مقابلاتمقالات

حصري: لقائنا مع شينجي هيرانو، رئيس “كونامي” أوروبا

صورة رئيس كونامي اوروبا

خلال الحدث اللي حضرناه لمقابلة كوجيما، كان فيه واحد “كاشخ” مع كوجيما بس ما عرفت مين هو صراحة. كل اللي اعرفه انه كان شخص بسيط بتعامله، وصدف اني وقفت معه وجلسنا نسولف سواليف عامه عن كوجيما وكونامي، فتوقعته واحد من اللي يشتغلون عند كوجيما.

بعد ما انتهيت من مقابلة كوجيما طلبت من المنظمين يوصلوني مع شينجي هيرانو – رئيس كونامي أوروبا – عشان اسوي مقابلة معه، وتفاجأت يوم رجعوني لنفس الشخص! أول مره اقابل رئيس شركة بهالبساطة وسعة الصدر للأمانة.

كنت متحمّس لمقابلته لانه هو الشخص اللي ممكن يفيدني في موضوع دعم المنطقه والتعريب والأمور هذي، لانه هو اللي يدير الأمور الخاصة بالمنطقة، عكس كوجيما اللي فضّلنا نستفيد منه في اسئلة عن فكره والعابه.

رحت عند شينجي هيرانو واستأذنت اسوي معه مقابله، واجريناها عند وحده من الدفايات الكبيره عشان ما اموت برد. دار بيني وبينه الحوار:

قلت لي اول ما قابلتك اليوم ان كونامي مهتمه جدا الآن في دعم هذه المنطقه اكثر من السابق، وش اللي أشعل هذا الاهتمام؟

هيرانو: لاني عادة ما اشوف الا ارقام المبيعات وانها في ازدياد مستمر، لكن ما كنت افهم ليش. بس بعد زياراتي الى الامارات والسعودية، شفت أخيراً الناس اللي يلعبون هالالعاب، وكيف يجيبون معلومات عن الالعاب، ومدى عشقهم للعب هذي الالعاب. شيء بدا لي مختلف عن باقي الدول، وبدت لي كفرصه ممتازة للاستثمار.

بس يفترض ان الشي اللي يثير اهتمامك هو المبيعات بما انكم شركة ربحيه.

هيرانو: طبيعي نبحث عن الربح، ودائماً مشكلتنا الاساسيه هنا هي السوق الرمادية (السوق اللي يتم فيه شراء المنتجات ثم بيعها بسعر أقل من سعرها المحدّد له)، وما اتخذنا اجراء حقيقي لتجاوز هذي المشكلة. بس شفنا منافسينا جالسين يعربون الالعاب بشكل جميل عشان يتجاوزون هذي المشكله. فاذا سوينا شغل افضل، فاتوقع ممكن نتجاوز هالمشكله.

طيب ما فكرت مثلاً تخلي الالعاب المخصصة لمنطقتنا متوفره فقط عن طريق التحميل عشان ما تواجهون هالمشكله؟

هيرانو: ممكن، بس ما اتوقع اننا راح نسويها.

بالمناسبة، هل عندكم اي خطط تبدون شبكة خاصة فيكم زي ستيم أو أوريجين؟

هيرانو: ما اقدر اقول وش جالسين نسوي بالضبط، بس حنا جالسين نسوي شي زي كذا.

بيكون للبي سي فقط ولا الاجهزة المنزلية فقط ولا كل الاجهزة؟

هيرانو: لا لا كل الاجهزة. لازم نفكّر كيف نتواصل مع اللاعب بعد ما يشتري اللعبة، وكيف نقدر نوصل له، وكيف نقدر نجذبه. وعشان تتوفر هالاشياء لازم تصير عندنا شبكة خاصة فينا.

طيب هل بدأتوا تشتغلون على تعريب العاب اخرى في كونامي؟

هيرانو: نعم، لاننا نعتقد ان هذا السوق مهم جداً، مو بس Pro Evolution Soccer اللي عربناها فعلياً، ولكن نبي نعرّب أكبر قدر ممكن من الالعاب.

تقدر تذكر امثلة لالعاب جالسين تعربونها؟

هيرانو: لاااااااا *قالها باستهبال*

ولا وحده بس؟

هيرانو: للأسف ما اقدر، لاننا جالسين نضبّط الوقت المناسب للاعلان عن الشيء هذا، فما نقدر نقول الآن.

طيب خلينا نتكلم عن وحده من العابكم اللي هي Pro Evolution Soccer، هل انتم نادمين انكم ما طورتوا اللعبه بالسرعه المطلوبه بعد ما شفتوا منافسكم (فيفا) يتطور بشكل سريع؟ هل تقول يا ليتنا تصرّفنا بشكل أفضل؟ او تعتقد انكم مشيتوا صح لكن الظروف ما ساعدتكم؟

هيرانو: بالنسبة لسوق الشرق الاوسط، حنا متأخرين بشكل واضح جداً، يمكن بسنتين او ثلاث سنوات حتى. فحالياً حنا نحاول نوصل للي حققوه ونتنافس معهم. نحن قادمون!

بس اللي شفناه الى الآن من Pro Evolution Soccer ان في كل اصدار جديد يكون التطوّر فيه بسيط نسبياً، وماهو بالحجم اللي يأهلكم للمنافسة..

هيرانو: *قاطعني* قصدك في اللعب نفسه؟

مو في اللعب نفسه فقط، اقصد حتى في الخصائص اللي تقدمها اللعبه، في الاونلاين، واللعبة ككل. تحس انها تطويرات بسيطه، ماهي قفزات كبيره. هل ناوين تغيرون هالاسلوب في الاصدارات القادمة؟

هيرانو: اكيد، اكيد. شف، في بعض الاجزاء في اللعبه نعتقد اننا ننافس بشكل أكبر، لكن اجمالاً واضح اننا متأخرين، فراح نبذل جهدنا اننا نوصل لمستوى المنافس.

طيب خلينا نرجع لسالفة منطقتنا، هل قضيت بعض من وقتك للعمل مع الشركات في السعودية، او كان تركيزك على الامارات فقط؟ لان مثل ما تعرف سوقنا في السعودية هو السوق الأكبر في المنطقة.

هيرانو: للأسف ما امداني اروح لقطر أو عمان او بعض الدول الثانية، لكن الامارات والسعودية زرتهم أكثر من مره، وعندي عدة جهات اتصال وداعمين لمنتجاتنا في السعودية، فنعم أكيد.

سؤال آخر … بس لحظة نسيته من كثر ما الدفايه هذي حاره، خلينا نوخر بعيد عنها شوي..

هيرانو: *يضحك*

وش هي الخطوة القادمه اللي بتتخذونها لدعم منطقتنا أكثر؟ مو لازم تقول لي اسماء العاب، بس ودي اعرف توجهكم، هل هو دعم الالعاب عن طريق التعريب الكامل؟ او الترجمة؟ او انشاء محتوى خاص بالمنطقة؟

هيرانو: جالسين نفكر بكل هذي الاشياء

بس ابي اعرف الخطوة القادمة

هيرانو: بالمناسبة،شغلنا مو بس على الالعاب فقط، جالسين نخطط نشتغل حتى الاماكن اللي ممكن نجمع فيها اللاعبين هنا في المنطقة زي البطولات والاحداث الخاصة.

طيب الحين بعض الشركات تواجه مشكله في ان محتوى بعض العابها ماهو مناسب للمنطقة. تكون اللعبه مثلاً فيها تعرّي، او مشاهد جنسية أو اياً كان. هل احد خططكم انكم تطلقون نسخ خاصة ما يكون فيها هالاشياء لمناطق محافظة زي دول الشرق الاوسط؟

هيرانو: همممم *يفكر ويعطيني نظرة استغراب*، بس ما عندنا لعبه زي كذا الحين *يضحك*

ادري بس انا اسأل يعني، لان يجونك مطوّرين مرات يقولون ما نبي نشيل هالمشاهد عشان ما تضر بتجربة اللعبة او تضر باللعبة نفسها

هيرانو: لنا تجربة كبيره حتى في اجهزة الآركيد اللي كنا نجيبها هنا وكنا نضطر نسوي بعض التعديلات عليها. تعديل الالعاب عشان تصير مناسبة للمنطقة هو شي نبي نسويه، ما راح نقول لا والله ما نبي نشيل اشياء غير مناسبة من الالعاب عشان ما نخربها.

حتى لو هو شي يتطلب انك تشيل مشاهد تعري وكذا؟

هيرانو: ايه ايه اكيد

قد سويتوها قبل؟

هيرانو: مو على العاب الاجهزة المنزلية، بس سويناها على بعض العاب الآركيد.

آخر سؤال، هل خططتوا لأي مبادرة لتدريب وتطوير مهارات المطوّرين المحليين في الشرق الأوسط؟ عشان يمكن حتى يساعدون في اشياء أخرى مو بس في التعريب، مثل انشاء العاب محلية لكم، لان سوني سوّت شي زي كذا في السابق.

هيرانو: الى الآن ما فكرنا نستعين بشي له علاقه بالتطوير في المنطقة، لكن اللي يهمنا اشياء لها علاقه بدعمنا أكثر بحيث نعرف كيف نخلي العابنا مناسبة للمنطقة أكثر، وفعلياً بدينا نشتغل مع جهات محلية عندكم.

بس مو مخططين تدعمون مطورّين محليين بحيث يسوون محتوى محلي لالعاب كونامي؟

هيرانو: حالياً لا، وما عندنا اي اتصالات مع اي مطوّرين محليين، بس مجرد ما نتعرف على بعض المطوّرين، ممكن نلتقي معهم ونشوف كيف ممكن نشتغل سوا.

شكراً لك على وقتك

هيرانو: شكرأً

—–

خلال اللقاء كان واضح على شينجي هيرانوا اهتمامه وحماسه بدعم المنطقة بشكل أكبر، ماهو بس مجاملات. تمنّيت انه ما تهرّب من اجابة بعض الاسئلة المهمّة، لكن في نفس الوقت ما حبيت اضغط عليه عشان ما يصير متحفّظ زياده في الكلام.

شخصياً متخوّف نوعا من الشبكة اللي ناوين يسوونها. اذا كانت اي شي زي نظام الأونلاين حق Metal Gear Solid 4 اول ما نزلت، فسلم لي عليها من الحين. بس اجمالاً الوضع يبشّر بالخير.

وش أكثر شي اثار اهتمامك في كلامه؟ شاركنا برأيك في التعليقات

الوسوم
اظهر المزيد

مشهور الدبيان

مؤسس سعودي جيمر، متخصص في تطوير المواقع والتطبيقات، ومهتم في الذكاء الاصطناعي.
إغلاق