من فينا ما يستمتع في العاب العالم المفتوح (Open World Games)؟ تبي تعرف ليه هالنوع من الألعاب ممتع؟ فيه عدة اسباب مهمة؛ من أهم الاسباب انها تقريبا تجمع لك كل شي في عالم واحد، وراح تكتشف ان العالم المفتوح فيه حريه كبيرة لك من ناحية وسائل التنقل المختلفه، بيئه تتغير مع الوقت، مهام متنوعه وكثيرة، والبركة في عالم اللعبة الضخم. لكن رغم الاسباب اللي ذكرتها وغيرها؛ للأسف الكثير من العاب العالم المفتوح ما تكون بالمتعه المطلوبه وتكون مملة رغم عالمها المفتوح والحرية الموجوده باللعبة. مقالنا اليوم راح اذكر ثلاث أسباب أعتبرها من أهم العناصر اللي تخرج لنا لعبة عالم مفتوح رهيبة ومتكاملة قدر الإمكان.
عالم مفتوح مفعم بالحياة
يوم نجي للعبة عالم مفتوح كبيرة بالمساحه؛ نحتاج ناخذ وقت عشان المشواير اللي ناخذها باللعبة، وانت تروح من مهمة لمهمة ثانية ساعات تطفش وانت جالس تدق المشوار، ومن أهم الاسباب اللي تطفشك هي ان التفاعل اللي يصير بعالم اللعبة يكون شبه ميت، لكن شفنا العاب عرفت كيف تخلي عالم اللعبه مفعم بالحياة، ومن أهم الالعاب اللي ضبطت هالعنصر هي لعبة ريد ديد ريدمبشن (Red Dead Redemption)، لعبة العالم المفتوح بأسلوب رعاة البقر (Cowboy) من شركة التطوير الخبيره بعالم الالعاب المفتوح (Rockstar). عالم لعبة ريد ديد كان مفعم بالحياة وتحسه واقعي جدا، سواء من ناحية الاجواء اللي تتغير باللعبه، او الاصوات اللي حوالينك؛ سواء اصوات طلق نار او حيوانات او حتى صوت صرصور الليل. الأهم من هذا كله انك وانت جالس تتمشى بعالم اللعبه؛ تحصل حيوانات مختلفه وكثيره تحتاجها لبيع جلدها واعضائها، او عشان تصيد حيوانات جدا نادرة منها تعطيك مبلغ محترم اذا بعتها او انك تجمعها للتروفيز / الاتشيفمنت المطلوبه. غير انك وانت جالس تتمشى بحصانك تحصل عصابة تحاول تسرقك، او تلاقي شخص جالس يناديك يقولك فيه عصابة تحاول تقتل زوجتي تعال ساعدني، وغير المطلوبين للعداله وكل شخص له مبلغ وقدره في حالة انك مسكته بدون ما تقتله، وشغلات ثانيه كثيرة بهاللعبه الاسطوريه تخليك تحس بالعالم الحي.
تصميم بيئة اللعبة
هنا نجي لأغلب عيوب العاب العالم المفتوح، تصميم العالم ككل، أغلب العاب العالم المفتوح تكون بالزمن الحاضر، وأغلبها تكون بوحدة من مدن أمريكا، مثل سلسلة (Grand Theft Auto) او سلسلة (Saints Row) او لعبة (Watch Dogs) وغيرهم الكثير. العيوب بهالألعاب اللي ذكرتها انها تنحصر في مدينة او مديتنين وبعدها تحس بالتكرار في معالم عالم اللعبه اذا طولت وانت تلعبها، مع انها بالزمن الحالي؛ ولكن ما وُفِقت بجذب بعض الناس لعالمها. على عكس سلسلة العالم المفتوح (Assassin’s Creed)، اللي ميّزها عن باقي العاب العالم المفتوح؛ هي الازمان والاوقات اللي تكون بكل جزء، وكيف تشدك للحضارة القديمة وتاريخها، وكل هذا تقدمها لك بأفضل شكل ممكن يتناسق مع أسلوب لعبة عالم مفتوح. عندك مثلاً: الجزء الثاني من سلسلة (Assassins Creed)، باللعبه تقدر تستكشف أربع مدن تختلف أجوائها عن بعض اختلاف كبير و واضح، ومن المدن مدينة فلورينزي ومدينة فينيسا وغيرها الكثير. غير باقي اجزاء السلسله اللي كل واحد فيها يتميز بحقبة زمنية مختلفة ومدن كثيرة تختلف عن بعض، وقصص بعضها او اغلبها مستوحاة من الحقيقه.!
الغموض والاستكشاف
طبعا أغلبكم اذا جى طاري أحد العاب العالم المفتوح يجي في باله تلقائيا الاستكشاف، لأن اللعبه عالم مفتوح وفيها حرية كاملة، ومن حقك تستكشف الاماكن اللي ما وصلتها وتشوف كل مكان وش يخبي من أسرار، عشان يكون فيه فايدة من العالم المفتوح مو يكون بس مساحة كبيرة فاضيه. الحلو بموضوع الاستكشاف ان بعام (2009) طلعت لعبه بعالم الالعاب أسمها (Demon’s Souls)، اللعبه هذي اضافت على عنصر الاستكشاف عنصر الغموض، واللعبه كانت عباره عن عالم مفتوح مشبّك ببعضه بطريقة خلت هاللعبة تتميز بعالم الالعاب، وكل منطقه توصل لها ما تدري وش راح يواجهك من زعماء ومصيدات وأسلحه وشخصيات ممكن تساعدك والخ. راح تستكشف كل شي بنفسك؛ حتى اللعبه مافيها خريطه او شروحات بداخل اللعبه، كل اللي عليك انك تستكشف عالم اللعبه المتنوع واللي بكل منطقه تقريبا تحصّل بيئة متخلفة واعداء مختلفين واسلحة وأغراض مختلفه. بعد لعبة (Demon’s Souls) طلع جزئين بنفس فكرة اللعبه ونفس المطورين والخ، ولكن اللي تغير ان اسم الاجزاء
الجديده تغير لـ (Dark Souls)، وصارت متوفره لكل الاجهزه المنزليه بعكس اول جزء (Demon’s Souls) اللي كان حصري لجهاز PS3.
هنا نكون وصلنا لآخر المقالة، من وجهة نظري أعتبرها أهم الاسباب لصنع لعبة عالم مفتوح ممتعة ورهيبة. ممكن بعضكم يسأل عن أسباب اخرى مثل الجيم بلاي، انا اشوف ان الجيم بلاي هو أساس اي لعبه تنزل بعالم الالعاب، لو كان الجيم بلاي ضعيف؛ اللعبه تلقائياً راح تضعف مهما كان اي عنصر ثاني قوي. وأخيرا القصه ماهي شيء أساسي لصنع لعبة عالم مفتوح ممتعة، وشفنا العاب قصتها ما كان لها أي أهميه مثل (Dark Souls) وغيرها الكثير. اخبرنا رأيك بألعاب العالم المفتوح؟ ووش هي أهم العناصر اللي تحتاجها لعبة عالم مفتوح؟ عطنا رأيك بالتعليقات.
