محمد الشريف
بلاي ستيشن 4 تفوّق على اكس بوكس ون من البداية، ولا زال متفوّق الى الحين. وش سبب التفوّق هذا؟ حسب كلام مدير تسويق سوني بريطانيا، فيرجال جارا (Fergal Gara)، ان سبب تفوّقهم هو سماعهم وانصاتهم لمطوّرين.
يقول جارا:” تراها بهالبساطة والله، البلاي ستيشن 4 أسهل من ناحية التطوير. البلاي ستيشن 4 جالس يقدّم للمطوّرين الشي اللي يبغونه بالتمام”.
برضو جارا يقول ان مافيه كلمة أصدق من مارك سيرني يوم طلع قدام الناس وقالهم:” تراني قضيت الخمس سنوات الأخيرة وهو يستمع للمطورين، أشوف وش يبغون ووش يتوقعون من الجهاز المنزلي القادم”.
حسب ما نشوف من نتايج نسخ الألعاب اللي تنزل هاليومين، ابتداءً من نداء الواجب: عفاريت (Call of Duty: Ghosts) ووسلالة الحشّاشين 4: العلم الأسود (Assassin’s Creed IV: Black Flag) وأخيراً تومب رايدر (Tomb Raider). كل هالألعاب تشتغل على 60 اطار في الثانية على البلاي ستيشن 4، عكس الاكس بوكس ون اللي تشتغل عليه بثلاثين اطار في الثانية، أو بمستوى أقل بشكل عام.
برضو واحد من أسباب تفوّق سوني الحالي على مايكروسوفت، يقول جارا:” حنا جينا بالمنتج الصحيح وبالسعر الصحيح، وتوجّهنا للجمهور الصحيح عشان نبدأ بدية قويّة. نعتقد اننا نجحنا بهذا الشي نجاح كبير”.
وعلى هالطاري، سألوا ألبيرت بانيلو (Albert Panillo)، مدير تخطيط المنتجات في قسم الاكس بوكس، عن الاشكاليات اللي تصير لنسخ الألعاب اللي تنزل على الاكس بوكس ون. رد عليهم ألبيرت:” فيه شي صاير مع الاطارات المعروضة في نسخة تومب رايدر للاكس بوكس ون، وفيه شي صاير مع وضوح العرض في نسخة تومب رايدر للاكس بوكس ون، وفيه برضو أسباب كثيرة تخلّي هالكلام صحيح، لكن ترا هالجهاز الجديد ماله كم أسبوع داخل السوق، الجيل هذا بيطوّل ترا!”
ممكن نقول ان هذي تصريفة، لكن هالأعذار ما راح تغيّر واقع ان مايكروسوفت تعيش اللي عاشته سوني مع البلاي ستيشن 3، خصوصاً في بداياته.
هذا كلام الشيخ ألبيرت والشيخ جارا، لكن انت وش تتوقع سبب تفوّق سوني على مايكروسوفت في هذي الفترة؟
احمد خالد
