وش سالفة اللعبة
الجزء الرابع والأخير من سلسلة باتمان آركام اللي يتم تطويرها من قبل ستديو Rocksteady. هي لعبة مغامرات في عالم مفتوح، تحديدًا في مدينة قوثم المشهورة واللي نشوف فيها شخصيات معروفة من عالم باتمان. الجزء هذا أضاف شخصية جديدة لعالم باتمان، وهي شخصية Arkham Knight عدو من أعداء باتمان. من أهم الإضافات في هذا الجزء هو إضافة البات موبيل، السيارة المشهورة لباتمان.
معلومات اللعبة
الايجابيات
- على عكس معظم الألعاب هاليومين، بداية اللعبة كانت ممتازة ومثالية بحيث جذبت اهتمامي وحسيت اني صرت متحمس ألعب اللعبة وأكملها.
- في أول مره تستلم التحكم في اللعبة، تلقى نفسك في عالم اللعبة مفتوح قدامك، بحيث تقدر تتعرف على تحكم اللعبة وتستكشف العالم على كيفك، عكس أغلب الألعاب اللي يقفلون عليك في غرفة صغيرة ويقولك “اضرب اللي قدامك ثلاث مرات” أو “صد الضربات ثلاث مرات” ويمشّونك في اللعبة حبه حبه كأنك طفل صغير.
- إضافة البات موبيل (سيارة باتمان) إضافة ممتازة. من أكثر الأشياء اللي استمتعت فيها باللعبة كانت القتال باستخدام البات موبيل.
- لا زالت من أفضل الألعاب من حيث المشاهد والإخراج والتصوير. اذا اشتغل أي مشهد في اللعبة، أترك كل شي بيدي وأستمتع بمشاهدة المقاطع اللي تنعرض قدامي.
- بشكل عام، حسيت اني ألعب لعبة مرتّبة. في اللعبة، فيه قائمة رئيسية تعرض لك المهمات الرئيسية وكم خلصت منها، وكم لغز جانبي عندك وكم خلصت منه، وهكذا.
- من ناحية الرسوم، هذي وحدة من أجمل الألعاب اللي شفتها. صحيح المدينة كئيبة كونها أغلبها ظلام، ولكنها لا زالت مرسومة بشكل متقن ودقيق.
- الكثير من الخيارات في طريقة اللعب. قبل تقاتل، غالبًا تلقى نفسك في مكان عالي بحيث تقدر تشوف الأعداء وتخطط طريقة هجومك عليهم بشكل ممتاز. تبغى تتخفّى وتحاربهم واحد واحد بدون ما يكشفونك؟ تقدر تسويها. تبغى تهاجمهم بشكل آكشني وتقضي عليهم واحد واحد؟ برضه تقدر!
السلبيات
- على إن البات موبيل إضافة ممتازة، إلا ان السواقة فيها في مدينة قوثم كان معقّد. شوارع المدينة صغيرة وضيقة وما حسيت انها مناسبة اني أتنقل في المدينة باستخدام السيارة. لذلك صرت دائمًا أترك السيارة وأتنقل عن طريق الخطّاف.
- كثير من التطويرات ما حسيت له فايدة واضحة أو اعتيادي بزيادة. طوّرت شخصيتي كثير لكن التطويرات كانت اعتيادية مثل “تزيد نسبة الضربات 30%” أو بعض التطويرات اللي ما استفدت منها لانها تتطلب وضعيات صعب تحصل، مثل “وأنت طاير في الهوا وقدامك عدو اضغط الأزرار الفلانية” هذا الوضع ما صار لي في اللعبة الا يمكن مره أو مرتين فقط.
- النهاية الصدقية للعبة ما تطلع لك الا بعد ما تخلص كل شي في اللعبة. ايه. لازم تخلص كل مهمة جانبية وتحل كل لغز وتسوي كل شي جانبي في اللعبة، وتخلصها بنسبة 100% عشان تطلع النهاية الحقيقية.
- في نهاية اللعبة، واجهت الكثير من المهمات السخيفة اللي حسّيت انها محرد تمغيط وإطالة مالها فايدة. أحداث اللعبة تقريبًا منتهية ولكني كل شوي ألقى نفسي لازم أضارب وأقاتل أعداء بشكل غير منطقي.
التقييم النهائي
-
ابو كلب
-
تمشي الحال
-
ممتعة
-
ممتازة
-
اسطورية
الزبدة
بعيدًا عن كونها لعبة مبنية على شخصية وعالم باتمان، هذي بحد ذاتها لعبة رائعة. شل عنها اسم باتمان، بتلقاني لا زلت ألعبها وأستمتع فيها، لانها قبل كل شي، هي لعبة ممتازة بحد ذاتها. طريقة اللعب الممتعة والمتنوّعة، والقصة الجميلة مع المشاهد والاخراج الممتاز، كلها أعطتني تجربة رائعة. على الطرف الآخر، المهمات في نهاية اللعبة احتوت على الكثير من المضاربات اللي مالها معنى، بالاضافة الى اني لازم أخلّص كل شي في اللعبة عشان أشوف النهاية الحقيقية. تظل آركم سيتي هي الأفضل في السلسلة بالنسبة لي، ولكن لا يعني هذا أبدًا ان آركم نايت ماهي لعبة ممتازة.
ألعاب مشابهة
- Middle-Earth: Shadow of Mordor
- Assassin’s Creed
فيديو اللعبة
