محمد الشريف
هي لعبة خليط ما بين الألغاز والمغامرة، بشكل فكاهي وبرسومات كرتونية 2D (تروح يمين ويسار بس). طريقة اللعب انك تنتقل بين كواكب وتحل ألغاز، الألغاز هذي تطلع لك من خلال تفاعلك مع العالم اللي حولك: تروح تكلم واحد من الشخصيات يروح يعطيك مشكلته، وانت تحاول تحلها. طريقة الحل هي انك تختار الملصق (أو ستيكر) المناسب، الستيكر هذا يتحوّل الى كائن يتفاعل في العالم، وبكذا تصير حليت اللغز!
الايجابيات
- تدعم ميزة Cross Buy. اشتر اللعبة على أي جهاز من الأجهزة الثلاثة بسعر واحد وراح تحصل على الثلاث نسخ على كل الأجهزة!
- عالم كرتوني تم تصميمه بشكل رائع ودقيق، هذا أجمل عالم كرتوني شفته على البلاي ستيشن 4 للآن!
- ألغاز جانبية تتكون من أسئلة نفسية، بحيث يعطونك في الأخير نتائج لشخصيتك!
- اللعبة كلها استهبال وضحك. المحادثات في اللعبة، الشخصيات، المشاكل اللي تواجهها، الحلول، كل شي في اللعبة فكاهي!
- على ان اللعبة قيمتها 10 دولار، الا ان محتواها كبير وفاق التصوّر اللي توقعته لها.
- ألغاز طريفة وسهلة. ما فيها ألغاز تفك الراس من كثر التفكير، كل اللي تحتاجه انك تقرا الكلام وتختار الستيكر الصحيح.
- عوالم كثيرة ومختلفة، ومضحكة! فيه أنواع وأشكال العوالم اللي تروح لها، كلها لها تصميمها الخاص: كوكب ثلجي اسمه Brrr (يعني برد)، كوكب Ert يشبه كوكب الأرض، وغيرها الكثير من العوالم اللي استمتعت فيها.
- طريقة بناء العلاقات مع الشخصيات ماهي بديهية مثل أكثر الألعاب. كثير من المواقف أختار خيارات كنت أعتقد انها اختيار يرضي الشخصية، لكن أتفاجأ انه يفسرها بطريقة ثانية ويزعل مني!
- تحكم سهل، أي شخص يتعلم عليه. أقدر أتصوّر ان صغار السن (اللي يعرفون انجليزي طبعاً) بيلعبونها ويحبونها.
السلبيات
- بعض الطلبات في الألغاز غير واضحة ومبهمة، مثل: جب لي شي غامض، أو جب لي شي شكله حلو. هذي الطلبات مبهمة وعامة بزيادة، خصوصاً وان اللعبة تحتوي على 330 ستيكر!
- ما فيها تمثيل صوتي. اللي ما يحبون القراءة راح يعتبرون هذا عيب كبير، خصوصاً وان الحوارات كثيرة مرة.
- تكرار في بعض المهمات، سواءً أساسية أو فرعية.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
دوكي دوكي يونيفيرنس -على اسمها- لعبة غريبة عجيبة خلطت عناصر كثيرة مع بعضها وضبطتها، بحيث طلع لك في الأخير لعبة رائعة. لو جمعت هالأشياء وأضفت عليها المحتوى الكبير اللي فيها، مقارنة مع سعرها، وانك اذا اشتريت نسخة وحدة تجيك نسختين مجاناً على أجهزة بلاي ستيشن الثانية، تطلع بلعبة ممتازة.
ألعاب مشابهة
مثل ما ذكرت، اللعبة غريبة ما فيه لعبة تشبهها. بحثت في كل مكان ولا لقيت لها شبيه حقيقي.
فيديو اللعبة
Loading ...
عصام الشهوان
Saudi Gamer
سندس الخباز
احمد خالد