محمد الدوسري
الجيل الحالي يعتبر جديد وما غلق سنه ونصف..والكثير مننا ينتظر العاب تبين مقدرة هالجيل من ناحية الرسومات او الاداء بالالعاب سواء انها تكون بأفضل شكل ممكن من ناحية الرسومات وسرعة الأطارات ومن ناحية تحمل الاجهزه للالعاب اللي متطلباتها عاليه..وفيه مننا الي وده يشوف السلاسل المفضلة له ترجع مع هالجيل بشكل افضل وروح جديدة تليق لجيل جديد..بالنسبة لي تماما مثلكم انتظر اشوف كل هالشغلات بالجيل الحالي..لكن لسبب ما كل ما شفت اجهزة الجيل الحالي يطري ببالي فريق التطوير Quantum Dream الي قدم لنا تحف فنية بعالم الالعاب مثل Fahrenheit و Heavy Rain و Beyond Two Souls..ممكن لان الفريق من افضل أفرقة التطوير عندي، وممكن لأن لحد الأن ما شفنا شي قوي من الفريق للجيل الحالي , لكن الي متأكد منه ان هالفريق مكانه المناسب هو هالجيل واقدر أجزم لكم ان ألعابه الجايه راح تكون تحف فنية..خلوني اذكر لكم الأسباب بهالمقالة..
الرسومات العالية هي لعبة الفريق!
صعبة جدا اذا جيت تذكر اكثر الالعاب عالية بالرسوم على مر الاجيال انك ما تذكر العاب فريق كوانتم دريم..ما زلت اشوف ان أفضل لعبتين من ناحية الرسومات بالجيل الماضي هم هيفي راين و بيوند..الفريق جدا يتفنن بأسلوب الرسم بالعابه ويحاول يصنع لك لعبه برسوم عالية وبأجواء مختلفة بعالم اللعبة وبتصاميم شخصيات اقرب للحقيقة..ممكن ساعات نقول ان الرسومات العالية ماهي كل شي..لكن بألعاب فريق التطوير كوانتم دريم الرسومات من اهم عوامل اللعبة لانها بالنهاية تحكي لك قصه أقرب للواقع وهنا نحتاج رسومات عالة قريبة للواقع عشان نندمج بعالم اللعبة..وبهالجيل الجديد من قدراته ومواصفاته راح نشوف رسومات عالية من الفريق ونتمنى انها تكون بأعلى دقة ممكنة.
تصاميم الشخصيات والاصوات بتكون أفضل للجيل الحالي!
مع كل جيل جديد ينزل تقريبا كل شي يتحسن..واكيد راح تتحسن المحركات والاجهزة راح تستحمل محركات قوية وافضل من الجيل الماضي بكثير..هنا يجي شغل فريق كوانتم دريم، الفريق تقريبا بكل لعبة جديدة يصدرها يصنع لها محرك خاص فيها!! وهذا شي نادر بعالم الالعاب خاصه اذا بتصنع محرك للعبة وحده بس..لكن بوقتنا الحالي وبالجيل الحالي فريق كوانتم دريم ممكن يصنع محرك ينافس باقي محركات الالعاب بالسوق بالراحة وحتى ممكن يطور محركهم الاخير ويضيفون عليه كم شغلة ما كان يستحملها الجيل الماضي وهنا بيكون نقلة نوعية لفريق يبين القوة الكاملة للجهاز الي تنزل عليه اللعبة..مع تطور المحركات والتقنية بشكل عام راح نشوف تصاميم شخصيات بشكل افضل واقرب للواقع..وتمثيل صوتي يضاهي افلام هوليوود وغيرها..لاننا نتكلم عن فريق من ناحية الجودة بشكل عام للمنتج يعتبر من الافضل بتطوير الالعاب.
الأخراج بعالم الالعاب بينتقل لمرحله عاليه!
الجيل الماضي كان من اجمل الاجيال من ناحية الاخراج باللعبه..شفنا العاب مثل Last Of Us و Metal Gear Solid 4 و Alan Wake وغيرها الكثير..وأكيد العاب فريق كوانتم دريم كانت من اجمل الالعاب بالاخراج من جميع النواحي..في هالجيل متأكد تماما ان فيه العاب كثيرة راح تهتم بالاخراج اكثر من قبل , ومتأكد بنفس الوقت ان فريق كوانتم دريم راح ينقل الاخراج بعالم الالعاب لمرحلة نقدر نقول انها “جيل جديد” .. الفريق جدا خبرته كبيره بعالم الالعاب، علاقته مع ممثلين ومخريجن هوليوود جدا قوية، وفوق هذا كله يطور محركاته بنفسه وهنا نقدر نفول اننا بنشوف الاخراج باللعبة الجايه بشكل جدا فاخر ويليق بجيل جديد من فريق يشوف الاخراج بالالعاب ما يقل عن اي عامل ثاني!
هنا نوصل لنهاية مقالتنا..هذي الاسباب الي تخليني جدا متحمس للعبة الجايه من فريق كوانتم دريم..الفريق صرح بشهر مارش 2013 انه جالس يشتغل بشكل كامل للعبة جديده لجهاز البلايستيشن 4..اتمنى انها تكون فد التوقعات الصراحه..وش رائيك عزيزي القارئ وهل فيه فريق تنتظر تشوف لعبته للجيل الحالي..ياليت نشوف ردك تحت بالتعليقات :).
بارعة
احمد خالد
أيمن اليغشي