في مقابلة مع جاك تريتون (Jack Tretton)، رئيس سوني أمريكا للترفيه، ذكر ان البلاي ستيشن 3 لا زال قدامه مستقبل باهر، حتى بعد نزول البلاي ستيشن 4.
مناسبة الكلام هذا ان البلاي ستيشن 3 وصلت مبيعاته الى ثمانين مليون، وانه لا زال يبيع حتى بعد نزول البلاي ستيشن 4. لكن جاك اعترف ان مبيعات البلاي ستيشن 3 راح تنزل بطبيعة الحال.
يقول جاك: “بعنا ثمانين مليون جهاز بلاي ستيشن 3، يارجال لو قالوا ان مبيعات الجهاز انتهت بكرة بأعتبره نجاح عظيم!”
نجاح عظيم، كلمة أثارت اهتمامي، خصوصاً واننا نتكلم عن بلاي ستيشن. بلاي ستيشن الأول اللي باع فوق 120 مليون جهاز، وبلاي ستيشن 2 اللي باع أكثر من 155 مليون جهاز – أكثر جهاز منزلي باع في التاريخ!
ما ننكر ان هذا يعتبر هبوط بشكل من الأشكال، لكن لو رجعنا للماضي وشفنا معاناة سوني مع بلاي ستيشن 3، أقدر أفهم كلام جاك وأتفق معه. كثير مننا يذكر بداية بلاي ستيشن 3 الفظيعة، واللي خسّرت سوني مليارات الدولارات. لا زلت متمسك برأيي، واللي هو لو ان بلاي ستيشن 3 كان من شركة ثانية غير سوني، كان ألغت الجهاز من بدايته وأعلنت استسلامها وطلعت جهاز ثاني غيره!
حاربت سوني بجهازها المعقّد والصعب، واللي كان ولا زال كابوس للمطورين. ومشكلة سوني انها كانت تواجه وحشين من الطرفين، ياكلون الأخضر واليابس. ننتيندو (Nintendo) تحارب بجهازها الابداعي ويي (Wii) بابتكاراته اللي استهدفت كل الناس، ومايكروسوفت (Microsoft) بجهازها اكس بوكس 360 (Xbox 360) وسلاحه الأول ميزات الأونلاين الخرافية اللي فيه، بالاضافة الى كونه سهل لتطوير الألعاب!
قدرت سوني تحارب منافسيها بجهازها الغلطة، وقدرت تحفظ ماء وجهها بعد ما وصلت مبيعات الاكس بوكس وتفوقت عليه في نهاية الجيل. يذكر ان بلاي ستيشن 3 باع 80 مليون، الاكس بوكس 360 باع نفس العدد -لكن بعد سوني بفترة بسيطة-، بينما الويي وصل 100 مليون جهاز في سبتمبر 2013!
لا بد ان سوني تعلمت من غلطتها الفادحة، وواضح تعلمها من حذرها الشديد مع البلاي ستيشن 4 وتغيّر طريقة تعاملها مع العالم واللاعبين. استبدلت سوني الغرور والاستخفاف بالمنافسين الى احترامهم، ودليل هذا مقابلة شوهي يوشيدا (Shuhei Yushida) اللي قال فيها انه يتمنى ان جهاز ويي يو (Wii U) ينجح!
أخيراً، الجيل الجديد بدأ. ومع بدايته بنشوف منافسة جديدة شرسة مرة ثانية، خصوصاً مع البداية الصاعقة لكل الجهازين واللي باعوا مليون جهاز في أول يوم!
ولكن خلنا نرجع لأساس الموضوع وهو مبيعات بلاي ستيشن 3، وش رأيك فيها؟ ووش كانت غلطات سوني مع الجهاز؟ شاركنا رأيك في التعليقات!
