محمد الشريف
أعلنت يوبيسوفت قبل كم يوم وبشكل مفاجئ عن الجزء الرابع لسلسلة فار كراي، انصدموا اللاعبين بالخبر الرائع والكل متفائل بالاعلان الرهيب. توقعات اللاعبين عالية جداً تجاه هاللعبة، وهذا شي طبيعي بسبب نجاح الجزء الثالث، لكن وش اللي تحتاجه الآن فار كراي عشان تتجاوز الجزء اللي قبل وتعجب اللاعبين؟
أولاً، أعتقد ان فار كراي 4 قدامها تحدي كبير، عكس الجزء اللي قبل. فار كراي 3 نزلت وواضح عدم اهتمام يوبيسوفت فيها، والأوضح من هذا صدمة يوبيسوفت بعد ما صبّت كل اهتمامها على أساسينز كريد 3 وتجاهلت فار كراي 3 في 2012. نزلت فار كراي 3 في نهاية السنة، في فترة فقيرة من ناحية الألعاب، وحتى بعد انتهاء حفل توزيع الجوائر لمواقع الألعاب على الانترنت.
يوبيسوفت ما كانت تتوقع النجاح الباهر لفار كراي 3، ولكن كل هذا تغيّر الآن. توقّعت ان يوبيسوفت بتتخذ اتجاهها مع أساسينز كريد سلسلتها الناجحة، وتصير تنزّل جزء لفار كراي بشكل سنوي ولكن طلعت توقعاتي خاطئة. هذي أول علامات التفاؤل بالنسبة لي، لا زلت مصمم ان أي لعبة لازم تاخذ سنتين على الأقل تحت التطوير، الا في حالات نادرة.
فار كراي 3 كانت من الألعاب اللي استمتعت فيها في 2012، وفازت بجائزة أفضل لعبة في السنة لموقع سعودي جيمر. أعجبتني عناصر العالم المفتوح والمهمات اللي فيه، والعدو الرئيسي Vaas اللي نادراً نشوف مثله في ألعاب الفيديو، بالاضافة الى البيئات الجميلة وهذا شي نعترف فيه ليوبيسوفت في كل ألعابها، يوبيسوفت دائماً تقدم بيئات وعوالم مميزة تتميز بدقتها، ولنا في سلسلة أساسنز كريد أفضل مثال. لا زلت أذكر الدقة الرهيبه اللي شفتها في الجزء الأول من أساسنز كريد، خصوصاً واني مهتم بالتاريخ العربي.
كل هذي السوالف على جنب الآن، فار كراي 4 بتنزل نهاية السنة هذي، وأنظار اللاعبين تتجه على هاللعبة. لكن يبقى السؤال الرئيسي من هذا النقاش: وش اللي تحتاجه فار كراي 4 عشان تتجاوز مستوى فار كراي 3؟
بالنسبة لي، أعتقد ان فار كراي 4 بتتجاوز مستوى الجزء اللي قبل في حال قدروا يطبقون هالنقاط:
- اهتمام أكثر بطريقة اللعب (خصوصاً سرعة استجابة التحكم، وهذي مشكلة ألاحظها في كل لعبة من ألعاب يوبيسوفت).
- تقديم عدو رئيسي لا يقل روعة عن Vaas، وهذي أعتقد انها مهمة شبه مستحيلة.
- تحسين الأطوار التعاونية والتنافسية. طور القصة كان ممتاز في اللعبة، لكن الأطوار الثانية ما كانت بنفس المستوى.
النقطة الثانية ذكرت انها مهمة شبه مستحيلة، وهذا بسبب ان اللاعبين ارتفعت توقعاتهم الين ما وصلت الى مستوى عالي جداً. تذكرون نهاية الجزء الثاني من لعبة inFAMOUS، وكيف ان الناس قالوا عنها انها خايسه؟ النهاية ماهي خايسة، النهاية جيدة جداً، لكن توقعات اللاعبين ارتفعت الى مستوى مهول ما قدروا يوصلون له في الجزء الثاني. نفس الشي مع لعبة Uncharted 3، واللي قالوا عنها انها ماهي زينة. اللعبة كانت ممتازة ولا زلت أعتقد انها ممتازة، لكن مشكلتها انها جات بعد وحدة من أساطير الجيل الفائت، أنتشارتد 2.
هذا اللي أعتقده برأيي، باقي رأيك. وش اللي تحتاجه فار كراي 4 عشان تتجاوز مستوى الجزء اللي قبل؟
بارعة
