“ثيف”، أو الحرامي، من أكثر الألعاب اللي استمتعنا بتجربتها في معرض E3.
ما كان عندي اهتمام كبير في اللعبة. مسك مشهور اليد وقام يلعب وأنا أتفرج وأسأل واحد من مطورين اللعبة. أول شي قلته له: لعبتكم تشبه لعبة Dishonored بشكل كبير، وهذي الألعاب أحبها مرة. رد علي وهو مبسوط وقال ان الغالبية الساحقة من الناس قالت له ان اللعبة تشبه Dishonored.
اللعبة لعبة تخفّي طبعاً، وحسب اللي شفناه وجربناه اللعبة أسلوبها مشابه لـ Deus Ex وDishonored بحيث عندك الامكانية انك توصل للهدف بأكثر من طريق. أكّد المطوّر على هالكلام وقال انه من أكثر الأشياء اللي مركزين عليها في اللعبة ان اللاعب يكون عنده الخيار انه يوصل للهدف من خلال عّدة طرق.
من الأشياء الغريبة اللي لاحظناها ان اللاعب ما عنده الا سلاحين فقط، سلاح أشبه بالحديدة تستخدمها للمضاربات اليدوية والقتال عن قرب، وسلاح أسهم تستخدمه لطلق الأسهم (مع وجود عدة انواع من الأسهم). هل بيكون هذا شي سلبي للعبة؟ بالنسبة لي لا، لكن أتوقع الكثير بيعتبرونها مشكلة، لأن أغلب اللاعبين يحبون التنويع بالأسلحة، حتى لو كان الفرق مجرد صوت وشكل فقط.
طريقة القتال منسوخة نسخ من Dishonored. تقدر توجّه ضربات للأعداء وهم يصدونها، وبعدها يهاجمونك وأنت تحاول تصد الضربات بحيث تسوي Stagger وهي أشبه بـ “تدويخ العدو” وتخليه يترنّح وتوجّه له بعدها الضربة القاضية.
من الأشياء المهمّة اللي سألتها للمطور هو عمر اللعبة. جاوبني وقال انهم حددوا عدد معيّن من الساعات بحيث يكون كافي للاعب. ما قالي كم العدد، ولكني بعدها قلت له ان من أهم عيوب Dishonored انها قصيرة ووافقني على كلامي بشدة وقالي ان Thief راح تتفادى هذي المشكلة بكل تأكيد.
من اللي بتعجبه اللعبة؟ أي واحد يحب ألعاب التخفّي، مثلي. أي لاعب أعجبته Dishonored وDeus Ex وغيرها من ألعاب التحفّي أتوقع بتعجبه هذي.
أخيراً، بتنزل اللعبة على PS4, Xbox One وPC. سألنا المطوّر عن موعد نزول اللعبة وقالنا انها بتنزل في 2014. ماحددوا التاريخ بشكل مضبوط، وهذا معناته ان اللعبة لا زالت تحت التطوير، ولا أظنها بتنزل قريب على الاطلاق.
