الايجابيات
- قصة بسيطة وسهلة للفهم، تقدر تعطيها لأخوك الصغير يفهمها بدون أي مصاعب.
- نظام قتال سهل وبسيط تتعلم عليه بسرعة.
- تغيير حجم ناك في اللعب بحيث يصير حجمه كبير أو صغير، ويغيّر عليك طريقة القتال مع الأعداء.
- تحكم ممتاز. أزرار التحكم تم توزيعها بدون أي فلسفة، وكلها تؤدي غرضها بالكامل. ما لاحظت ان فيه مشاكل مزعجة، مثل المناقز الغريب اللي عانينا منه في LittleBigPlanet.
- عمر اللعبة ممتاز، ولا تحس ان فيه تطويل أو تلفيق أو غيره. خلصت اللعبة في حوالي 13 ولا حسيت بأن فيها تلفيق أو تمغيط.
- مراحل مختلفة ومتنوعة. في خلال رحلتي مع اللعبة، لقيت بيئات بركانية، ثلجية، مدنية، بريّة، كل البيئات موجودة تقريباً.
- بالاضافة الى المراحل المختلفة، المراحل تم تصميمها بشكل واضح بحيث ما يضيع اللاعب. حسّيت ان الشي هذا تم تطويره بالعاني لان جمهور اللعبة المستهدف هم صغار السن.
- أعجبتني فلسفة جديدة في تصميم بيئات المراحل: كل المراحل تبدأ بنفس البيئة وهي بيئة عشبية شبيهة بالغابات، بعدين تبدأ تدخل شوي شوي الى تصميم البيئة الفعلي للمرحلة، سواءً كان بركاني أو ثلجي أو غيره.
- لعبة مناقز جيّدة، بحيث تلاحظ نفسك في اللعبة تناقز كثير وتحل ألغاز بسيطة تضيف ايجابياً الى تجربة اللعبة.
السلبيات
- الشخصية الرئيسية، ناك، ما تحس انه وصل الى مستوى كراش، أو حتى ساك بوي وغيره من شخصيات سوني.
- تفاوت الصعوبات بشكل غريب. بعض المراحل تخلصها بدون ما تموت ولا مرة، وبعضها تموت فيها فوق العشر مرات.
- نظام تخزين اللعبة مضروب. يا كثر ما عانيت من حركة اني أموت في مكان وألقى نفسي رجعت ورا الى مكان بعيد، وهذا شي مزعج جداً.
- كل أصوات الشخصيات متوافق معها، باستثناء ناك. في كثير من الأحيان حسيت ان صوته ماهو راكب عليه، خصوصاً اذا صار حجمه صغير.
- على ان المراحل تم تصميمها بشكل واضح بحيث ما تضيّع اللاعب، الا اني أتصوّر البعض يشتكي من خطيّة اللعبة وعدم اعطاءها اللاعب خيارات أو استكشاف وغيره.
- نظام تعاوني (co-op) سيء. تحس انهم في آخر مراحل التطوير قرروا يضيفونه. ما أنصح انك تلعبه أبداً.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
اذا تبغى لعبة تطقطق عليها وتنبسط وتلعبها من غير تركيز كبير، تلعبها وأنت تسولف مع اللي يمينك وتضحك مع اللي يسارك، فناك تصلح لك. اللعبة بسيطة وواضحة من البداية، لكن يتخللها بعض العيوب الغريبة مثل نظام التخزين الغريب، وتفاوت الصعوبات في المراحل. وهذي احتمال تغيّر رأي اللاعب عنها بشكل كامل!
ألعاب مشابهة
- LittleBigPlanet
- Crash
- Mario
