محمد الشريف
أمس تكلمنا عن موضوع مشابه، واليوم بنتكلم عن موضوع لا يقل حماس عن اللي قبل.
معرض إي ثري، وهو من أكبر معارض الألعاب في العالم، نشوف فيه إعلانات ضخمة في كل سنة. حسب خبرتي في حضور مؤتمرات الجيمز، معرض إي ثري نشوف فيه الاعلانات الضخمة والعروض الدعائية وغيرها، أما المعارض اللي بعدها، مثل جيمزكوم، فغالبًا نجرب الألعاب اللي تم الاعلان عنها في اي ثري.
لذلك، معرض إي ثري هو البداية، وهو اللي نشوف فيه الكشف الأول عن الألعاب. معرض إي ثري هالسنة بالذات احتمال يكون من أضخم الأحداث في السنوات الحالية. أقول هذا الكلام لهذي الأسباب:
- الأجهزة المنزلية الجديدة مر عليها فترة لا بأس بها، وصاروا المطورين -نوعًا ما- عرفوا كيف يتعاملون مع الأجهزة.
- كثير من اللاعبين يسمون الجيل هذا بجيل الريماستر أو الريميك -إعادة إصدار ألعاب سابقة بنسخ محسنة-، وشركات الألعاب الآن في موقف تحدي، فلازم يثبتون للناس عكس ذلك.
- الشركات الثلاث الكبرى، سوني ومايكروسوفت وننتيندو، كل واحد منهم في وضع صعب قدام جمهوره.
أعتقد النقطتين الأولى واضحة ولا تحتاج نقاش أكثر. أما بالنسبة الثالثة، فنقدر نتناقش فيها. مايكروسوفت، ولا يخفى على الكل، متأخرة عن بلايستيشن 4 من ناحية المبيعات، لذلك مايكروسوفت مجبورة انها تعلن عن أشياء جديدة على جهازها Xbox One بحيث تدفع جهازها للأمام وتنافس بشكل أقوى.
بالنسبة لننتيندو، فأعلنت ان لعبتها المنتظرة The Legend of Zelda ما راح تكون موجودة، وانهم يفضلون يقضون وقتهم في تطوير اللعبة، بدل ما يحطون وقتهم في تكوين ديمو استعراضي لمعرض اي ثري. أضف الى هذا ان تركيز ننتيندو هذي السنة بيكون على Wii U و 3DS. لذلك تقدر تقول بكل اطمئنان ان ننتيندو بتعلن عن ألعاب جديدة.
أخيرًا، سوني وما أدراك ما سوني. سوني الآن في وضع ممتاز الى درجة استثنائية. أي شركة تصنيع ألعاب في العالم تتمنى انها في وضع سوني الآن. لكن اللي أشوفه ان سوني الى الآن، باستثناء الأسطورة Bloodborne، ما شفنا منها ألعاب تثبت لنا اننا دخلنا الجيل الجديد. أغلب الألعاب كان عبارة عن استعراض تقني لقدرات بلايستيشن 4، مثل inFAMOUS و The Order.
لذلك، أعتقد اننا السنة هذي بنشوف مؤتمر ممتاز!
في هذي المقالة، ما راح نحط استفتاء. الخيارات كثيرة مره ونفضّل ان النقاش يكون مفتوح بحيث الكل يقدر يكتب تعليق ويقول لنا وش أكثر اعلان يبغى يشوفه، مع ذكر السبب. شاركونا آراءكم أيها الشجعان 🙂
بارعة
احمد خالد
