وش سالفة اللعبة
لعبة بنظام الآكشن RPG في عالم ضخم، وتعتبر من أصعب سلاسل الألعاب الموجودة حالياً.
معلومات اللعبة
الناشر: Namco Bandai
المطور: From Software
تاريخ الإصدار: 2014/03/14
النوع: أكشن RPG
التصنيف العمري: PEGI 16+
عمر اللعبة: 40 ساعة (تقريبي)
الأجهزة الخاصة باللعبة: Xbox 360, PS3 (جهاز التقييم), PC
تحتاج إنجليزي؟: تحتاج
الايجابيات
- تحدّيات صعبة (وبعضها تحس انه شبه مستحيل) تجبرك تطوّر مستواك باستمرار وتسأل وتبحث عشان تتجاوزها.
- تعديلات جريئة على أشياء أساسية في اللعبة (مثل تقدر من بداية اللعبة تنتقل لأي “استراحه” – أو bonfire- وصلت له، ما تقدر ترفع لفل اللاعب الا من مرحلة البداية…الخ)، وبغض النظر اذا التعديلات هذي أفضل أو أسوأ (شخصياً أشوفها أفضل)، ميزتها انها تجدّد لك عالم اللعبة وما تحس انك تلعب نفس الجزء السابق بالضبط مع شوية تطويرات.
- خصائص أونلاين تزيد من متعة اللعب بشكل كبير. امكانية وضع “مسجات” على الأرض للاعبين الآخرين وقراءة مسجاتهم عشان تساعدون (أو توّرطون) بعض. تقدر تستدعي ناس من الأونلاين يدخلون لعبتك ويساعدونك فيها، وهالشي تحسّن بشكل كبير عن الجزء السابق. تقدر تغزو لاعبين آخرين أو اللاعبين يغزونك. تقدر تشوف كيف ماتوا اللاعبين اللي قبلك في بعض المناطق بحيث تتجنب مشاكلهم. شيء جميل جداً يا رجل!
- اللعبة تجبرك تستكشف وتجرّب وما تشرح كل نقطة زي ألعاب هالأيام. بتحس بمتعة هالشي اذا كنت انت وخويك تلعبون اللعبة، او اذا كنت تسولف مع لاعبين اللعبة أونلاين في النت أو على الاقل تتابع نقاشاتهم، لأن كل واحد بيصير له تجربه ونظريات مختلفه في اللعب.
- عالم ضخم جداًَ ومترابط ومليان أشياء كثيرة جداً تستكشفها. اللعبة فيها تقريباً 30 مرحلة و30 رئيس. ومع اني أملك خبرة في السلسلة تسهّل لي اللعبة، وساعدوني ناس كثير فيها، وحاولت أخلصها بسرعه عشان التقييم، الا انها اخذت مني حوالي 35 ساعه! اذا انت جديد على السلسلة ممكن تاخذ منك 50 ساعه أو أكثر. هذا لو افترضنا انك تبي تلعبها مره وحده بس وما تبي تجرب الشخصيات الثانية.
- أفضل نظام قتالي راح تشوفه في لعبة آكشن RPG. نظام قتالي ممتع وسلس وحماسي، والتنويع الكبير في الأعداء والرؤساء يجبرك تتقن كل الحركات اللي عندك وتهتم بكل صغيره وكبيره في لاعبك عشان تتأكد انك مستفيد منه بالشكل الأمثل.
- مراحل منوّعه ومصمّمه بشكل جميل. بعضها يبهرك بجمالها على الرغم من تواضع الجرافيكس.
السلبيات
- نظام انشاء الشخصية في البداية تعيس، والوجيه فيه قبيحه جداً، بتجلس فتره طويله الى ما تلقى شي مناسب.
- جرافيكس متواضع وقديم، وأحياناً يصير فيه تقطيع في الصوره.
- أوقات تحميل طويله اذا جيت تستخدم التنقّل السريع بين مراحل اللعبة.
- اذا انت شخص ملم بالسلسلة (أو على الأقل خلصت الجزء الأول من Dark Souls)، بتصير هاللعبة أسهل بكثير. أدري أنه فيه طرق أقدر أصعّب اللعبة فيها، بس استقعد لنفسي ليش؟ تمنّيت ان التجربة الأساسية للعبة يكون فيها تحدّي أكبر.
- كثير من شخصيات الكمبيوتر المسالمة ما تقدر تستفيد من خدماتها الا بعد ما تكلمها عدة مرات وانت واقف عندها. هالشي يصير يطفّش بعد فترة في اللعب.
- في الشخصية اللي سويتها (فارس – Knight) كنت نادراً ألقى درع أو سلاح أفضل من اللي معي. أخذت سيف Drangelic Sword من بداية اللعبة، واكتفيت فيه الى النهاية. الدرع اخذت Drangelic Armor وما غيّرته الا بعد نص اللعبة. تمنّيت يكون فيه تنويع أكثر. لكن عموماً ممكن تجربتك تختلف حسب الأشياء اللي تفضّلها.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
دارك سولز 2 من الألعاب اللي غالباً اما بتعشقها أو بتكرهها. فيه ناس يشوفون ان صعوبتها شيء منفّر ويقلّل من قيمة اللعبة، لكن شخصياً أشوفه شي يزيد من حماس ومتعة اللعبة. أضف الى ذلك العالم الضخم، وخصائص الأونلاين، والأشياء الكثيرة جداً اللي لازم تكتشفها بنفسك (أو بمساعدة غيرك)، والتنويع الكبير جداً الموجودين في المراحل والأعداء والرؤساء، وبتكون النتيجة لعبة أسطورية نادراً تلقى مثلها هالأيام.
ألعاب مشابهة
- Skyrim
- Demon’s Souls
فيديو اللعبة
