رئيس سوني أمريكا، آندرو هاوس، يوضّح أسباب اعادة اطلاق ألعاب بلاي ستيشن 3 المشهورة على بلاي ستيشن 4 في مقابلة جديدة.
يقول آندرو: “هدفنا هو الترحيب باللاعبين اللي اشتروا بلاي ستيشن 4 واللي كان عندهم جهاز وي (يقصد ما اشتروا بلاي ستيشن 3). المعلومات اللي عندنا تقول ان بعض أصحاب أجهزة الوي اشتروا بلاي ستيشن 4، وهذا واحد من أسباب مبيعات الجهاز الكبيرة”.
تكلم آندرو عن ان اعادة اصدار الألعاب ممكن ما يعجب بعض اللاعبين، يقول: “أحس اني متردد وأنا أقول هالكلام لكن أعرف ان بعض اللاعبين ما راح يعجبهم هذا الشي. لكن فيه فرصة لهذي الألعاب اللي نعيد اصدارها انها تلقى جمهور معيّن، جمهور ما قد لعب هالألعاب في الجيل اللي راح.”
أخيراً، يقول آندرو: “هذا الشي مناسب لجهاز، وبرضه مناسب للمطورين والناشرين. دائماً كنت أحسد الأفلام على هذا الشي، كونهم ياخذون محتويات معينة ويشتغلون عليها ويقدمونها بشكل صحيح. ديزني هم أفضل ناس من هالناحية، ياخذون محتويات كلاسيكية قديمة ويقدمونها من جديد لجمهور جديد”.
هذا الكلام موافق لكلام شوهي يوشيدا من سوني، واللي جاب احصائية تشرح لنا ليش سوني تعيد اصدار ألعابها على بلاي ستيشن 4.
وش رأيك في اعادة اصدار ألعاب بلاي ستيشن 3 على بلاي ستيشن 4؟
