محمد الشريف
تناقشنا عن بعض التحسينات اللي نبغى نشوفها في الموسم الثاني لذا ووكينج ديد (The Walking Dead)، ولكن أكثر التحسينات هذي ما راح نقدر نشوفها الا في اذا نزلت اللعبة.
أعلنوا تيلتيل جيمز (Telltale Games) عن الموسم الثاني، وأعلنوا معه عن بعض المعلومات المهمة، هذي هي:
- يبدأ الموسم الثاني على نهاية هذي السنة، وبينتهي في 2014. بينزل على PC, PS3, Xbox 360, وأجهزة iOS بالاضافة الى أجهزة أخرى.
- الموسم الثاني بيتكون من خمس حلقات.
- المرة هذي بتلعب دور كليمنتاين (Clementine)!
برضو تم الكشف عن أول عرض للموسم الثاني، تقدر تتفرج عليه هنا:
الفيديو قصير ولا فيه شي يحرق عليك من القصة، ولكن ما أفضّل انك تشوفه اذا ما قد لعبت اللعبة.
من الأشياء اللي تستاهل الذكر مرة ثانية هي الأجهزة، مافيه أي اشارة لاطلاق اللعبة على بلاي ستيشن 4 (PS4)، على ان الجهاز بينزل قريب جداً، وشفنا أكثر شركات الألعاب تعلن عن نسخ لأجهزة الجيل الجاي مثل أساسينز كريد 4 (Assassin’s Creed 4) وغيرها الكثير.
أما بالنسبة لأهم شي يستاهل النقاش، فهو موضوع انك تلعب بكليمينتاين! من بداية الموسم الأول، شفنا كيف ان اللعبة أبدعت كل الابداع في ربط اللاعب مع كليمنتاين، والابداع أكثر وأكثر كان في وضع اللاعب في مواقف مصيريّة قدامها. كثير من اللاعبين يعتبر كليمنتاين أكثر شخصيّة اهتم فيها في عالم ألعاب الفيديو!
في الحلقة الخاصة اللي سويناها للموسم الأول، ذكر أحمد الأحمري انه يتّخذ قراراته مع كليمنتاين “بشكل أبوي”. اللي ما يعرف أحمد هو في الواقع عنده بنت، الله يحفظها ويحميها، ويحفظ ويحمي سائر المسلمين.
قرار انك تلعب بكليمنتاين قرار أعتبره شجاع جداً من المطور تيلتيل جيمز، لان ربط اللاعب بشخصية رئيسية ما تلعب فيها (unplayable character) صارت موضة في الألعاب بعد كليمنتاين. خصوصاً وان المواقف بدأت تصير معروفة، مثل انهم يحطون البطل في موقف يطلب منه انه يقتل الأعداء قدام البنت الصغيرة البريئة، أو ان البنت البريئة المسكينة هذي تذبح الأعداء، وبكذا لأول مرة في حياتها تصير قاتلة، وغيرها من المواقف!
ومن هنا، تيلتيل جيمز قرروا ان اللاعب هذي المرة يلعب بالشخصية اللي كنت تهتم فيها! أحس ان تيلتيل يبغون ينتقلون بهذي الأفكار لخطوة قدام، واحتمال انها تكون خطوات قدام، مو بس خطوة وحدة!
وش رايك أنت في موضوع انك راح تلعب بكليمنتاين في الموسم الثاني لذا ووكينج ديد؟ شاركنا رأيك في التعليقات!
أيمن اليغشي
احمد خالد
