سوني تطلب من اللاعبين انهم يساهمون في تسعير المحتويات اللي بتكون داخل لعبتها الجديدة H1Z1 واللي بتكون مجانية. نقصد مجانية كونها قابلة للتحميل ببلاش، لكن فيه أشياء جوا اللعبة تقدر تشتريها بفلوس. على حسب ماكتب رئيس سوني للترفيه الاونلاين جون سميدلي (John Smedley) على موقع ريديت (Reddit).
سميدلي كتب ان سوني مستعدة لـ”حوار جاد” مع اللاعبين بخصوص كيف الشركه راح تسعّر محتويات اللعبة، والي مقرر اطلاقها من شهر لستة اسابيع من الحين.
“راح تتفاجأون لما تسمعون ان احنا تركنا قرار التسعير لكم بشكل متعمّد، عشان نبغى نسمع منكم”، سميدلي كتب برضه: “هذا مو شي مفتعل، انا جدّي. وتقريبا لائحة التسعير عندنا فاضية”.
سميدلي قال ان اللعبة راح تكلف 19,99$ وقت الاصدار في فترة الدخول المبكر (early access)، لكن راح تكون مجانية للعب بعد انتهاء الفترة. سميدلي قال ان سوني مو مهتمه انها تبيع الاسلحة في اللعبة، راح تقدر تحصل عليها بانك تصنعها وتستكشف. يعني الاستوديو مارح يبيعك “القوة”. لكن كان فيه احتمال يبيعك الاشياء الي ممكن تلبسها بالاضافه الى الأشياء اللي ممكن تصنعها.
“اللعبة اساسا عن النجاة والبقاء على قيد الحياة”، وأضاف سميدلي: “ونفضل اننا مانبيع اي شي ممكن يساعدك في هذا (يقصد عنصر النجاة والبقاء على قيد الحياة)، اذا اللعبة جدا صعبة بالنسبة لك، العب لعبة ثانية. احنا مانبغى نعطي طرق مختصرة لميكانيكيتنا الاساسية”.
“احنا سوينا هذي اللعبة عشان احنا نحب نسوي العاب تسلّي لاعبينا عشان كذا احنا موجودين، وفي نفس الوقت نحتاج ندخل فلوس”.
تم الكشف عن H1Z1 بداية هذا الاسبوع، وقاعدين يطورونها لبلاي ستيشن 4 و ويندوز بي سي. اللعبة بتحط اللعبين في دور “الصراع من اجل النجاة” في عالم مليان زومبي. راح يكون فيه ليل و نهار واللاعبين يقدرون يأثرون بالبيئه الي هم فيها، مثلا تقدر تحرق الاشياء بشعلة نار. الMMO راح يكون ثابت الأداء، والخوادم راح تقدر تستضيف آلاف اللاعبين مره وحده، حسب كلام سميدلي.
شكلها لعبة جامده ومثل ماقلت قبل تقدر تكتشف فيها قدراتك على النجاة، مين ناوي يلعبها وليش؟
