في البداية احب أوضح الموضوع هذا مخصص للاعبين الجدد على سلسلة Souls. لكن اذا انت خبير بالسلسلة ياريت تساعدنا بأثراء الموضوع وتعطينا رايك ونصايحك بالتعليقات و مشكور مقدماً. و الأمر الآخر الموضوع راح يكون أهم النقاط الأساسية الي تحتاج تعرفها قبل لا تبدأ تدرعم باللعبة، بما اني لعبت الى حد أعتقد انه كافي اني أعطي بعض النقاط اللي بتفيدك في اللعبة.

أهم شي حط في بالك اللعبة حالها حال أي لعبة ثانية ومافي شي صعب اذا انت لاعب ممتاز تتبع التعليمات. اللعبة معتمدة على التخطيط، و مهاراتك القتالية، و الصبر ثم الصبر ثم الصبر وعدم الطمع و الاستعجال.

الموت

اذا انت جديد على سلسلة سولز، فأحب ابشرك (أنشهد انك راح تموت واجد) وهذا امر جدا طبيعي ولا تزعل، اصلا بأول موتة راح يعطونك Trophy/Achievement بعنوان “هذا هو دارك سولز” كنوع من الترحيب. و كل ما تموت زيادة تزيد خبرتك زيادة بعالم اللعبة، وتأكد انك ما مت الا لان الخطأ عليك 100% لان اللعبة جدا عادلة وتعتمد على دقة حركاتك وقراراتك. و أهم شي في بداية اللعبة بأول منطقة حاول لاتفوت التدريب الي على اليسار و اليمين في يجيك زي الضباب الأبيض ادخله يعلمك التحكم.

مشب النار

مشب النار او الـBonfire هذا الشي الوحيد اللي راح يستر عليك باللعبة. احرص دائماً اذا شفته على طول تروحله وتجلس فيه طبعا اول شي اضغط عليه حتى لو جمبه عدو صعب، لانه اول ما تجلس فية يحميك ويزيد طاقتك ويصلح اسلحتك ودروعك، وبامكانك التنقل بين المناطق، لكن حط في بالك اذا رحت لمشب النار راح كل شي يرجع مكانه حتى الأعداء الي ذبحتهم باستثناء الزعماء.

أنشبلهم كلهم

في خلال فترة لعبك راح تقابل ناس واجد حاول ما تمشي منهم الا وانت ناشبلهم وتسولف معهم talk اقل شي اربع مرات وانتظر نهاية كلامهم لأن في الغالب تظهر قائمة تحتاجها او طلب معين تسويه وينفتحلك شي مهم. بعضهم يعطونك مفاتيح وبعضهم يبيعون لك، لكن حط في بالك بعضهم فترة معينة ويروحون لمنطقة ثانية او يختفون وبالصدفة تقابلهم.

حافظ على أرواحك

طبعاً اهم عنصر ضروري باللعبة هو الـSouls الأرواح الي تجمعها هي عملتك باللعبة وكل ما تموت يروحون منك وعندك فرصة وحيدة ترجعها من مكان ما مت لكن اذا مت قبلها تروح عليك، من خلالها تشتري و تطور أسلحتك، واهم شي هي الي تسمح لك باـLevel up تطور مستوى شخصيتك. وحاول دائماً ماتشيل ارواح كثيرة ومن الذكاء تشتري فيهم او تطور نفسك عشان احسن ما يضيعون عليك. وراح تحصل ارواح على شكل عبوات مثلا من الزعماء انتبه تكسرهم في مكان عام احرص تكسرهم وقت التلفيل او الشراء بس.

مكان التلفيل او تطوير شخصيتك

هذي احد الأمور الغير واضحة باللعبة، مكان التلفيل غير واضح و هو في مكان واحد بس في منطقة اسمها Majula  ثاني منطقة بعد البداية يظهر فيها شمس وفيها ناس احياء. جمب مشب النار Bonfire في بنت لابسة عباية خضرا كلمها و انتظر نهاية كلامها راح يطلعلك قائمة أول كلمة تدخل وتلفل الشي الي انت تبيه على حسب شخصيتك، و الأمر الأخر اذا عندك Estus Shards ثاني كلمة تبادل معها تعطيك Estus Flasks عبارة عن شي يزيد طاقتك و يتعبأ في كل مرة تروح فيها لأي مشب نار. واحرص على الاقل 20% من نقاط تلفيلك يكون تركيزهم على تطوير الطاقة، الStamina و الstrength.

اختيار وبناء الشخصية

بأول بداية اللعبة راح يطلب منك تصمم شكل شخصيتك وتختار وش تبي تكون سواء كان مقاتل، فارس، او شخصيات تتعامل بالقوى الخارقة وغيرهم. هنا  تعتمد على ميولك كلاعب وش تحب و وش تفضل. لان كذا ولا كذا خلال لعبك بعدين انت راح تحدد توجه شخصيتك والبداية مجرد زي دافع بسيط تبدأ فية.

لخبطت بتطوير شخصيتك و وصلت مرحلة جدا صعبة؟

لاتشيل هم ترجع لأول مكان بالبداية أول عجوز كلمتها، تجي عندها و تسولف لأخر شي. بعدها راح تسمحلك تصفر عداد نقاطك وتعيد بنائها مرة ثانية عن طريق مبادلتها بال Soul Vessel وحط في بالك راح تحصلها بس عدة مرات وجدا نادرة.

احرق ياحبيبي احرق

عند مشب النار في خيار حرق، في عدة اشياء تحرقهم وتحدد مصير اللعبة يا انها تزيد الصعوبة او تخليها سهلة. وفي عدة مزايا، لكن أهم المزايا، لما تحرق الBonfire Ascetic راح تسمحلك تعيد الزعماء اللي ذبحتهم وحتا تسمحلك ترجع تاخذ الكنوز اللي اخذتها من قبل ومضاعفة ادواتك و الارواح.

خلك سريع بالسلالم

لما تصعد السلالم وخصوصا لما تنحاش من مجموعة كبيرة من الأعداء خلك ضاغط دائرة بيد البلايستيشن او B بيد الأكسبوكس (طبعا بأول بداية اللعبة يطلب منك تختار زر القفز مثلا دائرة او L3 و الأفضل دائرة) راح تصعد بسرعة وتهرب بسلام او تضغط الزر مرتين ورا بعض يحذف نفسة بسرعة من السلم.

طور دروعك و اسلحتك

في منطقة ماجولا جمب مشب النار في بيت حيل قريب منه، تلاقي في رجال زعلان جالس جنبة و الباب مقفل، هذا الBlacksmith جدا مهم باللعبة يطور دروعك و اسلحتك ويخليك تضرب اقوى. المفتاح تحصلة عند ثاني مشب نار في منطقة The Forest of Fallen Giants تلاقي على يسارها رجال يبيع اغراض، تحصل المفتاح يبيعة بألف روح.

شيك على الاشياء الجديدة دائماً

خلال تقدمك باللعب دائماً ارجع و شيك بمنطقة ماجولا عند اللي يبيعون بتلاقي اغراض جديدة و قوية. لدرجة راح تلاقي أسلحة جدا قوية وحيل بتنفعك.

أهمية قوتك الجسمانية باللعبة

في بار تحت بار الطاقة بالضبط، هذا بار الStamina عنصر مهم جداً باللعبة، هو من خلاله راح يسمحلك تهجم، تراوغ، تركض، تصد الضربات. لكن انتبة علية دائما و حاول تتدرب على تكتيك معين وعينك دايم علية لانة ينقص بسرعة وقت تفاعلك و يزيد ببطئ. حاول تهتملة وتطورة لما تلفل، ثاني مكان تحت القوة بالتلفيل.

الأعداء

مهما كنت قوي باللعبة لا تستهين ابدا بالأعداء العاديين يقدرون يذبحونك بسهولة. حاول دائماً تتجنب قتال المجموعات، وابدأ بتكتيك تسحيبهم واحد ورا الثاني وخلص عليهم. وكل عدو ادرس تصرفاته و نوع قتالة عدل وخلك صبور بالقتال، بعدها ابدأ الهجوم ولا تنسى تضغط R3 يقفل ويركز علية علشان تضمن ضرباتك علية، خصوصا اذا بترمي أسهم أو قنابل.

لا تضيق على نفسك

في عنصر مهم باللعبة و هو الموازنة ويعتمد على تكتيكك، مش دائماُ الأسلحة الأعلى قوة أو الدرع الأقوى هو الأفضل، في عنصر مهم هو الوزن الي انت شايله، كل ما زاد وزنك كل ما صارت حركتك ثقيلة وتسهل على الاعداء انهم يذبحونك، كل شي تركبة على لاعبك له وزن. حاول توازن الأمور وخلك معتدل الوزن.

الزعماء الأسطوريين

لكل زعيم باللعبة استراتيجية تقدر تقتله بكل سهولة مثالاً بالمراوغة و عمل target عليه، تخفيف الدروع بحيث تهرب وتعبي طاقة، تحمل السيف بيديك الاثنين، او الاسلوب الكلاسيكي يد سيف و يد درع، و فيهم بعضهم لازم تعزز نفسك بقنابل وهذا نادر، و اهم شي اكتشاف الفرصه الي تكون فيها الضربه القاضية للعدو بالعادة ياخذ وقت عشان يرجع لوضعه انت استعد عبي طاقة و stamina.

لما تموت زيادة

لاعبك بشري، كل ما يموت زيادة يصير Hollow جزء من العالم الundead وكل ما تموت اكثر تنقص قواك لين حد 50% و الأمر هذا جدا طبيعي باللعبة وفي شي جدا نادر اول عنصر تاخذه بالبداية من العجوز اسمة Human Effigy اول ماتحصله منها بنفس المكان اصعد الدور الثاني في صندوق تفتحة تحصل واحد ثاني، هذا لما تستخدمة يردك بشري ويرد كامل قوتك. لكن خلك ذكي وحكيم بأستخدامه ولا تستعجل. اذا صرت هولو استفيد من هل شي وخلك مخربها ودرعم وابحث عن كنوز و استكشف، ومتى ما خلاص تمكنت ولفلت واحتجت ترجع كامل قواك هنا استخدمها. والامر الاخر الهيومن رفجي استخدمها قبل الزعماء تسمحلك تحضر فارس او فارسة تفزع معك.

تصنيفات الأسلحة و استعمالها

في كل سلاح تاخذة في معلومات عليه وتصنف جودته وهي تبدأ من الأفضل E-D-C-B-A-S الى الاسوأ. وحط في بالك في أسلحة اول ماتاخذها بيعطيك تنبية كتابي، هذا يعني انك ما راح تقدر تستخدمه على انك تقدر تشيله وتضرب فية بس جدا راح يكون ضعيف بسبب انه مو مطور شخصيتك كفاية او مو ميول تطويرك، افتح السلاح وناظر معلوماته واضغط Select وشف اللي لونه أحمر وش يبي بضبط ومتطلب تطوره علشان يمديك تستعمله.

أهمية الملاحظات

في تنبيهين مهمين باللعبة كل الشكر طبعاً للاعبين في دارك سولز يكتبون ملاحظات على الارض حاول تقراها بعضها تنبيهات من افخاخ او عدو مندس يتغافلك او حتى يعلمك مكان كنوز و اسرار. والأمر الأخر بقع الدم حاول تشوفها في بعض الأماكن توريك اخر 10 ثواني قبل لا يموت اللاعب الي قبلك بهذا المكان وحاول تفهم وتجنب طريقة موتته.

هذي أهم النقاط الأساسية الي تحتاج تعرفها باللعبة، و الباقي عليك تستكشفه وتكمل فيه. في منطقة The Forest of Fallen Giants بعد المشب النار الأول لما تكمل شوي بتلاقي ساحة صغيرة بوسطها شجرة وفي فارس مدرع متكي عليه، اهجم عليه واذبحه يعطيك سيف قوي فية ميزة كهربا ينفعك حيل. وبنفس المنطقة بعد مشب النار الثاني استكشف المنطقة بتحصل سيف نار و خاتم رهيب. عامةً في كل مكان باللعبة في كنوز و اسلحة رهيبة عليك تستكشفها. هذا ملخص اهم الأساسيات.

اتمنى اكون أفدتكم وسامحونا على القصور، واتمنى من ذوي الخبرة يعطونا بعد النصايح و الأرشادات بالتعليقات، وساهموا معنا بأثراء الموضوع. شكرا لكم.