مقالات

سلاسل بأجزائها الثانية تفوقت عن أجزائها الأولى

3369857

من فينا بحياته الجيمريه ما أعجب بسلسله معينه..كلنا عندنا سلاسل اعجبتنا ونتمنى صدور اجزاء جديده لها بتطور ونقله افضل من الاجزاء السابقه..طبعا أغلبنا عشق سلسله معينه من جزئها الاول وبعدها يتعلق بالسلسله ويجرب باقي الاجزاء..الغريب هنا ان أغلب السلاسل الجزء الاول لها يكون هو الافضل وهو الأساس بالسلسله..لكن مقالتنا لليوم راح أذكر سلاسل الجزء الثاني لها يعتبر متفوق عن الجزء الاول للسلسله بشغلات كثيره..نشوف وش الاجزاء الي تفوقت عن الجزء الاول من سلسله معينه:

Assassin’s Creed II

ac2pic

سلسلة (Assassin’s Creed) من أقوى السلاسل بالجيل الماضي أذا ما كانت الأفضل..الجزء الأول بالنسبه لي كان أسطوري بمعنى الكلمه، فكرة اللعبه المميزه، أجواء اللعبه الخرافيه والي كانت مصممه بطريقة ممتازه لأبعد الحدود، غير فكرة العالم المفتوح بزمن جدا قديم وقصص تهتم فيها، لكن للأسف الجزء الاول ما كانت تقايمه عاليه وحتى البعض ما كان يقدر يكمل اللعبه لأسباب كثيره منها التكرار، لكن شركة (Ubisoft) ما أستسلمت من مستقبل اللعبه وأصدرت الجزء الثاني بعام 2009، أقدر أقولكم من أقوى النقلات الي صارت بعالم الالعاب والسلاسل خاصه، الجزء الثاني من السلسله أقدر أقولها وبكل صراحه صلح كل الشغلات الناقصه بالجزء الاول، قصه مميزه، عالم مفتوح بشكل مميز وبتصميم خرافي وتقدر تتنقل بأكثر من مدينه، مهام جانبيه، عمر طويل للعبه، كل هالشغلات وميزات ثانيه أجبرتنا نحترم سلسلة (Assassin’s Creed) ونتقبل انها تكون سلسله مميزه عن باقي السلاسل، ونقدر نقول بكل أريحيه تفوقها الواضح عن الجزء الاول من السلسله.

Uncharted 2

uncharted2pic

عودة الفريق القوية (Naughty Dog) بالجيل الماضي مع وحده من أقوى السلاسل الحصريه سلسلة (Uncharted) حصرية جهاز الـ (PS3), قرر فريق (Naughty Dog) أنه يترك العاب المناقز (Platform) وينتقل للألعاب الأكثر جديه والي يكون فيها كذا عنصر بطريقة اللعب، نزل الجزء الأول من السلسله بعام 2007، كان يعتبر نقله قويه لفريق التطوير، الجزء الأول ما كان سيء أبدا..كان يعتبر من الحصريات القويه لجهاز الـ (PS3) بأول عمره، كانت طريقة اللعب فيها حريه مميزه، تصاميم المراحل متعه للعين، التمثيل الصوتي وأسلوب النكت الي تميزت فيها السلسله كل هالشغلات كانت ممتازه جدا، الي كان يعيب الجزء الاول عدم التنوع بطريقة اللعب، قصه مالها أي أهميه، اللعبه كان يحتاج لها وقت عشان تطلع بالشكل الي يتمناه فريق التطوير..لكن أجزم لكم ان كل هالكلام تغير جذريا مع الجزء الثاني من السلسله..صدر الجزء الثاني بعام 2009 وكان عباره عن نقله نوعيه من الجزء الاول، تنوع المراحل المجنون بالجزء هذا يخليك تعشق السلسله تلقائيا، طريقة طرح القصه لك من أول عرض ببداية اللعبه يعلق اي شخص لعبها، طريقة اللعب الي أقدر أقول تنوعت عن الجزء الاول أضعاف مضاعفه، وأخيرا ما وقفت السلسله هنا وأخذت كل المميزات الي كانت بالجزء الأول وحسنتها تماما، لدرجة انها أخذت لعبة السنه لعام 2009 (Game of The Year) للعبه حصريه وهالشي يعتبر جدا نااادر بعالم الالعاب.

Borderlands 2

borderlands2pic

السلسله الي تقريبا أضافت لك جميع خصائص الالعاب بلعبه وحده..سلسلة (BorderLands) من تطوير الفريق المعروف (Gearbox Software)..الجزء الاول من السلسله صدر بعام 2009 وكان نقله نوعيه بعالم الالعاب..العالم المفتوح بطريقة لعب منظور الشخص الاول (First Person Shooter)، أجواء اللعبه المميزه عن باقي الالعاب، عدد الاسلحه والدروع المهول باللعبه، عالم الاونلاين وتقدر تختمها انت وعدد من اخوياك، كانت جدا ممتازه..بعام 2012 تم أصدار الجزء الثاني من السلسله، والاغلب توقع انها تكون نفس الجزء الاول بس بتحسينات طفيفه، أقدر أقولكم ان الجزء الثاني كـ محتويات وعوالم وطرق تنقل أكثر من الجزء الاول بمراحل، غير كذا تنوع الشخصيات باللعبه وتقدر تختار النوع الي يناسب أسلوبك باللعب، أسلحه ودروع ووسائل نقل ما تقدر تعدها من كثرها، الاونلاين في تختيم اللعب جدا ثابت حتى لو تختمها بوجود ثلاثه من اخوياك ما راح تحس بمشاكل، الكوميديا الي باللعبه جدا رهيبه والشخصيات الي تقابلها بالقصه تعطي اللعبه نكهه خااصه، الجزء الثاني حقق تقايم ومبيعات أكثر من الأول بمراحل وليومك هذا فيه ناس ترجع تلعبها وتجرب اضافاتها الكثيره والمنوعه (DLC).

أخيراً…

هنا نكون وصلنا لنهاية مقالتنا لليوم..هذي بعض السلاسل الي كانت بالجيل الماضي وتفوقت بجزئها الثاني عن الاول بمراحل..علمنا رائيك عن السلاسل الي تشوفها بتحسن مستمر، وعن افضل الاجزاء الثانيه من السلاسل الي تشوفها تفوقت عن الجزء الاول..نبغى نشوف ردك بالتعليقات.

الوسوم
اظهر المزيد

محمد الدوسري

هاردكور جيمر من ايام الـ16Bit .. أغلب انواع الالعاب تعجبني .. وألعب بجميع الاجهزهـ المنزليه والمحموله والـPC بدون اي تفضيل .. سلاسل كثير تعجبني ولكن جميعهم بخلف سلسلة The Legend of Zelda .
إغلاق