مشهور الدبيان
وش سالفة اللعبة
“نيدهوق” هي لعبة مبارزة سيوف بسيطة ومميّزة، بس فكرتها غريبة شوي. عشان تفوز لازم توصل للطرف المقابل من المرحلة، مو انك تقتل خصمك. بس طبعاً عشان توصل للطرف المقابل لازم تتخلّص من خصمك لأنه بيكون بطريقك، وكل مره تقتله بيرجع ثاني مره يحاول يوقّفك. فعلياً تقدر تهرب منه، بس المرحلة ما راح تسمح لك تتقدّم ناحية هدفك الا اذا قتلت خصمك مره وحده على الاقل. انلحس مخك؟ لا تشيل هم، لو تشوف لها أي فيديو بتفهم الفكرة بسرعة.
معلومات اللعبة
الايجابيات
- أسلوب الرسم رهيب ببساطة. لا تخلّي بساطة الصوره تخدعك، المؤثرات والحركات (الانميشن) اللي بتشوفهم في اللعبة رهيبين!
- توازن ممتاز في اللعب بما ان شخصيتك وشخصية خصمك عندهم نفس الحركات بالضبط، بالاضافة الى ان المرحلة مصمّمة بحيث تعيق الخصم قبل ما يوصل النهاية، بحيث تعطيك فرصه تصلّح وضعك اذا جبت العيد. واذا ضايقتك بعض الحركات الموجودة فتقدر تعطّلها في الاعدادات بدون مشاكل.
- اللعبة المثالية لجمعاتك مع أهلك أو اخوياك: لاعب ضد لاعب، وتحكّم سهل جداً، وفكرة أسهل، ولعبة تخلص بسرعه (دقيقه او دقيقتين) وتقدر تسوي دوري بينكم. وش تبي أكثر من كذا؟
- اذا طفشت من اللعبة تقدر تشغّل بعض التعديلات اللي موجودة في الاعدادات بحيث تغيّر لك في اللعب، زي انك تخلي اللعب بالحركة البطيئة، أو انك تفعّل “طور الاطفال” اللي يخلّي اللاعبين يحبون على الارض. بيقلب اللعب ضحك.
السلبيات
- الأونلاين تعبان واللاق فيه مزعج. وفي حال كنت تلعب مع واحد في دوله ثانيه فراح تواجه كمّية لاق تخليك ما تقدر تلعب زين أساساً. استغرب اللاق هذا على لعبة بسيطة جداً زي كذا.
- سعر اللعبة أشوفه مرتفع شوي على لعبة بسيطة زي كذا (15 دولار – 56 ريال). برأيي ان 5 دولار مناسبة جداً لها.
- اللعبة صعب تستمتع فيها وانت بالبيت لحالك. طور اللعب الفردي تمل منه بسرعه، وطور الأونلاين “لازم” تلعب مع اخوياك، مافيه خيار انك تلعب مع أحد عشوائي مثلاً.
- مراحل محدودة، ما عندك الا 4 مراحل بس.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
لعبة "نيدهوق" من الألعاب القليلة جداً اللي ممكن تشغّلها في أي جمعة والكل ينبسط فيها. هذي من الألعاب اللي لازم تجربها اذا كان فيه ناس تلعبها معهم. لاحظ اني قلت "ناس"، مب خويك اللي ممكن يسلّك لك مره او مرتين بعدين يسحب عليك. لأن اذا مافيه ناس تلعبها معهم في النت أو في برا النت فراح تمل منها بسرعه.
ألعاب مشابهة
اللعبة شاطحة مافيه شي يشبهها حالياً
فيديو اللعبة
Loading ...
عبد الله محمد
Saudi Gamer
احمد خالد
عصام الشهوان