E3 2014أحداث

لقاءنا الصحفي مع مطوّري The Witcher (تغطية معرض E3 2014)

thewitcher3coverpice3

من أكثر الألعاب اللي متحمس لها على الاطلاق، الجزء الثاني من ذا ويتشر كان من أكثر الألعاب اللي خلصتها وعدتها في الجيل اللي راح. ختمت ذا ويتشر 2 حوالي خمس مرات، تقدر تقول اني أدمنت عليها فوق المعقول.

يبدأ الديمو اللي عرضوه لنا بعد العرض الخرافي حق E3، يدخل فيه جرالت أوف ريفيا الى أكبر مدينة في اللعبة، وهو المكان المناسب لاستعراض اللعبة وفرد عضلاتها.

البلدة كانت كبيرة وفي نفس الوقت حيّة، تحس بالحياة في البلدة على انها ضخمة. تشوف اللي طالع عند الباب يسولف مع ولد الجيران، والأطفال اللي طالعين يلعبون مع أخوياهم ويطاردون بعضهم في الشوارع، واللي يسقي الزرع والشجر في البلدة، والفقير اللي يشحت من الناس، وغيرهم من عناصر الحياة الواقعية.

بعد الاستعراض الجميل لعالم اللعبة الواقعي والحي، شفنا عرض انتهى بمهمة. العروض اللي شفتها كانت مثيرة للاهتمام على انها طويلة، كنت أحسب اني من القليلين اللي يحبون هذا الشي ويشعرون فيه، لكني التفت في وسط المشاهد ولاحظت ان كل الحاضرين مهتمين بالعروض اللي تصير قدامهم.

انتهى العرض بمهمة، وذكر المطوّر اللي يقدم الديمو ان فيه مهمات جانبية تاخذها وتسويها احتمال تخرب عليك مهمات ثانية، لذلك اللاعب لازم يكون منتبه وواعي في اختيار المهمات.

مثل أي لعبة عالم مفتوح، فيه Fast Travel (انتقال سريع من منطقة الى منطقة ثانية)، وفي هاللعبة تقدر تسوي الفاست الترافيل عن طريق اللوحات الموجودة على الطريق. لو كنت طالع برا المدينة ولقيت مفرق طرق فيه لوحة معلقين عليها اتجاهات المدن، تقدر تشغل الفاست ترافيل من هناك.

طلعنا برا المدينة بما ان المهمة كانت تطلب هذا الشي، وبدأ استعراض القتال. أول شي لاحظته هو السرعة في القتال، جيرالت صارت حركاته سريعة، بالاضافة الى ان الحركات صارت كثيرة. من زمان الضربات كانت محدودة ومتكررة، أما الآن فعندك ضربات كثيرة تستخدمها.

غير كذا عندك القدرات السحرية تستخدمها في القتال، واحد من الوحوش اضطر جيرالت يستخدم عليه قدرة سحرية تخليه يطلق نار، بعدها راح وكمل ضرباته الين ما واجه نهايته المتوقعة.

اللي لعب أجزاء ويتشر اللي قبل يعرف ان الموسيقى التصويرية في اللعبة هي من أفضل الأشياء في فيها، وهالجزء ما يختلف أبداً عن الأجزاء اللي قبل. الموسيقى كانت رائعة في كل أنحاء اللعبة، سواءً الموسيقى اللي وسط المدينة، او اللي وسط المشاهد، أو اللي تشتغل مع القتال.

لاحظت مشكلتين في اللعبة، الأول هو ان القتال لا زال “ماهو مضبوط”، كثير من المرات أشوف جيرالت يضرب الهوا بدل ما يضرب العدو، وهذي مشكلة موجودة في الجزء الثاني وكانت مزعجة. يحتاجون يحطون Lock-on (وهو زر تضغطه بحيث يصير تركيز الضربات على عدو واحد فقط)

المشكلة الثانية استغربت منها وهي ان اللعبة بشكل عام تختلف عن العروض اللي انعرضت للناس، الرسومات كانت أقل بكثير من العرض اللي عرضوه في E3. هذي مشكلة تعاني منها معظم الألعاب، لكن هالمرة لاحظتها في ذا ويتشر، أكثر من غيرها.

أخيراً، الجزء هذا بيكون فيه سباحة. هذا شي جديد على السلسلة. أتمنى انهم يضبطون السباحة، لاني ما قد عرفت لعبة ضبطت السباحة على الاطلاق!

بتنزل ذا ويتشر في 24-2-2015 على بلاي ستيشن 4، اكس بوكس ون، بي سي.

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق