الايجابيات
- القصة : تخلت روكستار عن قصصها المعتادة اللي تدور حول “الحلم الأمريكي” و أن البطل غلبان و مضطر يعيش حياة الإجرام، أما الان ركزوا على قصة أمريكا الواقعية اللي تدور حول عالم الفساد العام و الغش و الأوضاع الإقتصادية و الخيانات و الإنحطاط.
- ثلاث شخصيات متميزة فلكل شخصية قصته و طابعه الخاص فيه، مايكل الشخصية الغنية “الشبعان” و الطفشان في حياته و مشاكله العائلية، فرانكلن من الأحياء الفقيرة و عاش حياة العصابات و يبي يحسن وضعه بأي طريقة، و بعدين عندك (تريفور) الطعس اللي يسمونهم Rednecks هذا كوم لحاله و تحسه فاصل أغلب الوقت ووضعه العقلي غير مستقر يعني هذا تتوقع منه أي شي! و فعلياً هو شخصيتي المفضلة… بالإضافة عندك قصتهم لمن يجتمعون و الأحداث الناجمة عن هذا الشي.
- التمثيل ينافس أو يتخطى التمثيل في أفلام هوليوود، سواء من التمثيل الصوتي اللي تلاقي كل شخصية صوته و أسلوبه في الكلام واقعي جداً و راكب عليه، مثلا مايكل و كلامه المرتب أو فرانكين و أسلوب الكلام الشوارعي. أو حتى حركات الشخصية في المشي و تفاعله مع البيئة تلاقي كل واحد له جووه الخاص.
- العالم كبير و حيوي جداً، راح يستانس عليه الناس اللي يحبوا الإستكشاف و البحث لأنه أفضل شي في لوس سانتوس أن تقريباً كل مكان راح تلقي فيه شيء جالس يصير أو فعاليات تقدر تشارك فيها، مثلا طلعت فوق جبل و لقيت ناس يبون يسابقوني بدبابات، ركبت قارب و رحت شاطئ منعزل و مهجور لقيت فيها ناس سكرانين يحتفلون، مشيت في غابة و جا نمر بريء أفترسني، طلعت فوق ناطحة سحاب لقيت واحد يبيني أشاركه في القفز المظلي، و مع أني مختم اللعبة إلا أنه باقي مناطق كثيرة في الخريطة ما زرتها و متحمس أرجع و أكتشف كل الأشياء اللي فاتتني.
- مهمات السطو تحسسك بحماس غير طبيعي لأنك في هذا الجزء تشارك في كل خطوة و تفاصيلها، أولاً تحتاج تختار الخطة اللي تبي تنفذ فيها العملية، هل تحب تسوي العملية بخطة ذكية و محكمة؟ ولا إنت من النوع اللي تحب الدرعمة؟ بعدها تختار الطاقم اللي ينفذ معك العملية بإحكام لأن خبراتهم تختلف عن بعض، بعدها تحتاج تجهز أدوات العملية المطلوبة حسب الخطة اللي انت اخترتها. و أحلى شعور لمن تبدأ العملية و تتنفذ الخطة بالشكل اللي تبيه و لو صار شي غير متوقع كيف يتفاعل الفريق لتصحيح الأوضاع، بالفعل تحس انك مشارك في عملية سطو مثل ما تشوف في الأفلام السينمائية و أتذكر بالتحديد فيلم “Heat” و فيلم “Ocean’s eleven”.
- نظام التغيير بين الشخصيات الثلاثة أبهرتني فوق التوقعات، في البداية كنت من المشككين و قلت ما اتوقع انهم بيضبطونها، لكن على عكس توقعاتي نظام التغيير هذا من أكثر الأشياء اللي عجبتني في اللعبة لعدة أسباب منها أني أشارك في عمليات السطو من كل النواحي مثلا في أوقات أحتاج أكون قناص و أراقب المنطقة و في وقت ثاني احول إلى الشخصية اللي يسوق الطائرة المروحية، ووقت المعارك أحول إلى الشخصية اللي في ساحة المعركة بالإضافة الى إني أوزع الشخصيات بشكل استراتيجي بحيث أغطي كل المداخل و المخارج عشان لا يجون الأعداء من ورا. السبب الثاني اللي زاد إعجابي في هذا الشي هو اني ما أمل من الشخصيات أبداً، يعني لو حسيت أني بديت أطفش من مايكل احول على تريفور و أشوف ايش جالس يخبص في حياته و تشوف ايش كان يسوي مرات ادخل عليه ألاقيه يتحرش في الفقراء ولا ألاقيه سكران و نايم في وسط الشارع بملابسه الداخلية.
- لكل شخصية نقاط قوة يتميز فيها عن غيره مثل واحد شاطر في السواقة و الثاني في الطياران و الثالث في القنص و هكذا و هذا الشي يزيد في الواقعية و في المهمات تختار الشخصيات المناسبة، مب مثل الأجزاء اللي فاتت اللي البطل فيها سوبرمان يعرف يسوي كل شي في العالم “اسف يا نيكو”.
- العالم مليء بالمهمات الجانبية العشوائية و مب شرط تشارك فيها أو تساعدهم، بس أحيانا تكتشف انك ساعدت شخص مهم و تلاقي نفسك في قصة عميقة و مثيرة و تجيك جائزة ما تكون متوقعها أساساً و مب شرط الجائزة تكون دائما حاجة كويسة!
- الشرطة و الجيش أخيرا صار لهم شوية هيبة و قوة، في الأجزاء السابقة الشرطة كانوا شي تستانس و تستهبل عليهم، الان ممكن تموت كذا مرة عشان تخلص مهمة و يجبرونك تستخدم خاصية الإحتماء خلف الجدران و اختياء أماكن مناسبة للمواجهة.
- المركبات بأنواعها، السيارات و تلغيمها و سواقتها، القوارب و الجت سكي، الغواصات، الطائرات النفاثة و المروحية، حتى دراجات السيكل و دباب التطعيس أبو أربعة كفرات كلها تضيف إلى متعة اللعبة.
السلبيات
- أحياناً يصير تقطيع في الشاشة بس هذا الشي نادر و فعلياً ما يأثر على التجربة.
- مناظر خادشة للحياء كان من الممكن يتجنبونها.
- كنت متأمل أشوف تنوع أكثر في موديلات السيارات، لأني أحياناً أشوف السيارات تتكرر بشكل مزعج عند الإشارات.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
شركة Rockstar دائماً تضع الأسس و ترفع المقياس في عالم الألعاب، بعض الألعاب تختمها لأنك مجبور تحلل قيمتها لكن GTA 5 من الألعاب اللي تحزن أنك ختمتها و كان ودك أنها تستمر القصة لفترة أطول. أنبهرت في اللعبة من كل النواحي لدرجة أني عانيت ألقى فيها عيوب ووقتها عرفت أن اللعبة تستحق التقييم الأسطوري بكل جدارة!
ألعاب مشابهة
- Saints Row 4
- Red Dead Redemption
فيديو اللعبة
