كل لاعب عندة سلسلة مفضلة، ومهما نزل مستواها تضل اللعبة المفضلة عنده. بس احيانا فيه العاب ينزل مستواها لدرجة أنك تتمنى أن السلسلة تتوقف بسبب المستوى السيء اللي وصلت له، واللي ناوي اتكلم عنه بهذا المقال هو لعبة صار يتكرر اسمها كثير، لعبة موب راضية تتعلم من اخطائها السابقة.
ريزدنت ايفل سلسلة معروفة من زمان، مستواها واصل لمرحلة حتى صارت شيء اسطوري بوقتها، من بعد الجزء الرابع بدأ مستواها بالنزول حتى صارت مضرب مثل بالفشل. اتمنى ترجع السلسلة لمكانتها. وهذي أهم الاشياء اللي اتمنى كابكوم تسويها بالجزء الجديد.
اعادة صنع السلسلة
اعتقد ان هذا هو الوقت المناسب لريبوت لسلسلة، بشخصيات جديدة وعالم جديد، بأسلوب افضل وشخصيات تخاف من المجهول، وعالم مانعرف وش قاعد يصير فيه. نحتاج شيء زي كذا، ريزدنت ايفل الحالية ماراح تنجح اذا استمرت على حالها، لازم تبدأ من جديد مثل ماصار مع تومب رايدر. بشرط ماتقع بنفس الخطأ لازم تحافظ على مفهوم ريزدنت ايفل من الجزء الأول الى الرابع، ويكون الاستديو الاساسي هو المسؤول عن اللعبة. مو قادر اتخيل كيف بتكون اللعبة لو اعطوها لأستديو نينجا ثيوري (المسؤول عن DMC الاخيرة)
كفاية تركيز على الأطوار التعاونية (Co-op)
اللعبة صارت عبارة عن CO-OP الزامي غصب يكون معك شخصية اضافية حتى لو تلعب لحالك، بدأت هذي الحركة مع الجزء الخامس وأستمر معها للجزء السادس، اسلوب اللعب هذا ما يناسب اللعبة ابداً فأتمنى انهم يشيلونه من السلسلة نهائيا. لو كان بشكل يناسب القصة وأحداثها ومايؤثر على جوهر اللعبة مثل جزء Resident Evil Zero ماعندي مشكلة، لكن السبب ربحي بحت، موب لأجل القصة كله علشان تكون لعبة تعاونية عن طريق الأونلاين، وهذا أثر على اللعبة بشكل سلبي.
كفاية محاولة اقناع اللاعبين بالأسلوب الجديد للسلسة
ماراح يرضى اللاعبين بهذا الاسلوب ابداً، اللي قاعدين يسوونه انهم يخسرون عشاق السلسلة وبنفس الوقت يفشلون بكسب جمهور جديد.
كفاية تأثّر بأفلام ريزدنت ايفل
اللعبة تأثرت بشكل كبير من افلام ريزدنت ايفل الهوليودية، تأثرت بشكل سلبي لدرجة افقدها هويتها. كابكوم لازم تعيد للعبة هويتها وتعيد لسلسلة اسمها وتسترجع حقوق استخدام اسم السلسلة لهذي الافلام لأنها تسيء لسلسلة بشكل كبير.
انهاء القصة الحالية بشكل نهائي
القصة الحالية للسلسلة وصلت لمرحلة انها قلبت لعبة حربية، جيوش ورؤساء دول ومؤامرات. كأنها باتلفيلد بس بدل الجنود زومبيز أو بالاصح كأنها جيرز اوف وور. هذي ابدا مو ريزدنت ايفل، لازم كابكوم تتنهي القصة الحالية بشكل يليق بتاريخ السلسة ويحافظ على كرامتها الباقية. لو تنهيها كابكوم بفلم CG بشكل محترم أنا راضي.
فاهم اللي قاعدين تسوونه ياكابكوم
كابكوم عارفة أنها ماراح تقدر ترجع السلسة مثل ماكانت بوضعها الحالي بسبب الأحداث اللي صارت جوا اللعبة، عشان كذا حاولت ترضي كل الاطراف برزدنت ايفل 6 لكنها فشلت. حتى المبيعات كانت اقل بكثير من المتوقع.
تخيل معي عزيزي القارئ لو أن The last of us كانت تحت اسم uncharted ؟ بتصير شيء غريب وغير مناسب صح؟ هذي اللي سوته كابكوم.
حاولت تبني مفهوم جديد للعبة مايناسبها هذا المفهوم. استمتعت بلعبة ريزدنت ايفل 6 وكانت جميلة من نواحي كثيرة، ماعدا انها كانت مفقعة شوي، لكنها كانت جيدة. اذا كابكوم عندها رغبة بتطوير لعبة بهذا المفهوم على الأقل تسوي لعبة جديدة بأسم جديد بشخصيات جديدة، بتنجح اللعبة، لأن سبب فشل الجزء السادس هو اسمه مايصلح تطلق مثلا لعبة GTA عبارة عن لعبة سباق سيارات زي فورزا. ماتجي كل لعبة لها اسمها ولها مفهومها. اتمنى ان المفهوم اللي بالجزء السادس يطبق بلعبة جديدة. بأكون جداً مبسوط.
وغيرها من الأمنيات، نقول أن شاء الله أن معاناة ريزدنت ايفل تنتهي، اتمنى ترجع مثل ماكانت ويصير نتكلم عن نجاحها من جديد. ونبطل نضرب فيها المثل، اغلب الاستديوهات اليابانية بدأت ترجع للطريق الصحيح والحين جاء دور كابكوم.
طلعت إشاعات بأن كابكوم راح تعلن عن الجزء الجديد بـE3 مع اني احس انه شيء مستبعد لأنه غالباً بتعلن عنها بشكل رسمي بمعرض طوكيو للألعاب، كابكوم ماتحب تعلن عن لعبة بطريقة تقليدية، ففمكن تعلن عنها بطريقة مشابهه للجزء السادس.
قرب E3، وكل يوم يزداد الحماس، اشياء كثيرة مخبيتها الشركات، راح نشوف بداية الجيل الحقيقية بعد كم اسبوع. جداً متفائل ومتحمس للمعرض.
وش امنياتك للجزء السابع؟ واذا مو مهتم بريزدنت ايفل شاركنا باللي تتمناه يصير لألعابك المفضلة في E3.
