يزيد السويري
صرحت شركة كرايتك ( Crytek ) على موقعها عن كذا سبب ليش أن نسخة البي سي ما راح تكون مجرد بورت ( نسخة منقولة لجهاز آخر ) رخيص عشان تربح كم ريال زيادة بس، بالعكس راح يكون في عدة خيارات لاعدادات الرسوم و نسخة الحاسب ما راح يكون فيها نظام الMicrotransactions أو مشتريات داخل اللعبة، وهي عبارة عن سلع وأغراض تشتريها من داخل اللعبة بفلوس حقيقية غير عملة اللعبة لتسريع التطوير أو شراء أقوى الاسلحة بدون ما تبذل أي مجهود.
أول سبب على كلام الشركة هو أن اللعبة بتدعم وضوح 4K الخارق اللي بيخلي لاعبين البي سي يسعبلون من قوة الخقة. وبعد اللعبة راح يكون فيها خيار يسمح لك تخلي عدد الاطارات بالثانية مفتوح بدون حد أو تقدر تثبتها على 30 إطار بالثانية عشان تضمن أداء ثابت أكثر. وفيه بعد إعدادات إضافية زي ترقية الرسوم والاضاءة والضلال وتنعيم الحواف ونعومة الحركة وأشياء ثانية مب غريبة على لاعبين البي سي.
بالاضافة الى أن اللعبة بيكون فيها جميع الاضافات الاربع اللي نزلت على الاكسبوكس ون زي الخرائط والاطوار الجديدة لطور تعدد اللاعبين وأيضا طور النجاة ( Survival mode ).
وأخيرا اللعبة بتدعم يد تحكم الاكسبوكس 360 والاكسبوكس ون بعد وبتنزل في تاريخ 10 أوكتوبر على شبكة ستيم.
شيء جميل إنهم مشتغلين بضمير على نسخة البي سي عادة المطورين ينزلون نسخة أي كلام مليانة مشاكل وخرابات زي ما صار مع لعبة ديد رايزنق 3. وش رايكم أعزائي هل أنتم متحمسين للعبة خصوصا بعد ما قرروا يشيلون نظام المشتريات داخل اللعبة أو لا؟ شاركونا أرائكم في التعليقات.
أحمد عصام
