Gamescom 2014أحداثمقالات

رجعت آمالي من جديد بلعبة The Order 1886 بعد ما جربتها (تغطية جيمزكوم 2014)

theorderpic7

عرضت سوني ديمو للعبة ذا أوردر بحيث صار بامكان الناس انهم يجربونها لأول مرة. وحضرت لقاء صحفي خاص باللعبة يشرح فيها أشياء كثير. ما كنت متأكد من مستوى اللعبة، خصوصاً وان مطوّرها كل ألعابه اللي سواها كانت ألعاب محمولة، بالاضافة الى ان اللي عرضوه لنا في لقاءنا الصحفي معهم في معرض E3 ما كان مقنع.

أدري، لو أقول ان رسوم اللعبة جميلة وممتازة ما راح أضيف شي جديد، لكني حاب أقولها من باب التأكيد: اللعبة فيها رسومات من أفضل الرسوم اللي شفتها على بلاي ستيشن 4 للآن. الشي الثاني اللي أعجبني المشاهد اللي فيها، حسيت بواقعية كبيرة جدًا في المشاهد خصوصاً من ناحية التمثيل والشخصيات وتعابير وجهها وحواراتها. على ان اللعبة تحتوي على أشياء غير واقعية في طريقة اللعب وبرضه القصة، الا ان توجّه اللعبة بشكل عام واقعي أكثر من انه خيالي.

أما بالنسبة لطريقة اللعب، وهذا هو تقريباً الأهم بالنسبة للجيمرز، فهو جيّد جدًا بشكل عام. لاحظت ان نظام اللعب يعتمد بشكل كبير على الاحتماء والهجوم (take cover and shoot) من خلف الأشياء اللي تحتمي فيها. الجديد في طريقة القتال انك مو بس تطلق طلقات عادية وخلاص، لكن فيه طلقات (زي المتفجرات) تطلقها على الأعداء وبعدها تطلق عليها رصاص بحيث تفجرها عندهم وتحرقهم فيها. هذا واحد من الأسلحة فقط، وكل سلاح له طريقة استخدام.

أما بالنسبة للقاء الصحفي، فعرضوا لنا أشياء رهيبه مثل الدقة في تصميم الأماكن اللي مستوحين منها اللعبة، مثل بعض الأماكن المشهورة في لندن، مثل Mayfair وغيرها من المناطق المعروفة. عرضوا لنا كمان الأسلحة اللي في اللعبة، واللي واضح انهم متعمقين فيها بشكل كبير جدًا، لدرجة ان المخرج يعرض كل سلاح ويتكلم عنه وعن البحوث اللي سووها عليه وكيف انهم يبغون الأسلحة تعطيك شعور واقعي، وأظنهم بينجحون في هذا الشي، خصوصاً واني جربت الديمو.

بتنزل ذا أوردر في 20-2-2015 حصرياً على بلاي ستيشن 4.

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق