وش سالفة اللعبة
أولّي أولّي (احس المفروض ذي تصير اغنيتهم الرسمية) هي لعبة تزلّج بسيطه على الفيتا. من الألعاب اللي تعتمد بشكل رئيسي على انك تتقن كل المهارات اللي في اللعبة عشان تحقّق أعلى نقاط.
معلومات اللعبة
الناشر: Roll7
المطور: Roll7
تاريخ الإصدار: 2014/01/22
النوع: رياضة
التصنيف العمري: PEGI 3+
عمر اللعبة: 15 ساعة (تقريبي)
الأجهزة الخاصة باللعبة: PS Vita
تحتاج إنجليزي؟: نص ونص
الايجابيات
- لعبة ادمانيه صعب تتركها أو ما تبدا تلعب فيها. من الألعاب اللي تخليك تقول “بحاول أصير أحسن هالمرة بس” وفجأه تلقى نفسك جلست ساعه تلعب.
- مراحل كثيرة بتشغلك وقت طويل. 25 مرحلة، وكل مرحلة لها مرحلة أصعب مقابلة لها (صار المجموع 50)، تقدر تلعب كل المراحل بطور مختلف اسمه Spots، يعني 100 مرحلة تقريباً.
- طور ديلي قرايند (Daily Grind) هو تحدّي يومي بين جميع لاعبين اللعبة. كل يوم بتطلع مرحلة الكل بيحاول يجيب أعلى نقاط فيها. تقدر تتدرّب فيها زي ماتبي، بس اذا جا وقت المنافسة على النقاط فما راح يكون عندك الا محاولة وحده بس! فكرته رهيبه مره تطوّل من عمر اللعبة، وتعطي فرصه للكل انهم يتنافسون على أعلى النقاط.
السلبيات
- التحكّم مزعج ويلخبط وغير عملي نهائياً، خاصة الحركات اللي لازم تستخدم فيها الأزرار العلوية (R و L). بتجلس فترة طويلة الى ما تتعوّد عليه. والمصيبة انك ما تقدر تعدّل على التحكّم عشان يناسبك بشكل أفضل. أغلب المرات اللي وقفت فيها لعب كانت بسبب نرفزتي من التحكّم.
- اذا أنهيت تحدّي معيّن في مرحلة، مو لازم تخلّص المرحلة عشان ينحسب لك انك أنجزته. مطلوب منك تجمّع 50 ألف نقطه؟ جمّعها ثم موّت نفسك، بتنحسب لك لا تخاف. هالشي يقلّل بشكل كبير من الحماس والتحدّي اللي موجودين في اللعبة، لأن التحدّيات تحدّيات خاصة بمراحلها ماهي تحدّيات عامة تقدر تسويها في أي مكان في اللعبة.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
لعبة أولّي أولّي لعبة ممتازة بس للأسف خرّبت على نفسها بالتحكّم التعبان وعدم امكانية تغييره. وعموماً في حال كنت من اللي يحبّون الألعاب اللي تحتاج مهاره عشان تتقنها، وتحب تجميع النقاط، فلعبة أولي أولي من الألعاب اللي لازم تشتريها على الفيتا.
ألعاب مشابهة
- Tony Hawk’s Pro Skater (بس هذيك ثري دي)
- Skate (بس هذيك ثري دي)
فيديو اللعبة
