الايجابيات
- جرافيكس رهيب، ومؤثّرات مرئية وصوتيّة أرهب بتعيّشك تجربة الحرب بكل تفاصيلها. حتى تصميم المراحل جميل جداً مع الاهتمام الكبير في التفاصيل.
- تنوّع كبير جداً في الأسلحة (واضافاتها) والمركبات والأدوات. حتى حركات اللاعب نفسه فيها اضافات جديدة تطوّر من اسلوب اللعب، مثل امكانية انك تصد الطعنات اللي تجيك من الأمام (وتطعن اللي هاجمك) والغوص تحت الموية عشان تتجنّب الاعداء.
- عدد أكبر من المباني (والأماكن) القابلة للتدمير. صحيح ماهي زي السلسلة الفرعية Bad Company، لكنّه شي مرحّب فيه.
- تطبيق الجوّال والاجهزة اللوحية الخاص باللعبة جداً ممتاز. تقدر من خلاله تتصفّح احصائياتك واحصائيات اخوياك، وتتابع الأشياء اللي فكّيتها في اللعبة، وتضبّط الاسلحة والمعدّات حقتك بحيث تكون جاهزة اذا جا وقت اللعب، وتتصفّح السيرفرات أو حتى تستخدم الآيباد كخريطة مباشرة للعبة (نسخة الـPC وPS4 و Xbox One فقط).
- خاصية القائد (Commander) ترجع في هذا الجزء. شخص واحد من الفريق ياخذ دور القائد، وتتحوّل شاشته بالكامل إلى خريطه يقدر من خلالها يساعد فريقه باستخدام أدوات كثيرة، واذا أتقن هذا الدور بيكون غالباً سبب في فوز فريقه. الخاصية هذي ممتازة بتستمتع فيها مره اذا كان ودّك تمخمخ على ادارة المعركة بدال ما تكون داخلها.
- اضافة مرحلة تدريبية تقدر تجرّب فيها جميع المركبات والاسلحة براحتك لحالك في الخريطة، عشان ثاني مره اذا سقت الهليكوبتر ما تجيب العيد في أخوياك وتدخل في أقرب جدار.
السلبيات
- اللعبة رايحة فيها من الناحية التقنية. مشاكل كثيرة تبدأ من مشاكل صغيرة مثل أشياء تطير أو تختفي بشكل غريب إلى مشاكل كبيرة مثل أنه ينفصل عليك السيرفر على نهاية اللعبة (وتروح عليك النقاط!). المشاكل تحسّسك ان اللعبة ما زالت في طور البيتا.
- طور القصة ممل وتحس في بالتكرار. برأيي ما استغل امكانيات اللعبة وخياراتها المنوّعة بالشكل الجيّد.
- اصدار أجهزة الجيل الحالي (PS3 و Xbox 360) سيئة وما تعطي اللعبة حقّها لا من ناحية الجرافيكس ولا من ناحية عدد اللاعبين في اللعبة أونلاين (24 لاعب فقط بدال 64 زي الـPC).
- كنت أتمنى يكون في أطوار أكثر للأونلاين تستغل التنويع الكبير اللي موجود في اللعبة. طور حرب طيارات مثلاً، أو طور يركّز على حرب القوارب…الخ. أي شي غير الأشياء التقليدية حقت تفكيك وزرع القنابل.
- خاصية Levelution (تدمير معلم أساسي في المرحلة بحيث يغيّرها) فعلياً مايسوي تغيير يستاهل في أغلب المراحل. وغالباً بتلقى اللاعبين يحاولون يفجّرون هالمعلم بسرعه وتتغيّر الخريطة من أول كم دقيقة في اللعبة.
- اعتماد اللعبة على أسلوب اللعب الجماعي شي رائع، لكن اذا ركبت هليكوبتر مع الشخص المليون اللي يستخدمها عشان يطير ثم ينط منها في مكان عشوائي بدون ما يعلّمك وتتوهّق انت وتموت، وقتها ممكن تحس انك ما ودّك تلعب الا واثنين او ثلاثه من اخوياك موجودين عشان تتفاهم معهم.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
الجزء الجديد من Battlefield طوّر السلسلة بشكل ممتع لولا المشاكل التقنيّة اللي تنرفز. اذا تستهويك ألعاب الحرب الشاملة (جنود، طيارات، دبابات...الخ) فببساطة ما راح تلقى أحسن منها. أهم شي لا تشتري اللعبة على البلايستيشن 3 أو الاكس بوكس 360 لأنك ببساطة بتاخذ التجربة ناقصة. اشتر نسخة البلايستيشن 4 أو الاكس بوكس ون، أو اشتريها على البي سي اذا كان جهازك كويس.
ألعاب مشابهة
- Halo (من ناحية الحرب الشاملة واستخدام الطائرات والدبابات وكذا)
- Starhawk (برضو من ناحية الحرب الشاملة)
فيديو اللعبة
