وأخيراً أعلنت شركة Valve عن آخر اعلان لها بعد ما اعلنت عن نظام ستيم و أجهزة ستيم المنزلية: يد تحكّم ستيم!
يد التحكّم مثل ما تشوف في الصورة شاطحة جداً وغريبة، تحسها شي فضائي! خلنا نستعرض أزرارها باختصار:
- بدال عصيان التحكّم التقليدية، فيه أسطح لمس مزوّدة بهزّاز متطوّر تحتهم بحيث تقدر تستشعر اللعبة وحركتك فيها بشكل أفضل. أسطح اللمس تقدر تضغطها على جوا، زي حقت اللابتوب.
- شاشة لمس تستعرض معلومات اضافية فيها عن اللعبة أو عن ستيم، وتقدر تضغطها على جوا.
- أربع أزرار أمامية. حطّوها بهالشكل عشان ما تضطر تبعد اصبعك كثير عن أسطح التحكّم.
- أربع أزرار علوية.
- زرّين كبار في الخلف
هذا الرسم يوضّح الأزرار كلها بشكل أفضل:
اليد راح تدعم جميع الألعاب الموجودة في ستيم حالياً، وبتنزّل لها الشركة اداة تسمح لك تعيّن الأزرار على كيفك بحيث تكون مناسبة للعبة اللي تبيها، أو حتى تحمّل اعدادات مستخدمين ثانيين (أو أكثر الاعدادات استخداماً في ستيم للعبة معيّنة). هذا مثال على تعيين الازرار في لعبة Portal 2:
الشركة أيضاً ذكرت ان اليد مصمّمة بحيث يسهل التعديل عليها من هواة التعديل، وانها بتوفّر أدوات تسهّل هالشي
صراحة مصدوم جداً من التصميم الشاطح هذا. ما عندي مشكلة مع توزيع الأزرار الغريب، يمكن شي يحتاج تعوّد فقط، بس هل فعلاً أسطح التحكّم هذي بتكون بديل ممتاز لعصا التحكّم التقليدية؟ أحسّها بتكون غير دقيقة صراحة! وكيف بيكون أدائها مع الألعاب القتالية اللي تحتاج دقّة أسهم التحكّم عادة؟ مادري اذا بيضبط وضعها أحسّها ما تنفع. لكن ممكن بعد التجربة نكتشف أن شركة Valve توصّلت الى اختراع خرافي، ما ندري!
وش رأيك انت؟ هل بتكون يد التحكّم هذي ثورة في أيادي التحكّم أو شطحة تفشل بعد تجربة الناس لها؟
