في الأيام اللي راحت، غالب الظن انك قريت أو سمعت عن اعلانات ستيم الأخيرة. فالف (Valve) أعلنت نيّتها وخططها عن احتلال “غرفتك الترفيهية” أو المكان اللي تلعب فيه. وش يعني هذا؟ ايه، داخلين في مواجهة صريحة ضد سوني ومايكروسوفت، الشركتين اللي محتلين غرفنا في الجيل هذا على الأقل.
في مقابلة مع رئيس بلاي ستيشن أوروبا، فيقرال قارا، قال: “في هذا السوق لازم تتوقع دخول تقنيات احتمال تنافسك وتعطل مخططاتك، ويبدو ان نظام ستيم مثال جيّد لهذا الكلام”.
اللي جرّب نظام ستيم يعرف انه أفضل نظام للألعاب الى الآن، أفضل من نظام الاكس بوكس ومن نظام البلاي ستيشن. صحيح ان عدد الألعاب في ستيم لا يقارن بعدد الألعاب الموجودة في الشبكات الثانية مثل شبكة البلاي ستيشن، ولكن التجربة اللي بتاخذها من النظام أفضل بكثير من باقي المنافسين. أعتقد ان كلام قارا سليم جداً.
برضو من الأشياء اللي قالها وتستحق الاقتباس ان “لازم نراقب فالف وغيرهم من المنافسين الكثيرين في السوق، ما نقدر نتجاهلهم. ستيم تقدم أفضل خدمة لتحميل ألعاب، لذلك لازم نراقبها”.
طبيعي ان الكل يراقب منافسيه، لكن اللي يستاهل الذكر هنا ان سوني ما عادت تستهين بأي منافس، حتى اللي توّه ما دخل المنافسة مثل فالف.
أعتقد ان ستيم داخله بقوّة في السوق، لكن قدامها مشوار طويل الين ما تقدر تنافس مايكروسوفت وسوني.
أما بالنسبة للكلام عن اعلانات ستيم، فهي اعلانات جيّدة، لكن حسب توقعاتي ان أجهزة ستيم ما راح تكون بالمستوى المطلوب. فالف شركة مبدعة جداً في البرامج والأنظمة ولكن خبرتهم في الأجهزة (أو الهاردوير) لا تزال تحتاج الكثير.
النظام لحاله ما يمشي منتج ترفيهي كامل، ولا الجهاز لحاله يقدر يمشي منتج ترفيهي كامل. لازم المنتج يحتوي على الاثنين الى حد مقبول، مثل ما شفنا مع مايكروسوفت وسوني. الاكس بوكس ٣٦٠ يحتوي على نظام رائع، لكن الجهاز نفسه عادي جداً، وعانى من مشاكل كثيرة في الماضي. البلاي ستيشن ٣ احتوى على نظام عقيم لا تزال سوني تشتغل عليه، لكن الجهاز كان ممتاز.
الى الآن ما نزل جهاز ستيم، لكن ما أدري ليه أحس ان جهازهم بيحتوي على نظام ممتاز ولكن الجهاز بيعاني. ماحد يدري ايش هي الشركات اللي بتتعاون معها فالف، والأغرب انها أعلنت انها بتتعاون مع أكثر من شركة لانتاج أجهزتها، وهذي خطوة ما تطمّن.
أتوقع الكثير بيجادل ويقول: “كثرة الأجهزة معناتها كثرة الخيارات!” ولكن اللي له خبرة في الجوالات يعرف ان نظام Android متوفر على أجهزة كثيرة وهذا سببت له مشكلة كبيرة، عكس iPhone اللي عادةً يكون منتج واحد.
عموماً، شركة فالف شخصياً أحبها، وأتمنى لها النجاح لانها حسب رأيي أكثر شركة تحترم اللاعب. بالاضافة الى ان كثرة الخيارات للاعب (من ناحية تعدد المنتجات) بتكون أفضل له طبعاً.
وش رايك في كلام سوني عن ستيم ومراقبتها له؟ ايش اللي تحتاج فالف تسويه عشان تنافس سوني ومايكروسوفت؟ شاركنا برأيك في التعليقات!
