل مربع علامة الاستفهام ويحاولون قد مايقدرون يدفونه لمربع النجمة؟ الجواب من وجهة نظري الشخصية أن كول اوف ديوتي مالها منافس حقيقي في مجالها يشكّل خطر على مستقبل مبيعاتها. طيب لو حصل وطاح سوق كول اوف ديوتي هل راح تعاني اكتفجن عشان ترجع للمنافسة؟ برضه من وجهة نظري المتواضعة انها ماراح تعاني لأنها شركة عندها ميزانية هائلة وعندها الخبرة الكافية اللي ترجعها للمنافسة وبسرعة.
في نهاية كلامي اقول ان كول اوف ديوتي باقي متسيدة في مجالها على الباقين وقبل كم يوم تأكد اصدار جزء جديد لكول اوف ديوتي 2014، وهذا يدل ان اكتفجن باقي ثقتها كبيرة في منتجها حتى بعد ردود الافعال السلبية عن كول اوف ديوتي قوست. لا أحد ينتظر من كول اوف ديوتي اي شي جديد، الوضع باقي زي ماهو ولا راح يتغير حتى يجف ضرع البقرة.
