التقييمات

تقييم: Assassin’s Creed 3: Liberation



التقييم: 3.0/5. من 1 .
Please wait...

صورة الموضوع

اعلان ترفيه

الايجابيات

  • افضل تجربة لسلسلة Assassin’s Creed بتلقاها على جهاز محمول: مدينة مفتوحة فيها عدد جيد من الاشخاص، تقدر تتسلق فوق البيوت وحتى الأشجار.
  • امكانية تغيير لبسك في اللعبه وتمثيل دور ثلاث شخصيات عن طريق تغيير ملابسك: شغّاله (هي عبده – slave – بس اسميها شغاله)، أو قاتله (أو “حشّاشه” – Assassin)، أو وحدة من الطبقة الراقية. كل شخصيه لها طريقة لعب وميزات معينة وهالشي اضاف عمق وتغيير لطريقة اللعب.
  • تدفع 180 ريال تقريباً على لعبة بتعطيك أكثر من 10 ساعات لعب في القصة، وحط 10 ساعات ثانيه فوقها (أو أكثر) لو تبي تخلص كل المهمات الجانبية وتجمّع الاشياء اللي موجودة في اللعبة.
  • أغلب الحركات اللي تتطلب لمس الشاشه في اللعبه بيكون لها طريقة بديلة تسويها باستخدام ازرار التحكم. اعتبرها ميزة لان العاب الفيتا طايحين في موضة انهم يغصبونك تستخدم شاشة اللمس لمجرد انها موجودة وتكون بطريقة غير عملية عادة.

السلبيات

  • قصة أبو كلب. شخصيات ماتعرف اي شي عنها يتم تقديمها بشكل فاشل يخليك ما تهتم لها ابد. تمثيل واداء صوتي في مستوى مسرح المدرسة او الجامعة حقتك (أو اقل). اجمالاً تحس انك تتابع فلم تجاري من النوع الرديء اللي يخلي أفلام “فان دام” تستحق جائزة أوسكار بالمقارنة. وفوق كذا ما تقدر تنط العروض لازم تشوفها كلها!
  • مثل ما ذكرت في الميزات ان فيه ثلاث شخصيات كل وحده لها طريقة لعب معينة. مشكلة الشخصيه اللي من الطبقة الراقية انها لابسه فستان، وهالشي ما يخليها تقدر لا تركض ولا تتسلق أي شي في الحياة. تحس انك تلعب لعبة باربي مو أساسنز كريد. المشكله انهم بيجبرونك تلعب فيها في عدة مهمات.
  • الموسيقى التصويرية سيئة مقارنة باللي تعودناه من السلسلة. وفيه كم مقطع موسيقي يتكرر في اللعبة بيجيب لك مغص حتى لو ما قد لعبت أساسنز كريد قبل كذا.
  • مشاكل تقنية غريبة. مثلاً مرات الموسيقى فجأه توقف في مكان المفروض تشتغل فيه. مرات الشخصيه تشوفها تحرك شفايفها بس ما يطلع صوت الكلام. مشاكل تقنية تخليك تضطر تعيد المهمه عشان تصلح اللعبه، وفيه نسبة من الناس واجهوا مشكلة تمسح تخزينك حق اللعبة! (ما واجهتها الحمدلله).
  • نظام القتال في اللعبة فيه خلل كبير. الشخصيه اللي تقاتلها متعبتك وقاعده تصد كل ضرباتك؟ مو مشكله، اركض ناحيتها بس وبتطرحها بالارض ثم تطعنها وتقتلها بكل سهوله.
  • الزعماء في اللعبة مافيهم اي تحدي. حتى في كم واحد فيهم قتلتهم بضربة وحده! سلامات؟ يعني ادري ان لعبي رهيب بس مو لهالدرجة هههههههه.


التقييم من الآخر

التقييم النهائي

الزبدة

التقييم: 3.0/5. من 1 .
Please wait...

صدق ان عيوب اللعبة كثيرة وبعضها قاتلة (وحتى فيه كم عيب أقل اهمية ما كتبتهم عشان اختصر التقييم)، لكن صراحة ما اقدر اقول عليها لعبة أبو كلب. في البداية تغصبت العبها خاصة مع القصه التعبانه اللي ما حمستني لها، لكن مع الوقت صرت استمتع فيها كلعبة فيتا. الفيتا عند اغلب الناس الحين مغبّر، وهذي من الالعاب اللي بتساعدك تنفض الغبار عنه وتلعب فيه من جديد. هل هي لعبة تستحق التجربة بشكل عام؟ لا طبعاً. هل هي لعبة فيتا توسع صدرك وانت برا البيت او في اي مكان ما عندك بلايستيشن او اكس بوكس؟ أكيد! خاصة ان الفيتا يعاني من نقص كبير في الالعاب هالفترة.

ألعاب مشابهة

  • Assassin’s Creed 3

فيديو اللعبة



معلومات اللعبة

  • الناشر: Ubisoft
  • المطور: Ubisoft
  • تاريخ الإصدار: 2012/10/30
  • التصنيف العمري: PEGI 18+
  • عمر اللعبة: 10 ساعات (تقريبي)
  • تحتاج إنجليزي؟: نص ونص


الوسوم

مشهور الدبيان

مؤسس سعودي جيمر، متخصص في تطوير المواقع والتطبيقات، ومهتم في الذكاء الاصطناعي.
إغلاق