مقالات

انطباعنا الأولي للعبة Tearaway على الفيتا

Untitled-1

اليوم بنعطي انطباعنا عن اللعبة الواعدة تير أواي (Tearaway) اللي بتنزل على الفيتا في 22-11-2013.

اللي ما يعرف تير أواي، هي لعبة مغامرات مستوحاة من “تكوين الأوراق”. تذكر أيام المدرسة لمن كنّا نشق أوراق الدفتر ونسوي فيها طيارات ونرميها على بعض؟ هي نفسها بالتمام، اللهم الأوراق اللي كنّا نسويها شكلها يجيب الكآبة، خصوصاً اذا رميت الطيّارة ولا طارت، بينما هذي أوراق مرسومة بشكل لطيف وجميل جداً.

الفكرة هذي تقريباً هي أكثر شي يميّز اللعبة، طريقة الرسوم في اللعبة ماهي بس جميلة، الا ساحرة. من أعلنت عنها سوني في جيمزكوم 2012 وانا مهتم فيها مرة، خصوصاً ان اللي مسوينها Media Molecule اللي هم نفسهم مطوّرين لعبة LittleBigPlanet الأول والثاني.

اللعبة فيها تشابه بينها وبين LittleBigPlanet من بعض النواحي، مثل التصاميم الجميلة اللي تشوفها في اللعبة، بالاضافة الى انها لعبة مغامرة لكنها ماهي من الجنب، برضو حتى الشايب اللي يروي الأحداث في ليتل بيق بلانيت جابوه من جديد!

tearaway

من مظهر اللعبة، تقدر تشوف انها لعبة لطيفة وبريئة، بعيدة عن العنف والقتل. هذي ميزة رهيبة للعبة، خصوصاً للي مثلي، توّه طالع من ألعاب عنيفة مثل The Last of us وGTA V وغيرها من الألعاب الجدّية. استمتعت كثير وأنا أشوف البيئات الجميلة الورقية من أشجار وأنهار وسناجب وغيرها.

فيه برضو شي رهيب أعجبني في اللعبة، وهو دمج اللاعب نفسه في اللعبة. في بداية اللعبة، يطلبون منك تصوّر نفسك ويبدأون يدمجون صورتك مع المراحل في اللعبة ويحطونك على انك انت اللي جالس تقود وتلهم اللاعب اللي تلعب فيه. مثلاً، اذا وصلت نهاية مرحلة من المراحل يرفعون الكاميرا على السماء ويجيبون صورتك وسط الشمس، ويتكلمون عنك كأنك الشخص اللي حلّيت مشاكل الكائنات اللي في اللعبة.

هالفكرة ممكن تكون مملّة وانت تقراها في المقالة أو تشوفها في فيديو، لكن اذا جربتها وشفت طريقة دمجها المتقنة في اللعبة احتمال كبير انك تغيّر رأيك، مثلي تماماً.

Untitled-2

تشوف البصمات اللي في الصورة؟ هذي تصوّر لك ميزة من أهم الميزات في اللعبة، وهي استخدام تقنية اللمس الأمامي والخلفي.

اللعبة تستخدم تقنية اللمس بشكل كبير، واضح ان ميديا موليكيول اتخذت قرار صعب بهذا، خصوصاً ان اللاعبين غالباً يشتكون من قضيّة “تلفيق” المطوّرين لتقنية اللمس في ألعابهم وانهم يحطونها بس عن قولة انهم استخدموها. لكن هل هذا معناته ان كل لعبة تستخدم تقنية اللمس بتكون سيئة؟

لا طبعاً، والدليل بيكون مع هذي اللعبة. اللي يعرفني غالباً يكون عارف اني أكره ألعاب الجوال لأسباب كثيرة، أوّلها وأهمها انك تلعب باللمس، مو يد تحكّم. في تير أواي راح تستخدم تقنيات اللمس الأمامية والخلفية، واحتمال كبير انها بتعجبك. مثلاً، بعض الأعداء يقدرون يقفزون ويوصلون للشاشة ويتلصقون فيها بحيث ما يخلونك تشوف باقي الشاشة، وانت تلمس بأصبعك الشاشة وهم يطيحون، أو انك توصل لمكان معيّن (مكان أرضيته مطّاط) وتخلّي الشخصية توقف فيه، وتلمس الجهاز من الخلف وتشوف المكان اللي موقّف فيه شخصيتك يرتج يساعد شخصيتك للوصول الى أماكن عالية.

مع تقدمك للعبة بتكتشف طرق ثانية للتفاعل مع اللعبة عن طريق تقنيات اللمس الأمامية والخلفية، مثل فتح طرق جديدة باستخدام اللمس الأمامي بحيث عائق من جهة محددة وتفرده بطريقة معيّنة بحيث يصير طريق يساعدك للوصول الى المكان اللي بعده، ببعد ما كان عائق في طريقك.

Untitled-3

مع تقدمي باللعبة، فيه ميزات حلوة اكتشفتها مثل اني أقدر أعلّق على زر الدائرة وتتحول الشخصية اللي ألعب فيها الى ورقة كرويّة، بحيث تتدحرج وتصير تنتقل بطريقة أسرع، بالاضافة الى اني أقدر أهاجم فيها نوع معيّن من الأعداء.

فيه شي أخير أعجبني، وهو دمج اللاعب في اللعبة بأشكال كثيرة. ذكرت لكن وضع صورتك في اللعبة كمثال بسيط، لكن برضو فيه أشياء تدمجك في اللعبة. فيه لغز حلّيته وجابوا صورتي وحطوها، وجا حولها سناجب وقاموا يتفرجون باعجاب وهم فرحانين ويرقصون، هذا شي خلاني أهتم أكثر في اللعبة والشخصيات اللي فيها، على انها مجرد شخصيات خيالية مستوحاة ورق لا أكثر.

أخيراً، اللعبة شكلها واعد جداً. غالب الظن انها بتكون من أفضل ألعاب الفيتا مو بس لهذي السنة، لكن احتمال تكون من أفضل ألعاب الفيتا.. على الاطلاق!

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق