أخبار

سبب تأخير لعبة DRIVECLUB هو تصميم قوائم تواصل اجتماعي

driveclubcoverphoto

حسب باول رستشنسكي ( Paul Rustchynsky) مخرج لعبة درايفر كلوب (Driver Club) انه سبب تاخر اللعبة هو انهم يبغو يصممو قائمة مميزة و ديناميكية للتواصل الاجتماعي في اللعبة. هذي الاخبار قالها باول لموقع قيم انفورمر (Game Informer).

قال باول: “لازم نتأكد انه كل عوامل التواصل الاجتماعي المحيطة باللعبة جاهزة. سواء كانت انك تدخل الاندية او انك ترسل تحديات، او حتى انك تتفاعل في برنامج اللعبة في اجهزة الاندرويد و الاي او اس (IOS)، لازم نتأكد انه كل الاشياء هذه جاهزة و مرنة الاستخدام”.

كمل باول:” طريقة التواصل اللي كانت عندنا في بداية التصميم ماكانت بالطريقة المميزة اللي كنا نبغاها و نتمناها، ماكانت مريحة ولا سريعة في التنقل و لا تساعد على التواصل بين اللاعبين. عشان كدة كان لازم نتراجع و نعدل هذه المشاكل اللي لقيناها. وكان لازم نلقى طرق مبتكره و مختلفة لتسهيل التواصل بين اللاعبين و لجعلهم متواصلين مع بعض طوال الوقت. وهذا الشي سويناه وضبطناه مع نظام قائمتنا الديناميكية الجديدة. بعد هذي التعديلات احنا نشعر انه تقريبا حلينا كل المشاكل و صنعنا لعبة سباق سيارات مشحونة بعوامل التواصل الاجتماعي.”

اللعبة مثل مانعرف مالحقت تصدر مع اطلاقة البلايستيشن فور في العام الماضي، ومثل ماشفنا مطور استديوهات اللعبة اللي هو ايفولشن ستديو (Evolution Studios) صرح انه اللعبة راح تصدر في شهر اكتوبر. وراح تكون موجودة نسخة مجانية لمشتركي خدمة بلايستيشن بلس.

مااشوف صراحة انه عذر مقنع انك تاجل اللعبة لسنة تقريبا! كل هذي الفترة يصممو قوائم للتواصل؟ فترة جدا طويلة صراحة، مالنا الا ننتظر و نشوف هذي القوائم الخرافية اللي يقولو عليها ونشوف تستاهل كل ذا التاخير و لا كلام فاضي، قهر انهم اجلو اللعبة اساسا خصوصا انه اللعبة كانت منتظرة من يوم اعلنو عن البلايستيشن 4، شخصيا منتظرها وراح اشتريها اول ما تنزل ان شاء الله، و توي اعرف انه في نسخة مجانية لمشتركي البلايستيشن بلس! هذا الشي حمسني صراحة،و ودي اجربها في اقرب وقت.

اش رايك عزيزي القارئ وهل تشوف انه سبب مقنع للتاخير؟ شاركنا!

المصدر

الوسوم
اظهر المزيد

أحمد قربان

طالب جامعي ، يدرس في جامعة الملك عبدالعزيز بجدة ، تخصص هندسة صناعية ، اعشق العاب البلايستيشن و مدمن فيفا ، احب العاب الاكشن و المغامرات واي لعبة فيها كريتفتي او شيئ جديد
إغلاق