أحمد قربان
لعبة ورلد اوف وار كرافت (World of Warcafrt) المطورة من ستديو بليزارد (Blizard) قريباً راح تقدر تلعبها بدون ماتدفع فيها اي فلوس حقيقية اذا كان معاك كمية طيبة من الذهب الموجود باللعبة. اعلن ستديو بليزارد اليوم انهم راح يطلقوا عملة جديدة داخل اللعبة اسمها توكن (Token). هذي العملة في البداية لازم تشتريها بفلوس حقيقية بعدين تتاجر فيها من داخل اللعبة.
ايضا تقدر تشتري توكنز بالذهب اللي عندك وتقدر تجدد اشتراكك بهذا التوكن لمدة 30 يوم. هذا يعني ان الناس اللي عندهم كمية كبيرة من الذهب راح يقدروا يلعبوا اللعبة بشكل مجاني.
طريقة بيع التوكنز في اللعبة غريبة شوي. السعر ماراح تقدر تحدده، اللعبة راح تعطيك سعر من عندها بحسب الطلبات الموجودة على التوكنز في اللعبة. اذا البائع شاف السعر اللي تحطه اللعبة للتوكن مناسب راح يتم وضعه بقائمة البيع. والفلوس -الذهب- راح توصل لبريد اللاعب اول مايتم بيع التوكن. من الجهة الثانية المشتريين راح يشتروا التوكن مباشرة وماراح يكون موجود نظام المزايدة للوصول لاعلى سعر. بالتالي ماراح تحتاج انك تشتري ذهب من مواقع غير مضمونة وممكن تخدعك. بش تحتاج تشتري توكن وتبيعه بعملة الذهب الموجودة باللعبة.
صرح مطورين اللعبة عن بعض الاسئلة المهمة اللي ممكن تخطر ببالنا.
قال المطور: “انك تشتري ذهب من مواقع اجنبية يأثر بشكل سلبي على تجربة جميع اللاعبين. اغلب المواقع اللي تبيع الذهب جابت هذا الذهب عن طريق سرقة عضويات اللاعبين. بطريقتنا راح نمنع الحرامية من التدخل باللعبة وبيع الذهب الموجود فيها. والاكبر من ذلك هو ان اغلب المواقع اللي تجيب الذهب تجيبه عن طريق تهكير اللعبة ببرامج خاصة تقتل الوحوش بشكل مستمر. هذي المواقع تخدع المستهلكين وتعطيهم اكواد وهمية و يرسلوا لهم رسائل مزعجة لشراء ذهب وهمي، ويزعجوا الناس ويعطوا صورة سيئة عن اللعبة بكل الطرق الممكنة”
كمل المطور: “عن طريق التوكن اللي راح نضيفه باللعبة راح نسمح للاعبين بمبادلة الذهب بفلوس حقيقية بطريقة سهلة وامنة. مع الجهود المستمرة لمطورين اللعبة وفريق المساعدة، ايضا فرق قتال التهكير راح نوقف هذا الاستغلال من الشركات اللي تخدع اللاعبين عن طريق سرقتهم لهم. نتمنى ان هذا التوكن يساعد في جعل اللعبة اكثر امان و اكثر متعة لكل اللاعبين”
بليزارد مااعلنوا موعد اصدار التوكن للان.
خبر رهيب من شركة بليزارد احد افضل الشركات في نظري، ننتظر ونشوف اش كيف راح تكون اسعار بيع التوكن في اللعبة واتوقع انه راح يكون منظم ومضبوط جدا. كتبنا قبل كذة ان الشركة سوت مشروع خيري رهيب داخل اللعبة يوضح لنا ان بليزارد شغلهم ماعليه اختلاف.
وس رأيكم؟
بارعة
احمد خالد
أيمن اليغشي