محمد الشريف
اخترع المدرس الرهيب شون يونق (Shawn Young) طريقة تعليم ابتكارية اسمها كلاس كرافت (Classcraft) تعتمد على ألعاب الفيديو، وهي عبارة عن ان الطلاب يقدرون يكسبون صفات مميّزة مستوحاة من ألعاب الفيديو، مثل ان المدرس يسمح له يجي متأخر لمرة وحدة، أو يسأل المدرّس أسئلة في الاختبار، ويصير الطالب يحصل على “صفات”، حسب أداء الطالب في الفصل!
الطريقة هذي مأخوذه من نوع معروف من الألعاب وهو RPG، ومن صفات هذا النوع من الألعاب ان الشخصيات في اللعبة يكون لها “أدوار” بحيث واحد من اللاعبين ياخذ دور المقاتل (Warrior)، والثاني يصير ساحر (Magician) بحيث يطلق ضربات سحرية من بعيد، والثالث يصير معالج (Healer) بحيث يعالج أخوياه من الضربات، وهكذا.
المدرّس الرهيب هذا ماخذ الأشياء هذي من ألعاب RPG ومطبقها على الطلاب بحيث كل طالب يختار دور. أما بالنسبة لقدرات الشخصيات فهي مشابهة لألعاب الأر بي جي بشكل كبير، بحيث فيه شخصيات عندها القدرة انها تتأخر عن المحاضرة لمدة عشر دقايق، أو يقدر يستأذن من الفصل ويطلع لمدة دقيقتين- شبيهة بخاصية teleport في الألعاب- ، أو يصير مسموح له ياكل في الفصل، وفيه قدرات تعطي الطالب قدرة انه يسأل المدرس عن اجابته في الاختبار هل هي صحيحة أو لا!
الأرهب من هذا انه متعمّق أكثر، وصار الطلاب يتأثرون بمستواهم وأداءهم في الفصل، بحيث اذا جاوب أجوبة صحيحة تجيه نقاط (XP أو Experience Points) بحيث يرتفع مستواه (Level) ويصير عنده قدرات أفضل. العكس صحيح، فيه امكانية ان الطالب ينخفض مستواه ويخسر ويصير أضعف في حال انه جاوب غلط أو حضر متأخر عن المحاضرة.
المضحك في الموضوع ان النظام هذا، مثل ألعاب الفيديو، فيه “ثغرات” يقدر يستغلها اللاعب، مثل استغلال خاصيّة الخروج من الفصل لمدة دقيقتين، وتحويلها الى عشر دقايق 🙂
أخيراً، طريقة التعليم الجديدة هذي على وشك تصير أكبر من حجمها هذا، وتتحوّل الى طريقة ربحية بحيث يكون فيه صفات معروضة للبيع بفلوس حقيقية.
هل قد فكرت بطريقة تدريس مثل كذا؟ شاركنا تخيلاتك.
احمد خالد
بارعة
