بعد اعلانها عن نظام التشغيل الخاص فيها، أعلنت فالف قبل شوي عن تعاونها مع أكثر من شركة لصنع جهازها الخاص فيها. بتنزل النسخة التجريبية (beta) من هذا الجهاز نهاية السنة هذي، وبيختارون 300 شخص في هالنسخة عشان يجربون كل شي في الجهاز والنظام قبل لا ينزل الجهاز بشكل رسمي في عام 2014.
طريقة الاشتراك في النسخة التجريبية بسيطة. كل اللي تحتاج تسويه هو:
- تشترك في الشبكة الاجتماعية الخاصة في ستيم
- توافق على شروط الاستخدام
- يكون عندك 10 أصدقاء في حسابك حق ستيم
- يكون عندك ملف اجتماعي في شبكة ستيم (profile)
- تلعب الألعاب باستخدام يد التحكم وتستخدم واجهة التحكم حقتهم الجديدة Big Picture Mode.
بيتم اختيار الـ300 لاعب في 25 اكتوبر، وبيبدأ اللاعبين يجربون النسخ التجريبية ويرسلون لفالف ملاحظاتهم على المشاكل اللي يواجهونها، مثل أي نسخة تجريبية ثانية.
بعد الاعلان الأول، كثير افترض ان توجّه فالف هو الدخول في ملعب سوني ومايكروسوفت. ومع اعلان اليوم، تقدر تقول انه اعلان صريح من فالف للدخول في هذا الملعب. لكن السؤال: هل هذا التوجّه صحيح لفالف؟
عالم الألعاب المنزلية بلا شك يثير سعابيل الشركات، وخصوصاً بعد الأرباح والأرقام الهائلة اللي نشوفها من الأجهزة المنزلية.
ستيم حالياً هي الشركة المسيطرة على عالم الألعاب في الكمبيوتر، وكثير من اللاعبين يقدرون عملها وتعاملها مع اللاعبين، عكس بعض الزلّات اللي نشوفها من شركات مثل سوني ومايكروسوفت.
هل بيكون دخول فالف في عالم الأجهزة مفيد لنا كلاعبين؟ طبعاً. الخيارات راح تصير أكثر بالنسبة لنا، وكثرة الخيارات بلا شك أفضل في هذا المجال.
ولكن الأهم، هل فيه مكان لفالف مع سوني ومايكروسوفت وننتيندو؟ أعتقد هذا السؤال الصعب، واللي يستحق النقاش.
شخصياً أعتقد عالم الألعاب مزحوم، ولكن بامكانه يقبل منافس جديد. خصوصاً وان وقت دخول فالف ممتاز، وهو الدخول المتوافق مع نزول PS4 و Xbox One أو الجيل الجديد.
