انطباعنا عن لعبة The Division - احد مفاجآت المعرض [E3 2013]

ذا ديفيجن، من أكثر الألعاب اللي فاجأتني في معرض E3 هذي السنة.

العرض اللي شفناه في المعرض واللي انتشر في الانترنت لا زال غريب ولا يشرح اللعبة بشكل كامل. بعد حضورنا للمؤتمر قدرنا نحصل على معلومات مهمة للعبة.

وش هي اللعبة بالضبط؟

لعبة آكشن RPG بطريقة تكتيكية، أونلاين وعالم مفتوح. ايه، كل هالأشياء اجتمعت في هاللعبة اللي يبدو انها بتكون من أفضل الألعاب اللي بتنزل وقتها.

التركيز الأساسي بيكون على “القتال التكتيكي”، بمعنى ان اللعب بيكون فيه ترتيب وتخطيط أكثر. لاحظت في جميع لقطات القتال ان أول شي يسوي انه يحتمي خلف أي شي Taking cover وبعدها يبدأ يخطط ضرباته وهجماته مع أخوياه. طبيعي ان هالأسلوب ما يصلح للاعبين Call of Duty اللي تميل بشكل كبير الى “الدرعمة”.

تقديم اللعبة ومظهرها يبشر بالخير

من أهم الأشياء اللي لاحظتها في اللعبة هو طريقة تقديمها، بامكانك تلاحظ الاهتمام بالتقديم Presentation وشكل اللعبة والقوائم والرسوم وغيرها من هالأشياء. كلها كانت ممتازة جداً، أعجبني ان الشخصية الرئيسية كل ما تمر من قدام جثّة يطلع لك على الشاشة سبب موت الشخص هذا وبعض المعلومات السريعة عنه.

الجرافيكس كان مبهر جداً، مدينة نيو يورك واقعية من نواحي كثيرة ولكن ذكر المقدم انهم غيروا بعض الأشياء ودمروها بحيث تتناسب مع أحداث اللعبة.

الأجهزة اللوحية.. مرة ثانية

من كثر ما شفت كيف المطورين يحشرون الأجهزة اللوحية في ألعابهم صرت أفترض ان أي لقاء بأدخله لازم يكون فيه ميزة خاصة بالأجهزة اللوحية، واذا صار عكس كذا بأستغرب.

وذا ديفيجن بطبيعة الحال من الألعاب اللي تبغى تدعم هذي الميزة. بامكانك تدخل في اللعبة وتساعد أخوياك بحيث يكون معك هليبكوتر وتشوف أخوياك وهم ينتقلون وتحذرهم من الأعداء اللي قدامهم وتعطي لأخوياك مواقع الأعداء. فيه برضو ميزة عيّنة تقدر تخلي طلقات أخوياك أثرها قوي على الأعداء، وتقدر تحط نوع من الحماية لأخوياك بحيث ما تخف تأثير الطلقات عليهم.

بشكل عام، اللعبة شكلها رائع جداً. طريقتها جديدة وغريبة شوي ولكن ليش ما نجرب شي جديد؟ يمكن هالخليط يطلع لنا بلعبة ممتازة.

بتنزل اللعبة في 2014على Xbox One وPS4 في 2014.

هل تتوقع ان اللعبة بتنجح؟ شاركنا برأيك في التعليقات!