الجزء الثالث من سلسلة ويتشر، من أكثر الألعاب اللي يتطلعون لها لاعبي الآر بي جي الغربي. حضرنا اليوم لقاء صحفي عن اللعبة، وشفنا فيه أول عرض لطريقة اللعب في اللعبة بشكل مطوّل.
بدأ اللقاء الصحفي بمعلومات أساسية عن سلسلة ويتشر، تكلم المقدم عن بداية قصة Geralt بطل السلسلة، وكمّل باقي النبذة القصيرة والسريعة. انتقل الكلام بعدها الى الجزء الثالث وبدأ معها أول عرض من داخل اللعبة.
أول شي لاحظته هو تعديل الـlip sync أو “تطابق حركات الشفاة مع الكلام” بشكل كبير، وهذي كانت مشكلة واضحة في الأجزاء السابقة لويتشر.
عرضوا لنا بعد كذا جزء من مراحل اللعبة الكبيرة، وقال المطور ان هذا الجزء لحاله من المدينة أكبر من جميع بيئات الجزء الثاني لويتشر 2! بيئات واسعة بتفاصيل خرافية، وسط موسيقى هادية تماماً مثل ما تعودنا من الأجزاء اللي قبل للسلسلة. ( للأسف مافيه فيديو لها وقت كتابة هالموضوع نقدر ننشره).
طريقة اختيار القرارات في المشاهد هي نفسها ما تغير فيها شي كبير، لكن اللي لاحظته ان تسجيل الصوت تحسّن بشكل كبير برضو، وهذي كانت مشكلة كبيرة في الجزء الثاني لويتشر. كثير من المرات ألاحظ ان صوت الموسيقى في الخلفية أعلى من صوت اللي يتكلمون، وهذي طبعاً مشكلة كبيرة.
ويتشر 3 والعالم المفتوح
ذكر المقدم ان أكثر عنصر مركزين عليه فريق التطوير في الجزء الثالث هو القصة، والعالم المفتوح هو ثاني شي في اهتمامهم. من هذي الجملة اللي قالها المطوّر حسيته عارف وواعي مشكلة كبيرة في ألعاب العالم المفتوح، وهي ان غالباً القصص فيها تكون اما ضعيفة أو ركيكة. وهذا شي طبيعي بما ان اللاعب احتمال كبير انه ينسى المهمات الرئيسية وأحداثها بسبب المهمات الجانبية.
وعلى طاري المهمات الجانبية، ذكر المقدم مشكلة كبيرة في ألعاب العالم المفتوح وهي ان المهمات الفرعية غالباً تكون مفصولة تماماً عن المهمات الرئيسية، وهذا شي سلبي لان اللاعب مضطر انه يروح لمكان ثاني في اللعبة عشان يسوّي مهمات فرعية. الآن في ويتشر 3، المهمات الجانبية تطلع من المهمات الرئيسية! بمعنى انك اذا انهيت جزء معين من مهمة رئيسية عند شخص معين على طول بعدها بيطلب منك شي، هذا الشي احتمال يتطور ويصير مهمة فرعية كاملة لحالها لها أحداثها اللي تختلف عن باقي المهمات الرئيسية.
وبما ان اللعبة عالم مفتوح، قرروا مطوري اللعبة انهم يسوون حركات واقعية، مثال بسيط: أسعار السمك تكون رخيصة في المدن الساحلية، وتكون أغلى في المدن البعيدة عن الساحل، تماماً مثل الحياة الحقيقية. حركة جيّدة لا بأس فيها ولكن هل بتضيف شي كبير للتجربة؟ شخصياً ما أتوقع.
من الأشياء الرهيبة اللي لاحظتها برضو عودة الـMeditation “التأمّل” في الجزء الثالث. اللي لعب الجزء الأول لويتشر “أظنهم قليلين مرة” يذكرون ان فيه نار توقف عندها، ومن خلالها تقدر تطوّر الشخصية وتمشّي الوقت وتخلي البطل يرتاح وترجع قوته الطبيعية. هذي الميزة شالوها في الجزء الثاني، والحين رجعت من جديد بشكل مشابه للجزء الأول، مع شوية أنميشنز رهيبة تشوفها في خلفية اللعبة.
هل انحلّت كل المشاكل للي شفناها في الجزء الثاني؟
شخصياً، من أكبر المشاكل اللي كنت أعاني منها في الجزء الثاني لويتشر كانت القتال. القتال كان جميل من ناحية الشكل والاستعراض، ولكن كل لاعب لعب الجزء الثاني لا شك انه لاحظ ان نظام القتال فيه مشاكل كثيرة، مثلاً في بعض الأحيان تضرب العدو ولكن الضربات ما تنحسب على ان الضربة جات فيه. للأسف، هذي المشكلة شفتها واضحة في الجزء الثالث.
أخيراً، ذكر المقدم بعض الميزات اللي أعتقد انها عادية في اللعبة، مثل كثرة الوحوش في اللعبة “أكثر من 80 وحش”، وان الوحوش في الليلة تصير أقوى. باقي الأشياء اللي شفناها تقريباً كلها أشياء متعارف عليها في السلسلة، مثل استعراض القدرات الخاصة لويتشر.
اللقاء كان ممتاز جداً، خصوصاً اني أول مرة أشوف طريقة لعب لويتشر 3، من أكثر الألعاب اللي أنتظرها. اللعبة بتنزل في 2014 على PS4، Xbox One, و PC.
