رغم ان اللعبة نازلة لها سنة، الا اني حبيت استغل اصدار النسخة المحسنة على البلايستيشن ٤ واسوي تحليل للقصة، خصوصا اني على وشك البدء في التختيمة الخامسة ومناقشة بعض الثغرات اللي اكتشفتها. طبعا هذي الثغرات مو سلبيات في القصة، لكن المسألة مجرد استغراب مني، كيف صارت متروكة بدون شرح واضح.
احتمال انها صارت متروكة عمداً لأجزاء قادمة للعبة؟ الله اعلم، لكن خلونا نناقش ونشوف.
ملاحظة: المقال يحتوي على حرق كبير لقصة ذا لاست اوف آس (The Last of Us)
الثغرة الأولى: جول (Joel) خلال العشرين سنة
بعد ما تنتهي من الفصل الأول، او بالاصح المقدمة، وتشوف واحد من أحزن المقاطع في الألعاب، وهو وفاة بنت جول (Joel)، راح يبدأ الفصل الثاني بعد عشرين سنة من وفاة البنت. اللعبة ما قدمت شرح واضح للي صار في هالفترة، لكن للي يلعب بتدقيق؛ راح يلاحظ في المحادثات اللي تصير بين إيلي (Ellie) وجول (Joel) بعض الومضات لهذي الفترة المثيرة. من هذي الومضات:
في بداية فصل بيتسبيرغ (Pittsburg)، إيلي تسأل جول كيف عرفت ان الرجّال اللي كان يبي يوقف السيارة نصّاب؟ يرد عليها جول بإنه كان واحد مثل هالاشخاص من قبل! أي بمعنى ان جول حرامي او مجرم سابقا ان صح التعبير، ولما إيلي تسأله عن التفاصيل كان يسكّتها فورا! ايضا لما توصل للمكان اللي يسبق وصولك للمستشفى، آخر مرحلة باللعبة، لما تدخل داخل الخيام الموجودة برا راح يتكلم جول ويقول إنه في بداية الكارثة جلس في فترة من الفترات في هذي الاماكن و تنقل بينها.
الثغرة الثانية: من وين جت شخصية تِس (Tess)؟
مع بداية الفصل الثاني، راح تتعرف فورا على بنت اسمها تيس (Tess)، واللي هي شريكة جول في عملهم كـ “مهربين”، يعني يطلّعون الاشخاص او الاشياء من المناطق الآمنة (Quarentine Zone) الى اماكن محددة. لكن اللعبة ما قدمت لنا تقريبا اي شيء بخصوص هذي البنت، وكيف تعرفت على جول، وكيف صاروا شركاء، وكيف اصلا بدأوا هالبزنس – اذا كنا نقدر نسميه بزنس -.
الثغرة الثالثة: ليه ما ينضم جول لمجموعة الفايرفلايز (Fireflies)؟
السبب اللي يخليني اطرح هالسؤال؛ هو ان الفايرفلايز ميليشيا تدعو لعودة الحكومة الامريكية مثل ما كانت، وتقاتل الجنود الموجودين في المناطق الآمنة، والجنود اصلا يتبعون منظمة الحماية ضد الاخطار، ويعتبرون آخر الأركان الموجودة للحكومة الامريكية قبل الكارثة، لكن مع الاسف صاروا يمارسون السلطة ضد المواطنين.
الجنود نفسهم هم اللي قتلوا بنت جول، فليه جول ما ينضم للفايرفلايز عشان يأخذ بثأر بنته؟!
الثغرة الرابعة: صديق جول، بيل (Bill)
في الربع الاول من اللعبة تقريبا، راح تتعرف على شخصية بيل اللي هو صديق قديم لجول، لكن الظاهر علاقتهم ما كانت ممتازة، والشخصية هذي ما قدموا عنها أي شيء، لكن الظاهر ان بيل تعرف على جول خلال فترة العشرين سنة، والظاهر ايضا ان جول خدم بيل بخدمات كثيرة، ولما رجع له بعدين؛ بيل ما قدر يرد طلب جول بإنه يبغى سيارة.
بالنهاية، هذي الثغرات مو سلبية في اللعبة، لأن اللعبة طلعت بمظهر ممتاز من كل النواحي، وأولها القصة، لكن للي يحب يتعمق اكثر في التفاصيل؛ راح يلاحظ ان بعض الامور مُبهمة. طبعا انا اتفهم صعوبة شرح كل شيء في محتوى واحد، لذلك كنت متأمل بالبداية انهم راح يسدون هذي الثغرات بإضافات معينة، مثل ما سوو مع قصة البنت إيلي.
شخصيا أشوف لو ينزلون جزء ثاني يشرح قصة جول خلال العشرين سنة؛ فهذا الشيء رح يكون ممتاز، وانا متأكد ان مغامرة جول في هالفترة كانت أكثر اثارة من القصة الاساسية.
وانت عزيزي القارئ، ايش رايك بقصة اللعبة؟ وهل توافقني الرأي في الثغرات اللي ذكرتها؟ او عندك تعليق عليها؟ ياليت تشاركنا بتعليقك في الاسفل.
