أخبار

تغش في تايتنفول؟ اللعبة بتصير تلعّبك مع الغشاشين

titanfallcoverphoto

في خبر طريف ورهيب للعبة تايتنفول، أعلنت ريسبون إنترتينمت (Respawn Entertainment) عن نيّتها لمعاقبة اللاعبين الغشاشين اللي يغشون في اللعبة على نسخة البي سي. مدري هل تعرف هذا الشي أو لا، لكن البي سي ينتشر فيه الغش والتهكير أكثر من أي منصّة ألعاب ثانية.

ريسبون بدأت تجمع المعلومات وتحدد اللاعبين الغشاشين من بعد اطلاق اللعبة، وبدأت اليوم في معاقبة الغشاشين. مدري ليه جا في بالي صورة ريسبون على شكل مدرّس مستقعد، والغشاشين على شكل طلاب كسلانين جالسين في نهاية الفصل منزّلين روسهم وبالعين العافية.

في موقع اللعبة الرسمي، أعلنت ريسبون عن هذا الاعلان، ووضحت ان اللاعب اذا انطرد كثير فهذا معناته انه غشاش، ولازم يعاقبونه ويصير يلعب مع الغشاشين. أما بالنسبة اذا كان فيه بارتي (مجموعة أصدقاء يلعبون مع بعض) وكان فيهم واحد غشاش، فراح يتم معاملة البارتي كله على انه مجموعة غشاشين. متى ما تخلصوا من الغشاش خويّهم فراح يرجعون يلعبون بشكل طبيعي مع الناس اللي ماهم غشاشين.

رهيب الخبر، ولا؟ ذكرني بلعبة Gamedev Story، لعبة الجوال اللي فكرتها انك تطوّر لعبة فيديو، واذا كنت منزّل اللعبة هذي بطريقة غير قانونية، فراح تلاحظ ان في اللعبة فيه ناس يهكرون عليك لعبتك وينزلونها ببلاش وتسبب لك خساير، تماماً مثل ما أنت جالس تسوي في أصحاب اللعبة في الصدق 🙂

وش أرهب عقوبة شفتها من هذا النوع؟

المصدر

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق